ВКП(б) ОБКОМЛӦН АГИТПРОП «ОРДЫМ» ЙЫЛЫСЬ

ВКП(б) Обкомса Агитпроп коллегиялӧн шуӧмыс «Ордым» редакция доклад кузя 1929 воын май 14 лунын

„Ордым“ журнал редакциялысь доклад кывзӧм мысти журналса содержанньӧыслысь пыр ӧтарӧ бурмӧмсӧ аддзӧмӧн агитколлегия индӧ:

1. Журнал босьтчӧма лэдзавны гижӧдъяссӧ унджыксӧ гижны босьтчысьяслысь; сійӧ отсалӧ тӧдмавны выль гижысьясӧс да содтыны коми гижысьяслысь лыдсӧ. Журнал зільӧ лэдзавны гижӧдъяс, кодъяс колӧны тайӧ кадъясса могъяслы овмӧс кыпӧдӧм уджын, югыдлун лэптӧмын, политика нуӧдӧмын. Тайӧ босьтӧм визьсӧ журналлысь лыддьыны веськыдӧн.

2. Журналын омӧля сувтӧдӧма художествоа литература вылӧ критика да челядь литература юкӧд.

3. Гижны босьтчысьяс уджын дай унджык коми гижысьяслӧн пӧшти абу некутшӧма зільӧм бӧрйыны асланыс гижӧдъясын социализм нога олӧмӧ коми сиктӧс вуджӧдана могъяслы колана сюрӧсъяс. Бӧръя каднас журналын эськӧ лэдзӧма вӧлі кымынкӧ посньыдик висьт, сюрӧсыс налӧн бур ӧнія олӧмлы колӧм боксянь, да сійӧ ёна этша.

4. Журналлӧн тиражыс вочасӧн содӧ (февраль-мартын 700 экз.-сянь соді 1100-ӧдз), сӧмын абу на тырмымӧн.

5. Водзӧ кежлӧ „Ордым“ редакциялы тшӧктыны.

а) Чорыда зільны журналыслысь содержанньӧсӧ дзоньнас тэчны сідзи, мед сійӧ вӧлі веськыда инмана партияса медгырысь могъясыслы политика боксянь, овмӧс боксянь, культура боксянь (индустриализация йылысь, сиктса овмӧс ӧтувтӧм, классъяс кост вермасьӧм, енлы эскӧмкӧд вермасьӧм, быт йылысь, сідзи водзӧ).

б) Ёна видзӧдлыны журналын критика кыпӧдӧм вылӧ. Критикъясас кыскыны политика боксянь да культура боксянь медбура велӧдчӧм КАПП-са шленъясӧс да газетын уджалысь коммунистъясӧс. Критикаын медъёнасӧ колӧ петкӧдлыны художествоа гижӧдыслысь ӧнія олӧмлы шогманлунсӧ да коланлунсӧ (социальная значимость произведения) да художествоа боксянь бурлунсӧ. Кадын, пырысьтӧм-пыр лэдзӧм бӧртиыс критикуйтны гырысьджык художествоа гижӧдъяс.

в) Журналын челядь литература юкӧд паськӧдӧм да бурмӧдӧм могысь кыскыны уджас тшӧтш Обоноӧс да учительясӧс. Обонолы ӧтув журнал редакциякӧд вӧчны торъя уджъяс учительясӧс челядь литература лӧсьӧдӧмӧ кыскӧм йылысь.

г) Ӧнія дорысь ёнджыка гижны журналын КАПП удж йылысь, РАПП да Войвыв крайса пролетариат нога гижысьяс ассоциациялысь уджалӧмсӧ, роч литература йылысь.

д) Тшӧктыны „Югыд туй“ газет редакциялы гижны газетӧ рецензия „Ордым“ быд номер вылӧ, лэдзӧм мыстиыс.

6. Попов ёртӧс велӧдчыны лэдзӧм вӧсна ответственнӧй редакторӧн журналӧ индыны Н. Ӧ. Шаковӧс.