ГУСЯЛІС, ЛИБӦ МЫЙ ВЫЙӦДЗ ВОШТЫЛӦ ВИНА ЮӦМЫД

Серга Степан чеччис узянінсьыс да кутіс тшай юны. Тшайӧдзыс босьтіс шкапсьыс роч вина да румка-мӧд нюлыштіс.

— Бурджыка, гашкӧ, юсяс да сёйсяс свежӧй чери яйыд, — вомсӧ чышкигтырйи шуис аслыс.

Горнича ӧдзӧс надзӧникӧн воссис, пырис дядьӧ.

— Видза олан, Степан Саватьевич, — полігтырйи шуыштіс дядьӧыд да видзӧдліс аслас кышӧдыс вылӧ.

— Лок жӧ, лок, Митрей дядь. Ме дінӧдз, буракӧ, — лавкаӧ локтін?

— Эг эськӧ лавкаад лок да, — шапкасӧ киас кутіс нямравны Ер Митрей.

— Висьтав вай, кутшӧм мог нин суис? Абу жӧ ӧд кутшӧмкӧ гусятор?

— Кутшӧм нӧ вермас лоны гусятор тэкӧд... Вай, Степан Саватьевич, менсьым вӧлӧс ньӧб?

— Мый... Вӧв ньӧбны! Позьӧ... Сӧмын ёна менӧ вотъяснад жмитӧны да, сьӧмнас жеба ола-а... Абу ӧні, Митрей дядь, важ кодьыд, — бокӧ сьӧлыштіс Степан да кутіс ырсйыны блюдсьыс. — Мыйла нӧ сідзи вӧвтӧ вузавны кутін?

— Кӧрымыс оз тырмы — лоас быть вузавны. Кӧсъя чань лӧсьӧдны. Кольӧм сьӧм вылас керкаӧс колӧ дзоньтыштны — вевттьыны кӧть.

— Сі-ідз, — мӧвпыштӧмӧн шуис Степан. — Позьӧ, позьӧ... Мый нӧ эськӧ тэнад кутас сулавны?

— Дон понда нинӧм тӧждысьны — ладмам!

— Ме ногӧн со кыдзи бурджык лоӧ, — пуктіс Митрей пельпом вылӧ кисӧ да кутіс висьтавны Степан. — Доннас ладмӧдчам тані, а вӧвтӧ тэ аски нуӧд базар вылӧ. Сэні и тэныд ме деньгасӧ сета. Сӧмын некодлы эн висьтав. Казяласны кӧ, сэні жӧ ӧд и воттӧ тяпкасны пӧтмӧнъяыд. Но да, ладнӧ, миянӧс он ёна кый... Менам батьӧ нэмыс оліс ньӧбӧм-вежсьӧм вылын да, некор тай эз шедлы.

Ер Митрейлӧн нюмыс петыштлас да петыштлас. Синъясыс сідзи и сёйӧны самӧвар дорсьыс роч вина сулеясӧ.

— Вай, шу инӧ, Митрей Ермилӧвич, уна-ӧ кутан корны Рыжкоыд вылӧ?

— Мый сэні донъясьнысӧ! Тэ ӧд ачыд тӧдан, кутшӧм менам вӧлыс — биа-бордъя кодь ӧд дзик. Кыксё ветымынтӧгыд ӧд ог жӧ буди сет-а.

— Сы мында?!... Эн-ӧ тӧлк вывсьыд тэ вош?.. Сы мындатӧ бара ме ог вермы сетны...

— Сідзкӧ инӧ, ветымынсӧ ӧд позьӧ шыбитны дай.

Серга Степан кутіс мӧвпавны. Бура дыр нинӧм эз шу. Сэсся босьтіс шуйга кинас Ер Митрейлысь кисӧ да веськыднас кучкис ки пыдӧсас:

— Сё ветымынӧс босьт! Сыысь уна эн и кор, ог вермы сетны.

— Сё ветымыныд этшаджык жӧ кӧ лоӧ-а...

— Тырмас. Сійӧ ӧд абу жӧ нин этша. Вай, кутчысьлы татчӧ, — шуис Серга Степан да мыччис Ер Митрейлы чашкаӧн роч вина. Ер Митрейыд уна во нин эз босьтлывлы вомас роч винатӧ да, ёна и вежыс вӧлі петӧ видлыштны. Эз дыр мӧвпав — босьтіс чашкатӧ да, пыдӧсыс сӧмын вылӧ-вылӧ качліс. Чукрасьтӧдз лои, сэтшӧм чорыд.

— Вай ладмӧдчам вӧвнад, сэки сэсся бура и липкисӧ прысьнитам.

— Ме ӧд ог жӧ любит ёна донъясьнытӧ. Сідзкӧ тэ он и содтышт сё ветымынсьыс вылӧ?

— Ог, ог вермы сэсся. Тэ ачыд мӧвпыштлы, вӧвъясыд ӧд ӧні зэв донтӧмӧсь, кытчӧ ме сійӧс вошта?

