ЙӦЗКОСТСА УДЖ

Выльгортса изба-читальняын

Стенас ӧшӧдалӧма киӧн гижӧм гырысь плакатъяс.

Татшӧм жӧ плакатъяс колӧ эськӧ ӧшӧдавны быд изба-читальняын, библиотекаын, школаын, Исполкомын, нардомын, быдлаын, кӧні ёнджыка бергалӧны йӧз. Ме думысь, абу омӧльтор.

Плакатъясын гижӧдъяс:

Мый вӧчӧ мортлы нига.

Нига син-пель сюсьмӧдӧ,

— бур мывкыд сетӧ,

— юр вежӧр ыдждӧдӧ,

— шогысь пальӧдӧ,

— висьӧмъясысь мынтӧдӧ,

— став йӧзлысь олӧмсӧ висьталӧ,

— быд кипод удж вылӧ велӧдӧ,

— вӧрсаясӧс, васаясӧс, бесъясӧс бырӧдӧ,

— бур туй вылӧ нуӧдӧ,

— быдӧнӧс велӧдӧ кувтӧдз.

Том йӧз, нига дінӧ кутчысьӧй.

Том нывъяс, том зонъяс,

Том юр вемъяс, вежӧръяс,

Вир паса ломзян чужӧмъяс,

Шондібанъяс, зарни кодзувъяс,

Сьӧлӧмшӧръяс, рочаканьяс,

Бать-мамлӧн гажлунъяс,

Выль олӧм лӧсьӧдысьяс,

Быдӧн кутчысьӧй нига бердӧ!

Нига — тіян бур мам!

Нига — тіян олӧмлӧн югыд туй!

Самӧкур — дур,

Табаккур — дур,

Коді абу кур — сійӧ зэв бур!

Колӧ кӧдзны турун.

Кӧдзан турун — содас кӧрым,

Содас кӧрым — содас скӧт,

Содас скӧт — содас куйӧд,

Содас куйӧд — содас нянь,

Содас нянь — содас овмӧс,

Содас овмӧс — сьӧкыд удж личалас,

быд нужа бырас,

долыд олӧм пуксяс.

Нывбабаяслы.

Туй тіянлы восьтӧма,

Кабыр улысь мынтӧма.

Чукӧртчӧй, ӧтувтчӧй,

Сёрнитӧй, тӧлкуйтӧй.

Асьнытӧ дорйӧй, кокньӧдӧй,

Лӧсьӧдчӧй овны выль ногӧн,

Важ олӧм вӧтлӧй — ДУК ВОН!

Н. Чеусов.

РЕДАКЦИЯСЯНЬ: Татшӧм модаа уджыс, гашкӧ, мунӧ мукӧд изба-читальняясын тшӧтш? Гижалӧй!