ТЮНТИКОВ КОРСЬӦ УДЖ

Управляющӧй Тюнтиков, кыдзи и век, водз локтіс удж вылӧ. Но талун зэв гудыр вӧлі сьӧлӧм вылас, быттьӧ майтӧг ньылыштлӧма. Ӧд вежон чӧж нин некод оз волывлы контораӧ. Некодлы индӧд сетавны. Фермаын уджалысьяс петісны аренда вылӧ, а механизаторъяс кырымалісны жӧ директоркӧд договор, босьтісны арендаӧ став видз-мусӧ.

Контораын мырсьысь йӧз разалісны кытчӧсюрӧ. А ӧд кутшӧм бур контора вӧлі! Видз-му вӧдитысь бригадир да сылӧн отсасьысь, фермаса бригадир да сылӧн веськыд ки, зоотехник, ветфельдшер, лаборант, механик, бухгалтер. А на вылын — управляющӧй. Дас специалист зіля веськӧдлісны кызь уджалысьӧн...

И тайӧ коллективнас дас во чӧж мудзлытӧг веськӧдліс Петр Михайлович Тюнтиков либӧ, кыдзи меліа шуисны уджалысьяс, Пермикалич.

А ӧні кодӧн мӧдас веськӧдлыны? Гӧтырнас? Да сылӧн Пеклаыс аснас сідз веськӧдлӧ — во! Мукӧддырйи не сӧмын балябӧжыд луддзас — омлявны лоӧ!

Директор абу жӧ прамӧй морт вӧлӧма: ставсӧ ыззьӧдӧ вуджны аренда вылӧ. А Тюнтиков йылысь абу и думыштлӧма. Кытысь ӧні, коді кутас быд тӧлысь сетны нёльсё шайтсӧ, кодӧс бухгалтер вӧлі вайӧ ныр улӧдз?

Видзӧдӧ Тюнтиков: лысьтысьысьяс локтӧны фермаысь, кыпыда сералӧны.

«Мый вылӧ гигзьӧны? Оз-ӧ нин ме вылын?» — скӧрмис Тюнтиков. Восьтіс ӧшиньсӧ, чукӧстіс:

— Нюра, пырав!

Пырис.

— Но мый, кутшӧмджыка уджавсьӧ управляющӧйтӧг, бригадиртӧг, зоотехниктӧг?

Анна Павловна нюмъёвтіс:

— Зэв бура! Некод, слава бог, ӧні оз индав. Асьным кӧзяйкаяс! Тӧдам, небось, кодлы мый вӧчны! Йӧв содӧ, удждон содӧ!

— Весиг лаборантысь ӧткажитчинныд...

— Асьным кужам. Мыйла миян лишнӧй йӧзыс? Ветфельдшер Люсяӧс сӧмын колим: сійӧ колӧ.

— М-да-а... Ме со тожӧ... лишнӧй, позьӧ шуны. Удж корся. Гашкӧ, пастукавны босьтанныд?

— Тэнӧ? — шензьыштіс Анна Павловна. — Он вермы дай он куж тэ пастукавнытӧ, Пермикалич. Да оз и ковны пастукъясыс: асьным видзам.

Тюнтиков мурч курччис пиньяссӧ: весиг пастукавны эз шогмы! Сэсся довгис гаражӧ. Тані механик Востриков ноксис важиник пресс-подборщик дорын.

— Сійӧс жӧ киритӧма нин, — делӧсӧ бура тӧдӧмӧн шыасис управляющӧй. — Выльсӧ эн на кыскы шӧр усадьбасьыс?

— Тайӧн на уджыштам.

— Коді нӧ пуксяс киссьӧм машина вылас? — дивӧ босьтіс Тюнтиковӧс.

— А ме и пукся.

— Вот кыдз! — дзикӧдз шемӧсмис Тюнтиков. — Механик кутас прессуйтчыны! Тайӧ мыйкӧ выльтор!

— Выльтор, — сӧгласитчис Востриков. — Аренда — збыльысь выльтор, кӧть, веськыда кӧ шуны, прамӧякодь вунӧдӧм важтор...

Чӧв олыштісны. Тюнтиковлы вӧлі юр яндзим, но век жӧ шыасис:

— Гашкӧ, босьтан менӧ, Семен, аслад бригадаӧ?

Востриков ёся видзӧдліс сылы синмас:

— Тэнӧ? А мый кужан вӧчны?

— Кыдзи «мый»? — шӧйӧвошлі Тюнтиков, но пыр жӧ скӧрмис. — Да ме дас во управляющӧйӧн уджалі!

— Миян ӧні управляющӧйыд колӧ, кыдзи вӧвлы витӧд кок. Асьным веськӧдлам!

— Но ме жӧ агроном!

— «Агроном»! Картупельсӧ сё центнерысь вылӧ некор эг босьтлӧй, а кольӧм во кӧкъямысдас центнерӧн гектар вылысь. Ведра пуктім — кыкӧс босьтім. Аслад град вылысь, небось, ведра пуктан — дасӧс ӧктан. Оз ков миян татшӧм агрономъясыд! А вот ён мужичӧйяс колӧны: чӧвтны, грузитчыны... Локтан?

Тюнтиков зэв гажтӧма видзӧдліс енэжӧ, кысянь ӧдвакӧ позис виччысьны кутшӧмкӧ отсӧг...