ОТСАВНЫ КОЛӦ КОМИ ГАЗЕТЛЫ

Миян коми газет петӧ кыкысь вежон пиын, дай сійӧ мукӧддырйиыс роч сорӧн. Мыйла?.. Ӧти-кӧ, газет лэдзанінын (редакцияын) коми газет бердас уджалысьыс ӧтнасӧн Нёбдінса Виттор. Ӧтнасӧн сійӧ, дерт, оз вермы ставсӧ вӧчны. Лёка ӧд уна уджыс газет бердын. Сэсся ӧні Нёбдінса Виттор уджнас тырӧмысла нинӧм весиг оз эштыв гижны комиӧн. Коми йӧз сылысь гижӧдъяссӧ, сьӧлӧмсянь чуксасьӧмсӧ радейтӧны, виччысьӧны ёна. Сы вӧсна редакцияӧ колӧ сетны коми уджалысьӧс Нёбдінса Витторлы отсӧг вылӧ, асьсӧ кольны куш редакторавны.

Мӧд-кӧ — комиӧн гижысьыс вывті этша. Шуӧны, коминас гижӧмыс пӧ оз артмы. Коми мортлӧн комиӧн оз артмы! Сідзкӧ нӧ, велӧдчӧны оз сы вылӧ? Ме ог тӧд. Партийнӧй клубын тай эм зэв уна кружок, да коми олӧмсӧ тӧдмаланыс, коми кыв велӧданыс абу-а. Медъёна нин колӧ тӧдны коми кыв партийнӧй да профессиональнӧй удж нуӧдысьяслы. Сӧветскӧй власьт сетіс миянлы туй югдӧдны йӧзӧс ас кывйӧн. Колӧ сы бердӧ босьтчыны чорыда, колӧ велӧдчыны гижны комиӧн, медым гижӧм оз ло рочӧн коми ногӧн (Югыд туй № 45 — «Бурджыка лэптам ассьыным хозяйство») дай сёрнитны морт ногӧн — «извиняйтчытӧг реч начинайтігӧн».

Колӧ матысмӧдны сӧветскӧй удж коми йӧз бердӧ, колӧ сійӧ уджсӧ петкӧдлыны налы, кыскыны уджас. Вӧчсьӧ оз сійӧ миян газет пыр? Оз. Босьтам Обсоюз Кооперативов. Гижліс эз на сійӧ газетӧ комиӧн? Ньӧтчыд эз. «Кооператив и Охотники» статья (Югыд туй № 34) коми йӧзлы гижӧма, гижӧма рочӧн. Эмӧсь и мукӧд сэтшӧм статьяяс рочӧн. Обземуправленньӧ, Обфинотдел, Обздравотдел зэв на этша гижлісны комиӧн. Сэсся партийнӧй да профессиональнӧй уджъяс омӧля на гижавлӧны. Тайӧ абу бур!