— Сё ветымын кӧ и, мед сідзи лоас. Вай ки!

Донъясьӧм бӧрын кутісны юны липки. Серга Степан пыртіс чуланысь кык сулея роч вина.

— Липкитӧ юам кыкнаннымлысь ӧтмындаӧн, — винасӧ пыртігӧн мудера шуис Серга Степан. — Аски тэ нуӧд вӧвтӧ базар вылӧ, сӧмын мед некод ас сиктса оз тӧдлы меӧн вӧвтӧ босьтӧмтӧ.

* * *

Аскинас Ер Митрей нуис Рыжкосӧ базар вылӧ да сетіс Серга Степанлы. Ер Митрейлы мошня тырыс вӧвсьыд лои сьӧмыс. Нюмъялӧмӧн ветлӧдлӧ сійӧ базар кузя, ачыс мӧвпалӧ: „Ӧні ме дзик буржуй кодь, тайӧ сьӧм вылас том вӧв лӧсьӧда да керкаӧс вевття“. Дыр котраліс базарӧд — кӧсйис ньӧбны томиник вӧв, сэсся эз сюр сылы кодьыс да, дӧзмис. „Муна да суседлысь лучшӧ ньӧба...“ — мӧвпавны кутіс ӧтнасӧн Ер Митрей.

Уна йӧз ветлӧны лавкаяс дорын, ӧтитор да мӧдтор босьталӧны. Уна дядьӧяс чукӧртчӧмаӧсь роч вина вузалан лавка дорӧ. Мукӧдыс гажаӧсь нин.

Ер Митрейлы мӧвп вылас уси тӧрытъя рытыд — Серга Степан ордын роч вина сулея сайын пукалӧмыд.

— Талун ӧд и меным аслым позьӧ босьтны гӧрд юра дозтӧ. Ӧти шайт джынтӧ кӧть и бырӧдан, нинӧм ӧні оз и тӧдчыв. Ӧд чӧлӧй сё дай ветымын шайт менам эм! Пырала.

Тэрыба, мужикъяс костӧд сюйласьӧмӧн Ер Митрей пырис вина вузавланінӧ.

— Кывзы, тӧварыш! Вай сет меным ӧти доз, — тошсӧ чургӧдӧмӧн корис розьӧдыс вузалысьыслысь.

Вузасьысьыд регыд и сетіс.

— Тайӧн пожйышта голяӧс да, кокниджык лоас гортӧ муннытӧ, — мӧвпыштіс Митрейыд петігас.

Кильчӧ вылас и джынъяліс сулеясӧ голя помсьыс. Мӧдӧдчис гортлань. Кокъяслы юыштӧмсьыс быттьӧкӧ кокниджык лои мунны.

— Лӧсьыд жӧ, ерӧмаканьыд, вӧлӧма тайӧ... Помала нин лучшӧ ставсӧ. Босьта да, улич шӧрас и куштышта помсьыс, — кыскис зепсьыс да кутіс ньылавны. Джын дорсьыс уна юис. Мӧдӧдчис гортланьыс, ачыс нюмъялыштӧ, ӧтнасӧн сёрнитӧ: — Ачым ме ӧні Митрей Ермилӧвич! Некодлӧн пӧшти миян сиктын ӧні ме мында сьӧмыс абу.

Кокъясыс Митрейлӧн асьныс нуӧны, быттьӧ бур вӧв брынӧдӧ гортланьыс. Недыр мунӧм мысти юрыс кутіс сьӧктыны. Джын туйсӧ муніс да пуксис куритчыны. Зептас сюйис кисӧ да, сулеяыд ки улас сюри сылы. Бара шпыньмуні.

— Пӧкмелля... Со тай кӧні лекарствоыс вӧлӧма, — Митрей кӧдзыд ваӧс моз жӧ кутіс помсьыс юны винатӧ, ставсӧ помаліс. Юӧм бӧрын весиг вунӧдіс и куритчӧмтӧ.

— Ӧні сэсся пуксьывтӧг гортӧдз воа.

Бара мӧдӧдчис, пӧлнясигтырйи нин, гортланьыс.

Юрыс дзикӧдз кутіс сьӧктыны, синъясыс гудырмисны, ставыс кутіс син водзас бергавны, юрыс мулань личкӧ. Кежыштіс туй бокланьыс да, коз пу понӧль дорӧ и лизгысис. Вуніс Ер Митрейлӧн вӧв вузалӧмыс, вуні и сё ветымын шайт сьӧмыс зепсьыс. Коз пу понӧль дорын кутіс кывны ныргорӧн узьӧм.

Рытыв тӧв швачкӧ ымзӧмӧн, койӧ посньыдик арся зэр, сӧмын узьысь мортыдлы веськодь. Нырнас сӧмын шкоргӧ.

* * *

Рытъявыв матыстчис. Базар вылысь йӧзыс мӧдӧдчалісны гортъясаныс. Мӧдіс и Серга Степан. Ер Митрейлысь вӧвсӧ вузаліс кыксё шайтысь, пырысьтӧм-пыр и иналіс.

