ЛАДМИСНЫ

Совхозса директор Лев Петрович Кукуруллев видзӧдліс йӧз вылӧ да заводитіс:

— Сёрнитыштам, депутат ёртъяс, посни сиктъяс ловзьӧдӧм йылысь. Миян районын некымын сикт, позьӧ шуны, кулӧмаӧсь нин. Со орччӧн, кык верст сайын, Мырдор грезд. Коркӧ сэн вӧлӧма быдса колхоз, а ӧні некод абу. Кольӧм во медбӧръя пӧчӧ енлы сетӧма ловсӧ. Тадзи водзӧ оз позь...

— Кутшӧм йӧй нӧ овмӧдчас эновтӧм сиктас? — юаліс том инженер Шмонев.

— Тэ, Шмонев, пукав да кывзы, — броткыштіс юралысь. Совхозса директор больгис водзӧ:

— Гашкӧ, кодкӧ кӧсйӧ овмӧдчыны Мырдорӧ? Позьӧ дзоньтавны важ керка, босьтны да быдтыны порсьясӧс, ыжъясӧс, куканьясӧс. И олӧмыс ладмас!

— Гашкӧ, тэ и заводитан? — дзикӧдз вельмис Шмонев. — Овмӧдчан сійӧ жӧ пӧчӧлӧн керкаас, босьтан совхозсьыд мӧс, порсьясӧс, а ми — тэ бӧрся.

Кукуруллевӧс скӧрмӧмысла сутшиктӧдіс. Кыдзи лысьтӧны сылы, совхозса директорлы, тшӧктыны овмӧдчыны эндӧм сиктӧ?

Сессия помасьӧм бӧрын директор муніс гортас да дыр на эз вермы лӧньны. Ирина нылыс казяліс батьыслысь скӧралӧмсӧ да юаліс:

— Мый лои, батьӧ?

— Шмонев тай, желльыд, скӧрмӧдіс!

— Кутшӧм Шмонев? Комбинатса инженер али мый?

— Сійӧ!

— Сергей, сідзкӧ, — шоныда нюмъёвтіс Ирина. Кукуруллев чуймӧмӧн видзӧдліс нылыс вылӧ:

— Сергей? Тӧдса сыкӧд?

— Тӧдса. Зэв бур зон, мича, повтӧм...

— Кывнад песны ми ставным повтӧмӧсь, а збыль вылас...

— Сійӧ и збыль вылас повтӧм! — гӧрдӧдіс чужӧмыс Ириналӧн. Сылы дум вылас уси, кыдзи Сергей коймӧдысь аддзысьлігӧн нин босьтіс сійӧс моздорас да сэтшӧм пӧся окыштіс.

— А Сергей ӧд збыльысь кӧсйӧ овмӧдчыны сиктӧ, лӧсьӧдны ассьыс овмӧс. Комбинатса цехъясын пӧ жар, лолавнытӧ нинӧмӧн. Радейта пӧ видзьяс-муяс, вӧр да ю. Но кытчӧ пӧ мунан? Эновтӧм сиктъясын ни оланін, ни ва, ни би, весиг туйыс абу!

— Ачыс мед туйсӧ вольсалӧ!..

— А карса йӧзыс асьныс стрӧитісны оланінъяссӧ да туйяссӧ?! А ми, батьӧ, асьным кыпӧдім тайӧ керкасӧ да гаражсӧ?

Лев Петрович кӧсӧйтчыліс нылыс вылӧ, но нинӧмӧн эз куж потшны. Мӧд луннас директор кабинетӧ пырис (кыдзи лысьтіс?) этійӧ желльыс, Шмонев.

— Ті, Лев Петрович, прӧститӧй менӧ тӧрытъя шуасьӧмысь. Эг тӧд, мый ті Ириналӧн бать. Дӧзми ме ёнакодь: кымын во нин больгӧны эновтӧм грездъяс ловзьӧдӧм йылысь, но дзик нинӧм оз вӧчсьы. Ме кӧсъя овмӧдчыны Мырдор сиктӧ.

— Арендаторӧн кӧсъян лоны?

— Крестьянинӧн. Му да видз босьта гектар вит кымын. Но татшӧм могӧ босьтчыны сьӧкыд лоӧ, оз кӧ отсав совхоз.

— Тайӧ збыль, — сӧгласитчис директор. — Но босьтчы, инӧ, отсалам!

Лун-мӧд мысти Кукуруллевӧс пӧсь петтӧдз шемӧсмӧдіс нылыс: ме пӧ эновтча совхозса экономистлӧн уджысь, пета верӧс сайӧ, овмӧдча Мырдорӧ да лоа крестьянкаӧн! Нинӧм эз отсав: шум ни зык, ни весиг повзьӧдлӧм. Муніс Шмоневыскӧд Мырдорӧ. Регыд пӧ свадьба, колӧкӧ, волы.

Та бӧрын ковмис пуксьыны пызан сайӧ кык ыджыд юралысьлы. Совхозса директор Кукуруллевлы да туйяс стрӧитан управлениеса веськӧдлысь Шмоневлы. Сватъяс воисны ӧти кывйӧ. Ковмас пӧ недыр кежлӧ веськӧдлыны вынъяс Мырдорлань.

Удж пузис вӧвлытӧм ӧдъясӧн! Доруправление петкӧдліс, мый сійӧ вермӧ вӧчны: куим лунӧн нюжӧдіс да вевттис асфальтӧн кык километр кузьта туй! А нёльӧд луннас сы кузя тӧвзисны автомашинаяс. Эз, дерт, тыртӧг — стрӧитчан эмбурӧн.

Эскӧй кӧть эн, а Мырдорӧ ӧти тӧлысьӧн зымӧбтісны выль керка, гид-карта да весиг пывсян. Пӧсь петтӧдз мырсисны, дерт, и Сергей да Ирина. Сватъяс пыркӧдыштісны кӧшельяснаныс да козьналісны том гозъялы код тӧдас кытысь вайӧм мебельнӧй гарнитур.

Ме неважӧн кежалі Мырдорӧ. Сергей да Ирина оз сӧмын кургыны-овны, но и зэв зіля уджалӧны. Картааныс госсялӧны ӧшъяс, гидын руксӧны порсьяс. Сергей сідз швачӧдіс менӧ корӧсьӧн выль пывсянын, мый ӧні на мышкӧй чӧсӧдӧ-зӧлитӧ. Корисны свадьба вылӧ. Ветла, дерт!