КУИМ ВОСЯ УДЖ КОМИ НИГА ЛЭДЗАНІНЛӦН

Тайӧ лунъясӧ тыри куим во Коми нига лэдзанінлы: сійӧ воссис декабр 6-ӧд лунӧ 1920 воӧ.

Ёна дзескӧдліс важ правительство коми йӧзӧс, быд ногыс мырсис пӧртны найӧс рочӧ. Комиӧн вӧлі лэдзӧны сӧмын вичко нигаяс, бурджык нига комиӧн гижны эз лэдзлывны.

Сӧвет власьт мӧд ног видзӧдліс увтыртӧм йӧз вылӧ, шуис — колӧ пӧ найӧс босьтчӧдны, велӧдны. Велӧдны позяс мед тӧдса, аслас чужан кывйӧн. Сійӧн быд сёрниа йӧзлы (комилы тшӧтш) пондіс отсавны ас кыв выланыс лэдзавны нигаяс.

Сӧмын асланым Коми муын уджалысьяслӧн кодсюрӧлӧн вежӧрныс торксьӧма вӧлі сардырся олӧмӧн: комиясӧс рочӧ пӧртан удж нуӧдісны. Сійӧн Коми нига лэдзанінлы тайӧ куим вонас отсӧг зэв омӧль вӧлі, мукӧддырйиыс дзик пӧдласьны пондывліс.

Зэв сьӧкыда, мырдӧн уджалӧмӧн позис лэдзны 40 ним коми нига (154600 экз.). Печатайтны вермытӧмла разӧдаліс грездъясӧ киӧн гижӧмӧн пьесаяс (ворсанторъяс). Чукӧртіс йӧзкостса литература: мойдъяс, сьыланкывъяс, бӧрдӧдчанкывъяс, шусянкывъяс (поговорки и пословицы), с. в.

Таво, август тӧлысьын чукӧртліс коми гижысьяслысь медводдза конференция. Сэні ёна сёрнитісны воддза удж йылысь, кыдзи водзӧ колӧ уджавны. Сэні шуисны: коми литература лӧсьӧдан удж бура оз босьтчы, кытчӧдз быдӧн оз босьтчыны коми йӧзлысь культура кыпӧдан удж вылӧ.

Ӧні сійӧ удж вылас пондісны бурджыка видзӧдны. Коми литература лӧсьӧдан удж босьтчас. Эскам — локтан куим воӧн вӧчам дас мында унджык кольӧм куим воӧн вӧчӧм дорысь!