Друг вӧлыс Степанлӧн ныръяссӧ кутіс вывлань лэптавны да шкоркйӧдлыны...

— Ӧ-ӧ, мый сэні дукасян! Ошъяс да кӧинъяс али мый сикт дорад локтісны!

Чеччис Серга Степан телегасьыс да кутіс видзӧдны туй бокъяссӧ. Сэсся друг аддзис мыйкӧ морт кодьӧс — котӧрӧн кежис туй вывсьыс сылань. Матыстчис узьысь дінад, копыртчис да пыр и тӧдіс Ер Митрейтӧ. Горӧдіс, тракнитіс Митрейӧс, сӧмын сійӧ оз шыась — шкоргӧ-узьӧ.

— Кытчӧ бара сьӧмсӧ воштіс-а? Часлы, ме видзӧдла зепъяссьыс, гашкӧ и кӧнкӧ матын.

Кутіс корсьысьны. Аддзис гач зепсӧ, малыштіс. Эм. Сюйис кисӧ да кыскис кӧшӧльсӧ.

— Татчӧ кӧ колян — гусяласны ещӧ сьӧмсӧ. Сьӧрысь босьта. Медым, кор садьмас, повзьылас — велалас водзӧ кежлӧ сьӧмӧн вӧдитчыны, — мӧвпыштіс Степан.

Ер Митрейӧс эз и садьмӧд. Пуксис телегаӧ да рӧдтіс гортланьыс.

— Оз пропадит, — мӧвпыштӧммоз шуис Степан да плетьӧн кучкӧмӧн вӧвсӧ ӧддзӧдіс.

* * *

Недыр мысти Ер Митрей садьмис. Юрыс зэв ёна висьӧ. Эз и мӧвпыштлы сійӧ сьӧм йывсьыд, ӧдйӧджык кутіс котӧртны гортланьыс. Воис гортӧ вой шӧр кадын нин. Некодлы эз шыасьлы — водіс паччӧр вылӧ.

Асывводзнас гӧтырыс чеччис да кутіс юасьны:

— Митрей, донысь-ӧ нӧ вузалін Рыжкотӧ?

— Сё ветымынысь!

— Зэв тай нӧ донтӧг?

— Таво ӧд абу зэв донаӧсь вӧвъясыд, оз сетны унджыксӧ.

— Мый тэ сӧран... Со тай Митит Мишлӧн кыксёысь вузалӧмаӧсь... Сылӧн нӧ миян дінын вӧв ӧмӧй — нямӧд ӧд... Кодлы нӧ эськӧ вузалінсӧ?

— Пиньӧмсалы.

Тадзи сёрнитісны гозъя, гӧтырсӧ пӧрйӧдліс Митрей. Сэсся чеччис да кӧсйӧ петкӧдлыны гӧтырыслы вӧв вузалӧмысь босьтӧм сьӧмсӧ. Ӧти зептӧ сюйліс кисӧ, мӧдӧ, коймӧдӧ — став зепсӧ гурйис, сӧмын табак кӧшӧль да истӧг кындзи нинӧм эз сюр. Митрейӧс зэв ёна шогӧдіс. Челядьыс садьмисны да кутісны батьыслысь кӧлач да кампет корны:

— Бать, батьӧ, кампеттӧ вайин эн, — юалӧ вит арӧса нывкаыс.

— Кӧячтӧ, батьӧ вай, — бӧрдігтырйи корӧ куим арӧса пиыс.

Став пӧкмелляыс чеччыштіс Ер Митрейлӧн юрсьыс. Некыдз мӧвп вылӧ оз вермы уськӧдны, кытчӧ воштіс сьӧм кӧшӧльсӧ. Чужӧм вывсьыс быдӧн вежсис повзьӧмысла. Гӧтырыс казяліс повзьӧмтӧ да юалӧ:

— Мый нӧ тэ татшӧм гажтӧм талун?

— Ланьт, Парась, тэ нинӧм он тӧд, — скӧракодь шуис воча. — Овсис, тыдалӧ, став олӧмӧй менам. — Митрей юрсӧ ӧшӧдіс пызан вылӧ да друг бӧрддзис.

— Мый нӧ, мый тэкӧд лои, — кутіс юасьны гӧтырыс.

— Овсис миян олӧмным. Вӧлӧс вузалі. Сьӧмсӧ видзны эг куж.

— Вай тэ тӧлкӧн висьтав, мый сэтшӧмыс лои, — повзьӧмӧн юаліс гӧтырыс. — Кӧні сьӧмыд?

— Воштыси! Вӧв вузалӧмсьыд сьӧмсӧ туй вылас ставсӧ вошті. Унмовсьысьӧма... Гусялісны, — нӧшта ёна бӧрддзис, гӧтырыс да челядьыс тшӧтш.

Серга Степанлы жаль лои сетны кокниа сюрӧм сьӧмтӧ Ер Митрейлы.