ПУРЙӦН КЫВТӦМ

Швач, швач, швач... — висьталӧны гребъяс пур вылын. Вына сойяс топыда кутӧны киын керйысь лӧсалӧм пелыс. Ваыс быгзьӧма, паськӧдчӧма, вылӧ кайӧма кыркӧтшӧ. Луг вылын тыдалӧны ваын сулалысь зорӧд пиньяс. Пур вылын кывтысьяслы долыд: пуксьӧмаӧсь би дорӧ, коді куритчӧ, коді тшай юӧ. Енэжсянь сотӧ тувсов шонді.

— Эжва маа-а-туш-ка, кы-лӧд ми-янӧс да... — горӧдіс кодкӧ сьывны.

Пур вывсянь йӧлаыс ва кузя юрӧбтіс зэв ылӧдз. Тайӧ пуръяясыскӧд кывтӧ Кардорӧ тшӧтш миян Ванюк. Нырд сайын тыдалӧны керкаяс — Ваньӧлӧн сиктыс; ва дорын сулалӧ Сималӧн керкаыс. Пур вывсянь тыдалӧ йӧрын муяс гӧрӧм. Со карта сай му вылас Ваньӧлӧн батьыс гӧрӧ. Сэні жӧ мӧд гӧрӧ. Коді бара... Сима али мамыс? Оз тыдав чужӧмыс, сӧмын еджыд чышъяна.

— Часлы, — Ваньӧ босьтіс гудӧк. Гажаа кутіс киссьыны „во саду ли“ ворсӧм. — Сима и эм! Со, сувтіс, бергӧдчис пуръялань да мӧдіс видзӧдны. Ваньӧ лэптіс шапкасӧ юрсьыс да шевкнитіс кинас... Йӧрсяньыс еджыд чышъян кывтыштіс сынӧдті Сима киын нёльысь. Гудӧк шыыс Ваньӧлӧн дыр юргис вавывса сынӧдын, дыр мысти сӧмын вӧйи нырд сайӧ...

Ю кузя лунысь лунӧ ва кывтчӧс люзьгӧны пуръяс. Коми йӧзлӧн тадзи кольӧ тулысыс... Вадор сиктъясын том йӧз рыт помъясын пур вылын кывтысь том йӧзлы яра ворсӧны гудӧкӧн, гажӧдӧны найӧс. Пур вывсянь кылӧ гудӧкъясӧн жӧ ворсӧм да гораа сьылӧм. Тадзи овлӧ кывтігӧн. Недыр мысти паракодъяс пристаньысь пристаньӧ колялӧны Кардорсянь локтысь пуръясьысь войтырӧс. Уна пӧлӧс гӧснечьяс тыдовтчӧны нопъясысь гортас пырӧмӧн тшӧтш: тайӧ мамлы, тайӧ Машуклы, тайӧ пиӧйлы — став семьяыслы мыйкӧ да мыйкӧ ваясны.