ВЕЛӦДІС...

Ая-пиа Паневъяс пукалісны бипур дорын да зіля сёйисны. Помалісны шыд васӧ, нюлыштісны паньяссӧ да босьтчисны бура пӧжсьӧм госа сьӧлаясӧ. Бӧрынджык поньталісны ставсӧ чайӧн.

— У-уп! — ыджыда горзьӧдіс батьыс, малыштіс кынӧмсӧ да меліа видзӧдліс пи вылас.

— Ӧні, пиук, кывзы, да эн вунӧд, мый ме тэныд висьтала. Тэ кужан нин азыма няръявны шыд и рок, но век жӧ колӧ велӧдыштны, кыдзи уджавны паньӧн.

— Велӧд и эм, батьӧ!

— Регыд тэнӧ босьтасны Армияӧ, а сэні паньтӧ медся ёна радейтӧны. Пищальтӧ тэныд, дерт, сетасны, а паньтӧ вермасны вунӧдны. Та вӧсна мед аслад пань вӧлі. Сетасны кӧ казеннӧйӧс — нӧшта на бурджык. Чегӧ ли мый ли, шуам, паньыд азымджыка панясигад — сапӧг гӧлень костсьыд пыр жӧ мӧдӧс кыскан.

— Ладнӧ, батьӧ.

— Боевӧй обстановкаын салдатыд узьӧ, а ӧружиесӧ шымыртӧма кыкнан кинас. Паньсӧ шымыртӧмӧн этшаӧн узьӧны, кӧть дум вылас усьлӧ сійӧ куимысь-нёльысь.

— Ми, батьӧ, талун мӧдысь на сӧмын босьтлім сійӧс...

— Рытланьӧ коймӧдысь босьтлам. Но тэныд, пиӧ, колӧ велӧдчыны панясьны тшӧтш шуйга кинад.

— Мыйла, батьӧ? — чуймис пиыс.

— Колӧ, пиук. Кыдзи тэ кутан сёйны, доймас кӧ шуам, ен мед видзас, веськыд киыд, и сійӧс гипсуйтасны? Талунсянь жӧ, пиук, заводит тренируйтчыны, мед вежон мысти кужин сёянсӧ ӧвтны шуйга кинад.

— Гӧгӧрвои, батьӧ!

— Ӧти тӧлка дядьӧ шулӧма: кынмытӧдз пӧ уджалі, зато пажнайтігӧн пӧсялі. Стӧч сідз: позьӧ дышпырысь уджавны, но некор оз позь дышӧдчыны сёйигӧн.

— Ладнӧ, батьӧ!

— Но вот и бур. Кыдзи ме висьталі, сідзи и вӧч. А ӧні шойччыштам час мында и — туйӧ. Тэ лямпаасян да ю кузяыс вывлань мунан, а ме увлань. Аски пажнайтігкежлӧ татчӧ жӧ локтам.

— Гӧгӧрвои, батьӧ.

Рытнас, ужын дасьтігӧн, Панев-бать восьтіс лаз нопсӧ да шемӧсмис: паньыс эз вӧв...