* * *

Шонді зарниӧн ывласӧ койӧ,
Эшкын вольсасьӧ му вылын веж.
Лун тӧв арся ёг пӧльыштӧ войӧ,
Лун тӧв ышмӧма челядь моз — кеж!
Вуджӧр му выльысь ытваӧн муніс,
Некӧн шондіысь он аддзы сай;
Ӧзйӧ, ломтысьӧ бипурйӧн луныс,
Ловзьӧ, дзордзалӧ гӧрд плагӧн май.
Енэж кылӧдӧ кымӧр медбӧръя,
Помтӧм саридз моз лӧзалӧ, сӧдз.
Садьмис, вундалӧ эжа вуж гӧръя — 
Кӧдз жӧ, кад буретш, выль олӧм кӧдз!
Зыксьӧ, гыалӧ сынӧдын майлӧн — 
Гажа тулыслӧн ловзьӧдан гор.
Кыськӧ гож сайысь звӧн шы тӧв вайлӧ,
Бӧръя бӧрдӧм шы тувсов гаж сор.
Тулыс югӧрӧн пемыдсӧ сёйӧ,
Вежӧ олӧмлысь сьӧдасьӧм эж.
Лун тӧв арся ёг пӧльыштӧ войӧ,
Лун тӧв ышмӧма челядь моз — кеж!..