КОМИ НИГА ЛЭДЗӦМ ЙЫЛЫСЬ

Ӧні пондісны школаын комиӧн велӧдны, кутісны коми нигаяс лэдзавны. Мыйла нӧ сідзи вӧчисны? Войдӧр тай нӧ школаясын вӧлі рочӧн велӧдӧны.

Коми челядь рочӧн али комиӧн бурджыка гӧгӧрвоӧны? Тӧдӧмӧн комиӧн! Медым челядьыс гӧгӧрвоасныджык, мыйӧ найӧс велӧдӧны, ӧні кутісны велӧдны комиӧн. Комиӧн велӧдігӧн ковмисны коми нигаяс. Войдӧр коми нигаяс эз вӧвны, ковмис найӧс лӧсьӧдны да печатайтны. Мед бурджыка лӧсьӧдны нигаяссӧ, ковмис тӧдмавны коми йӧзлысь сёрнисӧ, воддза олӧмсӧ, да ӧнія олӧмсӧ. Чукӧртчисны Сыктывдін карӧ коми гижысьяс тайӧ уджсӧ вӧчны, ёна лои налы мырсьыны. Войдӧр отсалысьяс налы некод эз вӧв, унджыкыс вӧлі паныд мунӧ, отсалӧм пыдди дзугӧ тайӧ уджсӧ. Сьӧмыд эз вӧв, унатор вӧлі оз тырмы. Ӧні вӧлисти уджыс артмыныджык кутіс.

Ӧнӧдз петісны коми нигаяс: 1) Лыддьысьны велӧдчан (Сандрӧ Васьӧлӧн); 2) Законпуктас; 3) Шонді югӧр; 4) Войтӧв шувгӧм; 5) Гӧрд пӧлян; 6) Нывбабаяс, тіянлы шуам ми; 7) Коми грамматика туй писькӧдысь (Сандрӧ Васьӧлӧн); 8) Выддисьны-гижны вевӧтчан (Пермакъяс сёрни ногӧн); 9) Посни чой-воклы мойданкывъяс.

Ӧні печатайтӧны нигаяс: 1. Мощи йылысь да 2. Шонді петігӧн дзоридз косьмис (Нёбдінса Витторлӧн пьеска.)

Нигаяс оз сӧмын школаяслы лӧсьӧдны: лӧсьӧдӧны гырысьяслы тшӧтш, став коми йӧзлы, мед быдӧн вермисны лыддьысьны, тӧдмасьны, кыдзи мукӧд йӧз олӧны, кыдзи колӧ овны.

Ӧні нига лэдзан инын уджалӧны: М. И. Ёль, В. А. Молодцов, Н. А. Шахов, А. Н. Надеев, В. И. Лыткин, А. Н. Чеусова, А. А. Суханова, А. А. Заболоцкая, В. Т. Чисталёв, И. Т. Чисталёв, сэсся мукӧд.

Уна гижисны коми гижысьяс: Нёбдінса Виттор (В. А. Савин), Збой Войтыр (Н. П. Попов), М. Н. Лебедев, И. В. Митюшев, Вась Педӧр (Ф. В. Попов), Кос Кулак (И. Е. Худяев), Василей Ёгор (Е. В. Колегов), Варыш (А. А. Маегов), Габӧ Педӧр Ӧльӧксан пи (А. А. Чеусов), И. А. Суханов, И. В. Жеребцов, М. Ульныров, А. С. Сидоров, Г. Старцев.