ТУЛЫС

Лунысь лунӧ шонді ярмӧ,
Бырӧ кымӧр енэжысь.
Ывла вылыс бара садьмӧ.
Петӧ муыс лым улысь.

Чужӧмбансӧ муыс вежӧ:
Петі кыдз пуяслӧн кор;
Кӧдзыд тӧвлӧн воши вуджӧр — 
Гӧгӧр жургӧ-мыськӧ шор.

Шоныд. Лунвывсянь локтӧны
Тури, дзодзӧг, уткаяс.
Юяс, шоръяс воссялӧны,
Ваӧн тырӧ кыркӧтшъяс.

Ывлавылыс быттьӧ нерзьӧ — 
Ставыс быдмӧ, паськалӧ.
Важ местаысь олӧм вӧрзьӧ,
Водзлань ӧдйӧ восьлалӧ.

То со челядь чукӧртчӧмны — 
Мача гуӧн ворсӧны.
То со ыжъяс котралӧны — 
Зэв перыда йирсьӧны.

Пашня вылын йӧз век содӧ,
Воис гӧран-кӧдзан кад.
Шонді югӧр муӧ водӧ...
Тулыс гажлы быдӧн рад.