СЕЗОННӦЙ РАБОЧӦЙЯС ОБЩЕЖИТТЬӦПЫТШСА ПРАВИЛӦЯС
1) Общежиттьӧын позьӧ овны сӧмын сійӧ рабочӧйяслы, кодъяс уджалӧны (учрежденньӧ ним). Удж вылысь петӧм рабочӧйяслы тайӧ общежиттьӧас местасӧ колӧ прӧстмӧдны удж вылысь петӧм бӧрын (вит, сизим) лун мысьт. Та йылысь найӧ сетӧны кӧсйысьӧм общежиттьӧӧ пыригӧн. Рабочӧй ассьыс кӧсйысьӧмсӧ кӧ оз пӧрт олӧмӧ, общежиттьӧысь лоӧ вӧтлӧма административнӧя олан места бокысь сеттӧг.
Оз позь овмӧдчыны общежиттьӧӧ став семьялы, уджалӧ кӧ сӧмын рабочӧйыс ачыс.
2) Сӧстӧммӧдчытӧг рабочӧйясӧс общежиттьӧӧ оз лэдзны. Та понда колӧ став кӧлуйӧн ветлыны сӧстӧммӧдчыны. Сьӧрысь колӧ босьтлыны став вылысса паськӧм.
Сӧстӧммӧдчӧм йылысь колӧ общежиттьӧса комендантлы сетны справка. Тайӧ справкатӧгыс общежиттьӧысь места оз сетсьы.
З) Общежиттьӧын оланін индалӧ комендант, сійӧ тайӧ юклӧмсӧ вӧчӧ нормаяс серти, м. н. кӧ, мед узьланінъясын быд морт вылӧ этша вылӧ воис 3,5 квадратнӧй метр ыджда местаӧн.
Став комнатаяссӧ, а комнатаясын койкаяссӧ колӧ номеруйтны. Быд комната ӧдзӧсӧ колӧ ляскыны бумага да сэтчӧ гижны, ыджыд-ӧ тайӧ комнатаыс (кымын квадратнӧй метр), кымын морт олӧ, олысьяслӧн овъяс, кутшӧм номера койкаын коді узьлӧ да.
Чорыда дугӧдны комендантлысь юасьтӧг вежлавны койкаяс, мунны ӧти комнатаысь мӧдӧ.
4) Общежиттьӧӧ воысь рабочӧйяслы колӧ вайны сьӧраныс да сетны комендантлы став эскӧданпасъяс: удж вылӧ пырӧм йылысь, сӧстӧммӧдчӧм йылысь, дзоньвидзалун йылысь да с. в.
5) Сійӧ рабочӧйлы, кодлы позьӧ пырны общежиттьӧӧ, колана эскӧданпасъяс вайӧм бӧрын, сетӧны:
а) комната, кодӧс пондасны сылы шонтыны, югдӧдны да сӧстӧммӧдны (пелькӧдны);
б) сӧстӧм торъя койка, перина да пӧдушка, кодъясӧс сюялӧма кос турунӧн либӧ идзасӧн;
в) пуӧм ва, этша вылӧ быд лун куимысь быд сменалы (уджалан кад серти, мед быть нин вӧлі пуӧм ваыс удж вылысь воигӧн).
Общежиттьӧын олӧмысь быд олысьлысь пондас кутсьыны .... шайтӧн тӧлысь, кодӧс кутӧны удждон сеталігӧн;
6) Общежиттьӧысь мунны-воны позьӧ 7 час асывсянь да 12 войӧдз. Вой шӧр бӧрын да 7 час асылӧдз общежиттьӧысь петны ни пырны оз позь. Сӧмын позьӧ налы, кодъяс воӧны удж вылысь удж помасьӧм бӧрын 1 час мысти.
Бокӧвӧй йӧзлы общежиттьӧын оз позь овны 11 час рытсянь 7 асылӧдз. Бокиса йӧзлы оз позь узьны общежиттьӧын (лун коллян ногсӧ колӧ места да удж серти, удж заводитчан да помасян кадъяс серти).
