ЗЕЛЕНЕЧ ВӦЛӦСЬТЫН ТОМ ЙӦЗЛӦН ОЛӦМ

Февраль 17-ӧд лунӧ, вӧскресенньӧӧ, Зеленечса том йӧз пуктылісны спектак «Олыштан да муса лоӧ». Ӧтикысь сӧмын сійӧ луннас и вӧлі велӧдчӧмыс (репетиция) ворснысӧ. Арнас 1923‐ӧд воын тайӧ ворсанторсӧ (пьеска) пуктылӧмаӧсь нин. Кодсюрӧ лӧсьыда ворсӧны. Мукӧд том йӧз ӧти мортлысь ворсанторсӧ (роль) кӧть кыкӧн ворсасны, ньӧтик велӧдчытӧг, сэтшӧма колӧ ворсӧмыс. Ворсанін школаын, улыс судтаас, клубын. Йӧз этша тӧрӧ, сӧмын 50 морт; видзӧдысьяс шы ни тӧв пукалӧны, оз увгыны, бура кывзӧны. Клуб оз и ломтывлыны, сӧмын спектак вӧчигӧн ломтыштлӧны. Ворсанін (сцена) ичӧт жӧ. Декорация пыдди занавес ситечысь, ӧшӧдӧма рамаясӧ, косясьлӧма нин важысла (1919 восянь). Спектак вылӧ пырны видзӧдысьяслы вузалӧны пыран пас (билет), кӧпейкаӧн-джынйӧнысь (1½ коп.), да сійӧ мукӧдыс оз босьтны. Пастӧг вӧзйысьӧны пырны (видзӧдны спектактӧ быдӧнлы окота). Видзӧдысьястӧ пас босьттӧгыд оз жӧ позь лэдзныд, сьӧмыд быдлаӧ колӧ: карасин, пес ньӧбны, мукӧдлаӧ.

Зэв эськӧ Зеленечса том йӧзлы колӧ спектакъястӧ вӧчлӧмыд, да налӧн ӧтувтчӧмныс абу. Век на важ моз унджыкыс олӧны: зонъяс паськӧдӧмаӧсь гудӧк да туй кузя быд рыт кодалігтырйи ветлӧдлӧны. Кодсюрӧ вӧдитӧны ыджыд пуртъяс да мукӧд пӧлӧс оружйӧ, косясьӧны мӧд сиктса зонъяскӧд. Нывъяс на бӧрся вӧтлысьӧны. Татшӧм лёк пемыд олӧмтӧ колӧ шыбитны нин, путкыльтны джуджыд гуранӧ, мед няйтӧн тырӧ. Колӧ выль ногӧн овны, ӧтчукӧрын ставлы бура гажӧдчыны, кыдзи мукӧд сиктъясын олӧны, оз косясьны, оз кодавны. Том йӧз быдӧн ӧтчукӧрын гажӧдчӧны бура, сьылӧны коми сьыланкывъяс, гижсьӧны велӧдчан кружокӧ (культурно-просветительный кружок), союз молодёжӧ, сэсся бӧрйӧны сюсьджык велӧдчыштӧм мортӧс удж нуӧдны, вӧчӧны собранньӧяс, тӧлкуйтӧны: кыдзи колӧ лӧсьӧдны лыддьысян керка (библиотека-читальня), спектакӧн ворсанін (нардом), кысь колӧ судзӧдны бур нигаяс да газетъяс лыддьысянінӧ, сёрнитӧны, велӧдчӧны, кыдзи колӧ видз-му выль ногӧн кокньыдджыка уджавны, мед эськӧ бурджыка нянь, турун артмис.