ДОЙ

Дойдас кӧ кодкӧ асьсӧ — вундысяс-ӧ, керыштчас-ӧ кыткӧ, оз ков некор дой бердсӧ киськавны муӧн, саӧн, либӧ мукӧд лёкторъясӧн. Колӧ мыськавны дойсӧ сӧстӧм сӧдз ваӧн, сэсся топӧдны сійӧс воча дор ӧтлаасьтӧдз. Пуктыны дой вылӧ кыз небыдик сӧстӧм дӧра тор, лӧсьыдджыка сійӧс кӧртавны да регыдджык мунны доктор дінӧ. Сійӧ вурас дойсӧ. Куим-нёль лун мысти дойыд бурдас, пытшкас кӧ няйтыс оз веськавлы.

Эновтчан кӧ лун кежлӧ кымын, дой вермас ордны. Вурны сійӧс оз нин кут шогмыны. Сэки дойыд куим-нёль вежон, нӧшта дырджык на висяс.

Орсялӧм дойӧс ёна колӧ видзны пежалӧмысь. Быд лун либӧ лункосмӧсӧн колӧ сійӧс выльысь кӧртавны. Пежалан кӧ дойтӧ, ёнджыка висьмас, гӧгӧр ӧдас, Антонов огонь вермас босьтны (пыктас зэв ёна). Дой кӧрталанторъяс; ва и, киськалантор и (порошок), вата и, марля и — ставсӧ колӧ босьтны докторлысь. Кӧртасьтӧдз войдӧр бура кырымъястӧ колӧ мыськыны, сэсся босьтны вататор, кӧтӧдны сійӧс доктор сетӧм ва пышкын, мыськавны сійӧн висян дойтӧ. Став орсӧ колӧ мичаа весавны, сэсся киськавны дойсӧ порошокӧн, вевттьыны сійӧс марляторйӧн дай кӧртавны доктор велӧдӧм серти. Дой вылӧ порошок лӧсьыд кисьтавны жельторйӧн либӧ истӧгӧн. На помӧ гартыштан вататор, сюйлан сійӧс порошок пышкӧ, сэсся сӧмын сявкйӧдлы дой вылӧ.

Дой кӧ пондас висьны: нетшкыны, ёвкйӧдлыны, гӧгӧрыс гӧрдӧдас, пыктас, — пыр жӧ колӧ петкӧдчыны докторлы.