ДОНА КОЗИН

Вася Туисов дӧзмис быд лун видӧмысь да чорыда шуис: шедӧда коллективлысь пыдди пуктӧм да радейтӧм!

Медводдза выльлунӧ жӧ сійӧ зэв ёна шензьӧдіс ёртъяссӧ: удж вылӧ локтіс ас кадӧ. Стӧч кӧкъямыс часӧ босьті кӧрт тув да тувъяліс коланаинӧ. Сэсся пажынӧдз зэв зіля котшкӧдчис, весиг ни ӧти кӧрт тув эз кусыньтчы. Сӧмын нёльысь пуксьыліс куритчыны, а водзті вӧлі здук уджыштас, и бара нин шпуткӧ.

Туисов шензьӧдіс ёртъяссӧ и водзӧ. Пажын вылӧ видзис стӧч квайтымын минут. Вит час рытын пуктіс мӧлӧтсӧ. Ящикын коли на ӧти кӧрт тув, но Вася эз тувъяв сійӧс: уджалан кадыс помассис.

Вася зэв бура уджаліс тӧлысь помӧдзыс. Медбӧрын забор стрӧитсис. Чукӧртісны митинг. Начальникыс висьталіс реч. Уна бур кыв шуис и Вася Туисовлы.

— Василий Педӧрӧвич лои прамӧй уджалысьӧн, — шуис начальник. — Ми ӧні гордитчам сыӧн. Дзонь тӧлысь сійӧ мудзлытӧг тувъявліс кӧрт тувъяс, та дырйи эз кусыньт ни эз вошты ни ӧтиӧс. Быдса тӧлысь чӧж эз вӧч ни ӧти прогул, ньӧтчыдысь эз сёрмы удж вылӧ.

Йӧзыс клопайтісны ки пыдӧсъяс донавтӧдз.

— Василий Педӧрович миянлы петкӧдлӧ пример, — водзӧ сёрнитіс начальник. — Бӧръя лунъясӧ весиг ньӧтчыдысь эз пуксьыв куритчыны, а тшынасис уджалігмозыс. Тайӧ бур опытсӧ колӧ быдӧнлы босьтны!

Йӧз бара зэв дыр клопайтісны. Лӧньыштӧм бӧрын начальник кыпыда юӧртіс:

— Василий Педӧрӧвичлысь бур уджсӧ пасъям дона козинӧн!

Шуда Туисовлы сетісны шӧвк лентаӧн гаровтӧм мӧлӧт да югъялысь кӧрт тув.

— Мед мӧлӧтыд некор оз усь тэнад крепыд киясысь, Василий Педӧрӧвич, а кӧрт тувъясыд мед век вӧліны веськыдӧсь да ёсьӧсь!

Начальник куимысь окыштіс шуда мортӧс. Оркестр ворсіс туш.

Мӧд лунас Туисов эз пет удж вылӧ: пожъяліс дона козинсӧ...