КОМИ ЭМБУР СОДӦ

(Сёрни Обисполкомса председателькӧд)

Доход содӧма кык мында.

Тайӧ лунъяснас Мӧскуаысь воис Обисполкомса председатель, т. Сорвачёв.

Коми обласьтлы сетӧмаӧсь джын доход вӧр уджалӧмысь. Таво доходыс вайӧ миянлы 250.000 чӧлкӧвӧй зарниӧн, сэсся сетӧмаӧсь отсӧг (ссуда) 450.000 чӧлкӧвӧй. Печӧраса вӧр вузалӧмысь чукӧрмӧма 1.500.000 шайт, сэтысь миянлы бара воӧ 150.000 шайт. Сідзнас миян обласьтса доход содӧма кык мында, ми вӧлі кӧсъям чукӧртны сӧмын 800.000 шайт, ӧні миян доходыс лоӧ 1.650.000 шайт.

Коми му тӧдмалӧм.

Мӧскуаын коми студентъяс восьтӧмаӧсь кык комиссия Коми му тӧдмалӧм йылысь. Ӧтикас уджалӧны зэв велӧдчӧм йӧз: профессоръяс Бороздин, Налимов, мукӧд. Мӧдас — коми студентъяс. Медъя! Уна бур вермасны сетны коми йӧзлы миян велӧдчысьяс. Сӧмын колӧ отсыштны!

Асыв-Войвыв Обласьт.

Ставрочмувывса Исполкомлӧн Комиссия шуӧма, водз на пӧ ӧні торйӧдны Асыв-Войвывса Обласьт (Северо-Восточная Область). Кор тайӧ обласьтыс лоӧ, Печӧра вож ставнас пырас Коми Обласьт улӧ, торъя Печӧрскӧй округӧн. Комилӧн кольӧ аслас оланногса (национальнӧй) став праваыс. Пермякъясӧс миянкӧд ӧтлаалӧм йылысь абу на дзикӧдз помасьӧма сёрни, регыд жӧ нин эськӧ решитасны.

Сортовка лэдзӧм содӧма.

«Северолеслы» первой вӧлі тшӧктӧмаӧсь таво лэдзны 575 сюрс кер. Ёна корӧм мысти ӧні содтісны сортовка лэдзӧм. Таво Коми Обласьтын (Печӧраысь кындзи) лоӧ со мыйта сортовка лэдзӧм: 715 сюрс кер, 350 сюрс шпал, 1 сюрс куб пес.