ВОМ ПЫТШКӦС ВИСЬӦМ КАГАЯСЛӦН

Тайӧ висьӧмӧн висявлӧны нёнясян кагаяс чужӧм мыстиыс медводдза тӧлысьясас. Унджыксьыс висьӧдӧ омӧлик, нюкыртчӧм кагаясӧс. Кывйыс, пинь аныс, вом пытшкӧсыс налӧн вевттьысьӧ еджыд чутъясӧн либӧ еджыд корка кодьӧн. Нёнясьны найӧ сэк оз вермыны, вом пытшкӧсныс доймӧ да. Пӧттӧдз сёйтӧмла горзӧны, спокой оз сетны мамлы ни видзысьяслы. Сы вӧсна мамъяслы колӧ видзны кагаяссӧ тайӧ висьӧмӧн висьмӧмысь. Миян йӧз тайӧ висьӧмсӧ шуӧны «чветитӧмӧн». Чайтӧны, тайӧ «чветитӧмӧн» быд кагалы колӧ висьны. Абу сідз, ёртъяс. Кагалысь кӧ вомсӧ сӧстӧма видзан, сюр нёньӧн он нёньӧд да мыйӧн сюрӧ он верд, быд вердӧм бӧрын чышкан сылысь вомсӧ небыдик, сӧстӧм, пуан ва пытшкын кӧтӧдӧм дӧра торйӧн, сэки некутшӧм «чветитӧм» сылӧн оз ло, вом пытшкӧсыс оз вись ни.

Кагалӧн кӧ висьмас вом пытшкӧсыс, колӧ петкӧдлыны сійӧс докторлы да регыдджык зільны бурдӧдны. Чунь вылӧ гартны сӧстӧм дӧра тор, кӧтӧдны сійӧс доктор сетӧм ваӧн да быд вердӧм бӧрын чышкыны сійӧн кагалысь вом пытшкӧссӧ. Ниртыштӧмӧн чышкыны, мед небыд рысь кодьыс ставыс вушъяс, бырӧ. Чышкигӧн кӧ неуна вир петыштас, мед, сыысь омӧльысь абу.

Эновтчан кӧ тайӧ висьӧмсӧ бурдӧдӧмысь — мыськӧмнад, чышкӧмнад он нин отсав. Лоас бара доктор дінӧ ветлыны. Сійӧ сетас мавтантор. Жель помӧ гартыштан вататор, лякыштан сійӧс мавтанторйӧн, сэсся рыськалӧмин мыськӧм бӧрын кокньыдика мавтыштан сійӧн вом пытшкӧссӧ.