7) Общежиттьӧын колӧ овны пыр сӧстӧма да бура:
а) общежиттьӧӧ пыригӧн коктӧ колӧ чышкавны;
б) вылыс пальтотӧ, шапкатӧ оз позь видзны койка вылын, колӧ ӧшлыны тувъясӧ;
в) сундукъяс, ящикъяс да мукӧд кӧлуй оз ков видзны узьлан комнатаын, а колӧ новлыны кумӧ. Сідз жӧ узьланінын оз позь видзны дука торъяс;
г) оз позь мый сюрӧсӧ шыблавны джоджӧ да сьӧлавны;
д) оз позь узьланінъясын куритчыны, куритчигӧн колӧ петавны посводзӧ либӧ куритчан комнатаӧ. Чигарка помъяс шыблавны колӧ торъя та вылӧ вӧчӧм ящикӧ;
е) койка вылын оз позь сёйны да видзны сёянторъяс, сёян колӧ видзны шкапын, оз позь сёянтӧ пуны узьлан комнатаын;
ж) вольпась вылӧ оз позь водны кӧмӧн; асылын, чеччӧм бӧрын вольпасьтӧ колӧ бура лӧсьӧдны;
з) оз позь узьлан комнатаын весавны пальто да кӧмъяс;
и) оз позь узьлан комнатаын косьтыны песлалӧм торъяс (нямӧдъяс, дӧрӧмъяс, гачьяс да с. в.), а тайӧ уджсӧ вӧчны ывлаын либӧ тшук та вылӧ лӧсьӧдӧм местаын;
к) пывсьыны этша вылӧ быд вежонын ӧтчыд, пывсигӧн вежны улыс дӧрӧм-гач, а перина вылыс кышӧд (прӧстыня) да пӧдушка кышӧд вежлавны быд тӧлысь этша вылӧ ӧтчыд;
(Администрациялы колӧ водзвыв лӧсьӧдны песласьысьӧс да сёрнитчыны пывсян йылысь);
л) видзӧдны, медым комнатаясын сынӧдыс вӧлі сӧстӧм, колӧ ёнджыка восьсаӧн видзны ӧшиньяс, форточкаяс, душникъяс да с. в;
м) сӧстӧма видзны уборнӧйяс.
8. Общежиттьӧса комендантлы колӧ общежиттьӧ сӧстӧмлун бӧрся видзӧдны да тшӧктыны коланаинъяссӧ сӧстӧммӧдны. Комендант кутӧ кыв общежиттьӧ сӧстӧмлун понда да сылы колӧ:
а) комнатаясӧ лӧсьӧдны тырмымӧн олан кӧлуй: табуреткаяс, пызанъяс, перина кышӧдъяс, пӧдушка кышӧдъяс да, койкаяс, ва пузьӧданъяс, бакъяс, ведраяс, сьӧласян дозъяс, ёг выв ящикъяс, пальтояс ӧшлан тувъяс да;
б) медавны тырмымӧн уборщичаяс, индавны найӧс торъя комнатаясӧ да видзӧдны, кутшӧма найӧ вӧчӧны ассьыныс уджнысӧ;
в) колӧ видзӧдны, медым керкасӧ пелькӧдісны быд лун да колӧм серти: узьланінъяс, сёянінъяс, уборнӧйяс да мыссянінъяс колӧ пелькӧдны этша вылӧ куимысь быд лун.
Пелькӧдны колӧ тадзи: кӧтӧдӧм корӧсьӧн чышкавны джоджъяс, ва ротӧн чышкавны бус, восьтавлыны ӧшиньяс либӧ форточкаяс, ёг выв ящикъяс, куритчан дозъяс, сьӧласян дозъяс весавны ӧкмӧмъясысь. Уборнӧйясын джоджсӧ мыськалӧны быд лун, узьлан комнатаясын — этша вылӧ ӧтчыд быд вит лунӧ, ӧшиньяс — этша вылӧ ӧтчыд быд тӧлысь;
г) пузьӧдӧм ва бакъяс быд лун мыськалӧны да тыртӧны кӧдздӧдӧм пуӧм ваӧн.
Уборщичаяслы пыр колӧ видзӧдны, медым бакын пыр вӧлі пуӧм ва, бак водзын — кружка да колясъяс кисьтавны ведра;
д) ёг гуясысь ёг да уборнӧй гуясысь ӧкмӧмсӧ колӧ пыр новлыны, оз ков лэдзны дзикӧдз чукӧрмынысӧ.
Уборнӧйсӧ колӧ пӧраысь пӧраӧ век дезинфицируйтны хлорнӧй известкаӧн, карболкаӧн да с. в.;
е) керка гӧгӧрсӧ идравлыны этша вылӧ быд лун ӧтчыд.
9) Общежиттьӧын кӧ лоасны лудікъяс, пытшъяс, тойяс, комендантлы колӧ пырысь-пыр примитавны мераяс. Тойсяласны кӧ ӧткымынъяс — ыстывны пывсянӧ, вежны вольпасьсӧ; тойсяласны кӧ унаӧн — юӧртны санитарнӧй врачлы, медым сійӧ вӧчис дезинфекция.
