ВОМИДЗА ВИСЬӦМ

Парасковья баба варов — 
Бульгӧ-больгӧ пыр:
Медтӧ сюрас сылы кывзысь,
Висьтавлас лунтыр.
Керка пытшкӧс эз нин мыськыв
Тӧлысь куим-нёль;
Кор нӧ эштас, уджыс уна — 
Кывнас буль да боль.
Олан вежӧс ставыс тырис:
Эстӧн гыр да вор;
Тані пила, сэні пыридз,
Сэн жӧ понлӧн „шор“.
Юрсӧ сынавны оз вевъяв — 
Быттьӧ рака поз;
Чужӧм-кисӧ оз и мыськыв — 
Абу мыссян доз.
Ачыс сэсся век жӧ ойгӧ
Буля-больгигтыр:
— Мый нӧ, Марӧ, мекӧд лои:
Лёкысь лудӧ ныр.
Лудӧ синмӧй, лудӧ плешкӧй,
Лудӧ гӧгӧр яй.
Тонӧ мышкӧс кодкӧ курччис — 
Нолы гыжйышт, вай.
Тайӧ висьӧм вомдзалӧмӧн
Лёк морт сетіс мем.
Часлы, шонді пуксьӧм бӧрын
Сота шырлысь гӧн.
Оз кӧ отсав сійӧ меным — 
Пычка лягӧ вир;
Сьӧвзя сэтчӧ куим-нёльысь,
Сэсся содта сир.
Ставсӧ сійӧс пукта дозйӧ,
Дозсӧ нуа чӧв.
Карта сайын ме молитва
Лыддя уна пӧв.
Сэсся дозсӧ ки гуг швачка — 
Стенӧ сета — гым!..
Бергӧдчывтӧг гортӧ пыра,
Ог и восьтлы син.

* * *

Ме ног, Парӧ, тэныд колӧ
Кузьджык вӧсни ньӧр...
Он-ӧ перыдджыка сэки
Ас гӧгӧрыд вӧр.