ДОХОД СЕРТИ ВОТ

(Подоходно-поимущественный налог)

Сӧвет власьт шуис: «Мед став олысь миян республикаын мынтас вот аслас нажӧтка серти».

Ӧні миян крестьянин мынтӧ видз-му уджалӧмысь вот (сельскохозяйственный налог). Рабочӧй мынтӧ вот аслас нажӧтка серти. Купеч-тӧргӧвӧй мынтӧ вот тӧргуйтӧмысь (промысловый налог) да барышсьыс (подоходно-поимущественный налог).

Доход серти ӧнӧдз вот босьтсьыліс сӧмын каръясын, сиктъясын (деревняын) эз на вӧв. Ӧні уна вӧлӧсьтын нин эмӧсь купечьяс-тӧргӧвӧйяс. Найӧ мынтӧны вӧлі вот сӧмын тӧргуйтӧмсьыс. А купеч, дерт, вот мынтӧм пыддиыс крестьянин зептысь вӧлі кыскӧ сьӧмтӧ — тӧвар вылӧ дон лэптӧ. Веськыда кӧ шуны, деревняса тӧргӧвӧйяс некутшӧм вот эз мынтывны.

Ӧні воис налы тшӧтш ӧчередь — доход серти вот мынтыны. Крестьяна, кодъяс мынтӧмаӧсь видз-му уджалӧмысь вот, доход вотсӧ оз мынтыны. Сійӧ вотсӧ веськӧдӧны тӧргӧвӧйяслысь, пӧдрадчикъяслысь; сэсся мынтӧны сійӧ вотсӧ докторъяс, ветеринарнӧй пельшӧръяс, бабкаяс — кодъяс оз государство вылӧ уджавны.

Гашкӧ тӧргӧвӧйяс, пӧдрадчикъяс, шуасны: ми пӧ видз-му вотсӧ тшӧтш мынтім, миянлы пӧ оз жӧ ков доход серти воттӧ мынтыны. Закон найӧс оз мезды: найӧ босьтӧны кык пӧлӧс доход — кыкысь уна найӧ и мынтӧны. Доход вот оз мынтыны пимӧкатъяс, вурсьысьяс, плӧтникъяс (ремесленникъяс), заводӧ, Сибырӧ ветлысьяс, кодъяс вӧлі мынтӧмаӧсь нин видз-му вотсӧ.

Быд вӧлӧсьтын Исполкомъяс вӧчӧны списокъяс, лыдӧ босьтӧны став йӧзсӧ, коді доход босьтӧ куимсё шайт зарниӧн квайт тӧлысьын. Уджалысь йӧзлы нинӧм повны, колӧ веськыда висьтавны ассьыд доходтӧ.