КОМИ ОБЛАСЬТ
Саръяс ку письыс петісны: пессисны коми йӧзӧс рочӧ пӧртны. Сэтшӧм политика коми йӧзӧс торйӧдліс, янсӧдліс. Коми йӧз вӧлі олӧны 4–5 губерняын. Оліс коми йӧз губерня пельӧсъясас, сійӧ олӧм вылӧ эз и видзӧдлыны прамӧя. Некод коми йӧз вӧсна эз тӧждысь — Коми муын быдсяма озырлуныс эм (рудаяс, вӧр, нефть), а коми йӧз кынӧмпӧтсӧ корсьны ветлывлісны сюрс (1000) верст сайӧ, заводъясӧ. Ӧні коми йӧз ӧтлаасисны, восьтісны Коми обласьт. Коми обласьт восьтісны сы понда, мед коми йӧз ачыс вермас бергӧдлыны ас олӧмнас; мед коми йӧз ӧдйӧджык содасны-быдмасны мывкыднас (развивайтчасны); мед коми йӧз тшыгъялӧмысь дугдасны, мед воссясны заводъяс-фабрикаяс. Коми муын лоӧ коми культура, лоӧны комиӧн сёрнитысь суддяяс, комиссаръяс.
Коми обласьтын юркарыс Сыктывдін кар (Усть-Сысольск). Обласьтын квайт карув (уезд): Емдін, Сыктыв, Лузберд, Кулӧмдін, Изьва, Удора.
Коми обласьтын со мында олысь:
| 1. Емдін карулын | 13.984 верӧс (мужчин) | 18.272 ань (женщин) |
| 2. Удора -"- | 4.359 -"- | 5.956 -"- |
| 3. Сыктывдін -"- | 26.388 -"- | 34.710 -"- |
| 4. Лузберд -"- | 9.809 -"- | 12.436 -"- |
| 5. Кулӧмдін -"- | 11.750 -"- | 15.925 -"- |
| 6. Изьва -"- | 9.439 -"- | 12.561 -"- |
| Ставыс | 75.829 верӧс | 99.920 ань. |
Ӧнія Коми обласьтын ставыс 175.749 морт. Пӧшти ставыс коми, мукӧд пӧлӧс олысь зэв этша. Но обласьтӧ абу на ещӧ став комиыс пырӧма.
Комиясыд ещӧ олӧны Печӧра пӧлӧн, Перымскӧй губерняын, Ятскӧйын. Найӧс кӧ лыддьыны, комиыд мӧд та мында содӧ.
Комияс нӧшта олӧны Сибырын 15–25 сюрс гӧгӧр. Став комиыс лоӧ нёль сё сюрс гӧгӧр (400.000).
