ДОЙМӦМ, ВӦРЗЬӦМ, ЧЕГӦМ

Доймӧмысь, вӧрзьӧмысь да чегӧмысь оз ков бурдӧдчыны велӧдчытӧм веськӧдчысьяс, бабитчысьяс ордын. Нем гӧгӧрвотӧгыд найӧ бура ёна песлӧдласны, кусньӧдласны висянінтӧ, бура дыр мучитасны висьысьӧс. Вӧрзьӧмыд наӧн оз веськав, либӧ веськӧдасны да лёк ногӧн, чегӧм лыяссӧ йитласны кыдз сюрӧ. Висьысь морт нэм кежлӧ вермас кольны китӧг-коктӧг.

Ӧд песлӧдлӧм бӧрад, лёк ногӧн лыястӧ йитлӧм бӧрад, он нин, буракӧ, важногыд лӧсьӧд. Сы вылӧ велӧдчӧм мортыд сэк оз босьтчы бурдӧдны тэнӧ.

Вӧрзьӧм да чегӧм инӧ пыктӧмысь кутӧм кузя да биалӧмысь видзӧм кузя пырысь-пыр жӧ колӧ пуктыны кӧдзыд ваӧн кӧтӧдӧм дӧра тор, либӧ нӧшта бурджык — кузьчышъян пытшкӧ кӧрталӧмӧн йи. Унджыкысь вежлавны ва дӧратӧ. Регыдджык висьысьӧс нуны доктор дінӧ.

Водтӧдны висьысьӧс телегаӧ либӧ доддьӧ колӧ лӧсьыдджыка, небыдджыка вольсалӧм вылӧ. Чегӧм ки-кокӧс таркалӧмысь видзӧм кузя колӧ гартыштны шӧртӧн, сэсся вылас ки-кок кузялаыс пуктыны дзав лубйысь да гартны гӧгӧрыс кага тӧбӧд вӧньӧн либӧ векньыдика вундӧм дӧраӧн.