ПРЕМИЯЯС МЕДБУР КОМИ ГИЖӦДЪЯС ВЫЛӦ

Мед босьтчӧдны коми гижысьясӧс удж вылӧ, колян воӧ Коми Обисполкомлӧн президиумыс шуис лӧсьӧдны быд вося фонд (500 шайт) медбур коми гижӧдъяс премируйтӧм вылӧ. Коми автономиялы 8 во тырӧм кузя Обисполкомлӧн президиум КАПП правленньӧ корӧм серти шуис сетны премияяс татшӧм коми художествоа гижӧдъяс вылӧ:

„Кулӧмдінса бунт“ пьеса вылӧ. Нёбдінса Витторлӧн. Гижӧма тайӧ пьесасӧ Кулӧмдінын 1842–43ʼ воясын вӧвлӧм бунт йылысь.

Татшӧм гижӧдыс, коді петкӧдлӧ художествоа кывйӧн коми йӧз историяын вӧвлӧмтор йылысь, ӧти. Сэсся пьесаыс пролетариат идеология боксянь туяна. Лэдзӧма 1928 воын. — Медводдза премия — 150 шайт.

„Трипан Вась“ висьт вылӧ. Гижис Тима Вень Чисталёв. Босьтӧма ыджыд висьтысь серпасторъяс (висьтсӧ кӧсйӧ гижны). Сюрӧсыс Коми обласьтын гражданскӧй война йылысь (1919 во), тшыгъялӧм йылысь. Гижӧдыс зэв художествоа, психологияа гижӧд, петкӧдлӧма коми уджалысь крестьянинӧс. Лэдзӧма 1929 воын. Мӧд премия — 110 шайт.

„Ён тыш“ повесьт вылӧ. Гижис Ичӧт Иван. (Сажин Иван Иванович). Сюрӧссӧ босьтӧма гражданскӧй война дырсяӧс, гижӧма збыльысь вӧвлӧмтор йылысь. Пролетариат идеология боксянь шогманаӧн гижӧма. Лэдзӧма 1927 воын. Мӧд премия жӧ — 110 шайт.

„Сальӧ Микулай“ кывбур вылӧ. Гижис Биа ӧгыр. (Чупров Яков Иванович). Яранъяслӧн мойдкыв. Дзик ӧти татшӧм художествоа гижӧдыс яранъяс олӧм йылысь коми кыв вылын. (Сы вӧсна и премируйтӧма). Лэдзӧма „Ордым“ журналын, 1928 вося 6ʼ №-ын. Коймӧд премия — 80 шайт.

„Семук“ („Ордым“, 1928 вося 3ʼ №), „Вын“ („Ордым“, 1928 вося 11–12ʼ №) да „Калым“ („Ордым“ 1929 вося 4ʼ №) висьтъяс вылӧ. Гижис Иливапыс (Пыстин Илля Иванович), гижны босьтысьлы. Премиясӧ сетӧма, висьтъясас сюрӧссӧ кужӧма босьтны социализм тэчан уджлы коланаӧс да (тайӧ петкӧдлӧ — Иливапыс кужӧ бӧрйыны миянлы колана сюрӧс). Нёльӧд премия — 50 шайт.^Редакция „Ордымлӧн“ корӧ лыддьысьясӧс гижны журналӧ — кыдзи налы кажитчӧны премируйтӧм гижӧдъясыс: кыті мыйӧн бур, кыті мыйӧн омӧль. Став гижӧмсӧ кутам лэдзны „Ордымӧ“. Тайӧ нумерын лэдзам критика „Кулӧмдінса бунт“ вылӧ./^