КОМИ НИГА ЛЭДЗАНІН

Коми нига лэдзанін... Ичӧтӧн олӧ, пельӧсын, пемыдын...

Коми войтырлысь Войвыв Пармаын сьылӧмсӧ, бӧрдӧмсӧ, гӧльлунсӧ, шоглунсӧ, шуштӧма олӧмсӧ, вӧтӧн моз вылӧмсӧ кылӧ.

Варыш котырӧс сэні чуксалӧ-сьылӧ: «Варышъяс, лэбачьяс, шеныштлӧй бордъяс! Пармаысь, пемыдысь туй вылӧ петкӧдӧ комиӧс!»

Лэбачьяс, варышъяс чепӧсйӧны вывлань, кыпӧдӧны том йӧзӧс, — петкӧдлӧны шонді...

Дзирдалӧ, пӧртмасьӧ зарниа югӧрнас, гажа олӧм коми йӧзлы, долыд олӧм вӧзйӧ...

Коми нига лэдзанінлы сьӧлӧмсянь шуа: ыдждӧдчы, паськӧдчы, шӧрӧ пет, чорыда сувт!

Коми войтырлысь гегдӧм сьӧлӧмъяс шонты, синъяс налысь воссьӧд, юръяс югдӧд, шонділань веськыд туй инды!

Гӧля олӧмыс, шудтӧм олӧмыс мед кольӧ бӧрӧ!

Гажтӧма олӧмыс, бӧрдӧмӧ волӧмыс мед кольӧ ылӧ!

Пыр мед гажаа,

Пыр мед долыда,

Пыр мед шудаа

Олас!

М. Молодцова.