КОМИ МУӦЙ

Коми культуралы паныд мунысьяс усьласьӧм вылӧ

Коми муӧй, шудтӧм муӧй,
Дыр-ӧ кутан терпитны?
Омӧль йӧзлӧн чорыд сьӧлӧм
Дыр-ӧ вермас нартитны?
Важ олӧмыд, тшыгъялӧмыд
Ёна тэнӧ кӧрлӧма;
Сьӧкыд чептӧн тэнсьыд ловтӧ
Чорыда зэв дорлӧма.
Вир юысьыд озыръяскӧд
Узянінад вӧлӧма,
Лэчыд пуртӧн, кеслӧм шыӧн
Бытшкӧма тэд сьӧлӧмад.
Сьӧкыд чепъяс, ловлысь тюрма
Кыдзи кутан пазӧдны?
Ассьыд шогтӧ, помтӧм шогтӧ
Кытчӧ пондан разӧдны?
Велӧдчӧм йӧз тэнӧ пыдди
Оз и кӧсйы пуктыны;
Сійӧ отсӧг сетӧм пыдди
Кӧсйӧ вомтӧ тупкыны.
Ӧні тэнӧ кытшовтӧмась,
Оз и лэдзны лолыштны.
Нем яндысьтӧг тэныд синмад
Видзӧдӧны сьӧлыштны.
Тӧдан он тэ, шудтӧм йӧзӧй,
Ассьыд водзи олӧмтӧ;
Гашкӧ, лёк йӧз нетшыштасны
Тэнсьыд зарни сьӧлӧмтӧ.
Гашкӧ, лёк йӧз тэнсьыд виртӧ
Вина пыдди юасны,
Али ловтӧ куйӧд пыдди
Тэнсьыд муӧ сюясны...
Оз ло сідзи!.. Петас выль йӧз —
Дойтӧ тэнсьыд бурдӧдас.
Ёнмас том йӧз — коми йӧзӧс
Выль туй вылӧ сувтӧдас.
Коми йӧзӧй, шудтӧм йӧзӧй,
Дыр на кутан терпитны?
Тэнад тырмас вын-эбӧсыд
Выль олӧмӧ веритны!