«ЗВЕР»

Пӧрысь пӧльӧ паччӧр вылысь
Эз нин лэччыв дыр.
Ӧні вадор муӧ мунӧ,
Беддя, дзӧригтыр.
Сиктыс ставыс сэтчӧ мунӧ:
Бабӧй, пӧрысь, том...
Вадор мусӧ трактор гӧрӧ — 
Ветлӧ помысь-пом.
Воис пӧльӧ вадор муӧ,
Синсӧ восьтіс пош,
Бедьсӧ муас сюйис, ӧшйис,
Водзӧ чургис тош.
Тшынӧн чушкӧ, ачыс кӧртысь,
Мусӧ гӧрӧ „звер“,
Бӧрсьыс плугсӧ квайтӧс кыскӧ — 
Оз тай вӧв моз вӧр.
Эштіс гӧрӧм, трактор муніс — 
Эз тай кӧсйы дыр.
Пӧрысь пӧльӧ сэтчӧ коли,
Юрас мӧвпыс тыр.
— Со и дивӧ тайӧ лои...
Квайт вӧв пыдди удж,
Эз и шойччыв, эз и лолышт,
Вӧчис ӧти сутш.
Сідзкӧ, тайӧ „зверыд“ вермас
Кыскыны быдтор,
Мудзӧм оз и тӧдлы сійӧ,
Уджалас кӧть кор.
Татшӧм олӧм менам нэмын
Эз жӧ чайтлыв морт,
Тадзнад дыш и кувныд лои,
Оз ков меным горт.