ТУВСОВ ВОЙӦ

Дышапырысь шонді лэччӧ,
Жаль пыр кольӧ тувсов лун.
Ньӧжйӧн ывлавылыс пемдӧ...
Он нин пальӧд сэки ун.
Юяс, расъяс быдӧн вевттьӧ
Улльӧв рӧма шоныд ру.
Тувсов войӧ мед жӧ шойччас
Миян муса Коми му.
Сыктыв юным ру пыр шлывгӧ
Лӧня. Абу ӧти гы.
Сён дорсянь со муртса кылӧ
Тувсов шорлӧн дзольгӧм шы.
Ставыс чӧскыд унмӧн шойччӧ,
Гӧгӧр быдлаын дзик чӧв.
Сӧмын пулысь вӧрӧдыштӧ
Корсӧ тувсов небыд тӧв.
Асывводзын шонді петӧ,
Бара садьмӧ Коми му.
Расъяс, юяс вылысь кыптӧ
Тувсов еджыд шоныд ру.