10) Быд койка вылын позьӧ узьлыны сӧмын ӧти мортлы. Койкаяс коласӧ колӧ кольны 40 см ыджда колас, юръясті — 10 см, шӧрӧдыс туйсӧ колӧ кольны 130 см пасьтаӧс. Оз позь койкаяссӧ ӧтлаӧдны.
11) Общежиттьӧысь став комнатаяссӧ колӧ бура проветривайтны. Та понда, шоныд кад воӧм бӧрын унджыка пӧрасӧ ӧшиньяс колӧ видзны восьсаӧн, кӧдзыдъяс дырйи — мед этша вылӧ форточкаяс вӧлі восьтылӧма лунтырӧн куимысь да видзӧма восьсаӧн час: водӧм водзвылын, асылын чеччӧм бӧрын да лунын.
12) Медводдза отсӧг сетӧм вылӧ общежиттьӧын колӧ лоны аптечка. Гырысь общежиттьӧясын вермас лоны медпункт, а медпунктыс кӧ абу, быть колӧ лӧсьӧдны висьысьясӧс видзанін (изолятор).
13) Кодкӧ кӧ висьмас общежиттьӧын, комендантлы тайӧ висьысьсӧ колӧ водтӧдны висьысьяс керкаӧ да корны врачӧс.
14) Комнатаясын олысьяслы ас комнатасяньныс колӧ бӧрйыны уполномоченнӧйӧс, а став общежиттьӧын колӧ бӧрйыны санитарнӧй комиссия. Санитарнӧй уполномоченнӧйыс да санитарнӧй комиссия видзӧдӧны общежиттьӧ сӧстӧмлун бӧрся да кыдзи нуӧдсьӧ олӧмӧ санитарнӧй минимум.
15) Общежиттьӧын олысьяслы колӧ овны бура, немтор не жугӧдлыны, не гижавны стенъясӧ. Общежиттьӧысь немтор, кӧть и ассьыд оластӧ, комендант тшӧктытӧг нуны оз позь.
Общежиттьӧысь петігӧн колӧ став босьтлӧм торъяссӧ — койка, шкап, перина кышӧд, пӧдушка кышӧд, ӧдеялӧ да с. в. — бӧр сетны комендантлы.
16) Общежиттьӧын пыр колӧ лоны санитарно-пожарно-техническӧй журнал (контрольнӧй нига).
Комендант ордын колӧ лоны сідзжӧ и норасян нига, кытчӧ вермӧны общежиттьӧын олысьяс пасъявны ассьыныс индӧдъяснысӧ да тшӧктӧмъяснысӧ. Нигасӧ колӧ номеруйтны да ляскыны сійӧ учрежденньӧса печать, коді лӧсьӧдіс тайӧ общежиттьӧсӧ. Тайӧ учрежденньӧыслы колӧ пыр тӧдмавны да видлавны тайӧ нигаас гижалӧм индӧдъяссӧ.
Воча кывъяссӧ колӧ видзны уна вылӧ вит лун мысьт, кор тайӧ нигаас индӧдсӧ, тшӧктӧмсӧ либӧ юасьӧмсӧ вӧлі гижӧма.
17) Общежиттьӧ пытшса распӧрадок правилӧяс колӧ ӧшлыны быд комнатаӧ, тыдалана местаясӧ да тайӧс лоӧ быть пӧртны олӧмӧ тайӧ общежиттьӧса став рабочӧйяслы да служащӧйяслы. Некодлы оз позь шуны, мый ме ог тӧд тайӧ правилӧяссӧ.
Содтӧд. Общежиттьӧӧ пыригӧн быд рабочӧйлы сетӧны тӧдмасьны общежиттьӧпытшса распӧрадок правилӧясӧн да сы бӧрын босьтӧны расписка (эскӧданпас).
18) Общежиттьӧын оз позь юны сур, вина, оз позь воны гажаӧн (кодӧн), ворсны картіӧн либӧ мукӧд азартнӧй ворсанторйӧн деньгаысь, пинясьны (ёрччыны), косясьны да хулиганитны. Татшӧм мыжъяс вӧчалысьяссӧ общежиттьӧысь пырысь-пыр вотлӧны да сетӧны милиция киӧ.
19) Кодъяс оз кӧсйыны пӧртны олӧмӧ общежиттьӧпытшса распӧрадок правилӧяс, налы: медводзысь — сетӧны выговор предупрежденньӧӧн, мӧдысь — административнӧя ыстӧны общежиттьӧысь. Кодъяс веськыда торкӧны общежиттьӧпытшса олӧмлы, комендант найӧс сетӧ милиция киӧ.
