КОМИ-ПЕРМЯКЪЯС ЙЫЛЫСЬ

Коми-пермякъяс олӧны Коммуын: Усолльӧ карулын (Кудымкарскӧй район), Чердін карулын (Косинскӧй район), сэсся Ятка губерняын Слӧбӧдскӧй, Омутинскӧй карулын (войдӧр вӧліны Глазов карулын).

Став коми-пермякъяс сё кызь сюрс гӧгӧр. Кынӧм вердӧны коми-пермякъяс миян моз жӧ му-видз уджалӧмӧн, вӧралӧмӧн, сортовка лэдзӧмӧн, заводӧ ветлӧмӧн. Олӧны зэв гӧля. Миян коми йӧз важӧн нин сьӧд керкаын оз овны, ӧшиньӧ стеклӧ пыдди мӧс рушку оз пуктыны — сэні эм на сэтшӧм олысьыс. Гӧльлун вӧснаыс коми-пермякъяс олӧны сьӧд няйтӧн, няйта олӧм вӧсна ёна висьӧны уна пӧлӧс висьӧмӧн. Велӧдчӧм йӧз сэні миянысь на этша. Школаяс содӧм пыдди век ӧтарӧ чинӧ. Налогъяс гырысьӧсь: дас пудйысь ичӧтджык налог мынтысь этша — эмӧсь сё пудйысь унджык мынтысьяс (видз-муныс уна налӧн). Вӧралан прӧмыс донтӧм: ур кусьыд сэні мынтӧны сӧмын 11 ли 12 ур (кӧп.). Скӧт век ӧтарӧ чинӧ. 1921 воӧ вӧлі коми-пермякъяслӧн кызь вит вӧлӧсьтын: 40195 вӧв, 49550 мӧс, — ӧні джынйыс абу.

Со кутшӧма олӧны коми-пермякъяс. Важӧн нин найӧ эськӧ кӧсйӧны миян коми йӧзкӧд ӧтувтчыны — ӧти республика улӧ пырны, да Перымса губерняыс мыйлакӧ жмитчӧ, оз лэдз.

А. А. Ц.