КЫЗЬӦД...

Дас ӧкмыс салдат, дас ӧкмыс морт
Вошины пармаа вӧрӧ.
Оз тӧдны фронтсӧ, оз тӧдны горт,
Оз кужны муннысӧ водзӧ ни бӧрӧ.
Салдатӧс муртса дзик шонӧдӧ пась,
Кианыс пищальяс эмӧсь.
Шапкаас гӧрд звезда — югъялан пас.
Сувтӧмась пармаӧ шемӧс.
Водзвылын зэв матын гӧрдъяслӧн враг,
Муннысӧ сэтчӧ оз лысьтны;
Мӧдарын морӧсӧдз лымъяс, сьӧд яг.
Пемыд вой. Мунны оз письтны.
Олісны салдатъяс вӧрын вель дыр...
Ок, эськӧ, ӧні кӧ лызьыд,
Эз волы миянлы сэки и кыр!
Пармаӧд повтӧг ми пызйим.
Рытланьыс на дорӧ локтіс выль морт,
Мудзысла лым вылӧ уси.
Оз тӧдны, код локтіс — враг али ёрт,
Бӧрвылас гӧрд ёртӧн шусис.
— Мунӧй вай нюръясӧд, кытшолӧн пыр,
Тіянлы туй сэті сюрӧ.
Гӧгӧрын еджыдъяс — врагъяс дзик тыр...
Абу жаль менам том юрӧй.
Патрон да няньтор ті кольыштӧй мем,
Тӧдмала еджыдлысь вынсӧ.
Вынйӧрӧй этша кӧть, пӧсь вирӧй эм,
Пырысь-пыр менӧ оз кынтӧд.
Сэк кості гӧрдъясӧс вайӧдӧй ті.
Пулемёт кыскӧй тшӧтш накӧд.
Эстӧні тыдалӧ неыджыд ді.
Сэтчӧ ме кысся сук ягӧд.
Дас ӧкмыс салдатыд вуджисны нюр,
Ыстісны мортыдлы отсӧг.
Кольччысьыд еджыдлы тайкӧ оз сюр...
Кынтӧма кисӧ и коксӧ.
Тӧдісны код вӧлӧм сэтшӧм збой морт,
Код локтіс мездыны найӧс:
Вӧлӧма кызьӧдыд коммунист ёрт...
Еджыдлысь юӧръяс вайис.