* * *

Вуджӧр уси му вылӧ — 
Уси вой.
Нывлӧн горзӧм шы кылӧ:
— Ой-я-ой!..
Эз на мыччысь тӧлысь бан:
Пемыд сап...
„Дугды, йӧюк Ӧльӧксан!
Тадз эн тшап“.
Петіс тӧлысь чарлаӧн,
Эзысьӧн;
Койис ныла-зонмаӧс,
Аддзис вен.
Кабыртӧма юрси прать
Зонлӧн ки:
— Час пӧ тэнӧ, мать да мать,
Ог кӧ ви...
Ветлӧ кулак бӧр и водз,
Нывлы страк:
Лӧсьӧдӧ кулаклы содз, — 
„Ой-я... ок!“
Тӧлысь нюмдӧма оз кайт — 
Югъялӧ,
Кыдзи ӧшӧм эзысь шайт
Дзирдалӧ.
Кевмӧм нывлӧн кыліс дыр:
„Ӧлюк, лэдз...“
— „Вина ютӧг ме ог пыр 
Ни ог лэдз!...“
Кылӧ бӧрдӧм... „Эн бӧрд! Лӧнь!“ — 
Шарӧбтіс
Зонлӧн кучик тасма вӧнь...
Чалӧбтіс...
Ымзӧм... „Дыр-ӧ он тэ вай?
Босьта лов!
Эм да он сет!.. Наян тай!“ — 
Шкув да шков.
Тӧлысь бансӧ сайӧдіс — 
Шога шог.
Войся гуся кыйӧдіс
Уна ног.
Уна аддзывліс му эж — 
Уна пеж.
Кодлысь тайӧ син оз веж,
Код оз кеж?
Тайӧ овлӧ миян збыль,
Кыдзи мыль...
Дойдӧ олӧм тэчас выль — 
Коляс киль.