АСКИА РЫТӦН ОТСЫШТАМӦЙ КОМИ ГИЖӦД ЛӦСЬӦДЫСЬЛЫ!

Аски рыт кутасны казьтывны Коми Издательстволысь 3 вося уджалӧмсӧ. Ме тані кӧсъя торйӧн казьтыштны сэтысь медводдза удж нуӧдысьсӧ, коми гижӧд лӧсьӧдысьсӧ. Октябрса Революция бӧрын уна пӧлӧс йӧз кыпӧдчис кок йылас. Сэки жӧ ӧткымын коми пытшкысь сувтісны, кутісны чуксасьны. Унджыкыс на, дерт, чорыда узис, эз кыв шытӧв налысь. Медгораа, медповтӧмпырысь чуксасис Василей Ӧлександрӧвич Молодцов (Сандрӧ Васьӧ). Медводдза лунсяньыс сійӧ кызмырдӧн-сорӧн, пинясигтырйи писькӧдіс тшем сьӧд парма пӧвстті коми войтырлы веськыд туй. Сійӧ 1917 восянь 1919 воӧдз пессис Яренскӧй карувса коми йӧз пытшкын. 1919 восяньыс тані Сыктывдінкарын уджаліс школаын, сы бӧрын Отд. Нар. Образованньӧ бердын Комиссияын, сэсся Нацменын (сідзи вежсяліс коми гижӧдсӧ лӧсьӧданінъясыс). 1920 воын Нацмен пыдди воссис Коми Издательство. Сэні Сандрӧ Васьӧ ёна пессис, мырсис, шойччӧг эз тӧдлы. Чукӧртіс ас дінас, велӧдіс мукӧдӧс уджавны, ачыс нӧшта водзӧ паськыдджык туй писькӧдны коми йӧзлы босьтчис. Лун и вой уджаліс, восьтіс коми том йӧзлы Институт. Быдлаын сійӧ пуӧмӧн пуис, коми йӧзӧс кыпӧдіс. Эз эськӧ весь вош сылӧн пессьӧм, мырсьӧмыс да, ассьыс дзоньвидзалунсӧ воштіс, висьмис морӧснас. Ӧні сійӧ Крымын бурдӧдчӧ. Регыд сылы куйлӧм срок воас, водзӧ вылӧ немторйӧн овны, весиг локныыс нинӧмӧн. Тані семьяыс вывті дзескыда, омӧля олӧ. Гӧгӧр мат. Сійӧн аскиа рыт вӧчӧмысь донсӧ (сьӧмсӧ) мӧдӧдам сылы, ичӧтик отсӧгтор вӧчыштам. Рыт вылас казьтыштам асьсӧ, аттьӧ шуам коми йӧз вӧсна тӧждысьӧмысла, здоровйӧсӧ сы вылӧ пуктӧмысла.

Квайт во сайын на кодсюрӧ шулісны коми войтырӧс, тшӧтш коми кывсӧ «ДУКА ШОЙӦН». Молодцов кодьясыс тай ловзьӧдісны, мичмӧдісны! Ӧні некод нин сідзи оз шу. Аскиа рытыс нӧшта ӧтчыд петкӧдлас коми кывлысь ловъялунсӧ. Кодъяс оз на эскыны (веритны) коми кыв кыптӧм вылас, налы торъя нин колӧ волыны аскиа коми рыт вылас.

К. А.