ТӦДМАСЬӦМ

Музыкальнӧй сценкалӧн либретто

Тувсов рыт. Ныв-зонлӧн гажӧдчанін. Неылын посньыдик пуяс пӧвстті тыдалӧ колхознӧй сикт. Веськыдвылын ляпкыдіник танцевальнӧй площадка. Локтӧны зонъяс. Илья гудӧкалӧ. Мукӧдыс сьылӧны.

Кӧть и муса зонлы дзоридз,

Кӧть и вайлывлӧ букет,

Кӧть и сьӧлӧм абу чорыд,

Мулы эжмыны оз сет.

Тувсов гӧра-кӧдза дырйи

Оз и лӧньлы трактор гор.

Кӧть нин кык пӧв норма тыри —

Зонлы век на абу сёр.

Арын ветлӧ муяс дорті,

Ассьыс радлунсӧ оз дзеб.

Настроенньӧсӧ оз портит

Дженьыд уска шобді шеп.

Йыв оз лӧгась, кӧть оз сюр сэсь

Дзик ни ӧти василёк.

Ныв оз гажтӧмчы, кӧть юрсӧ

Оз кут мичмӧдны венок.

Локтӧны нывъяс да сьылӧны.

Тувсов шондіыс оз шонты,

Вунӧдас кӧ милӧй другыд;

Забеднӧсьыс сьӧлӧм ёнтӧ,

Лун шӧр луныс абу югыд.

Вунӧдны кӧ вунӧд тӧвнас,

Дой мед омӧльджыка кылас;

Шогыс, гашкӧ, водзджык тӧрмас,

Тӧвся лымкӧд, гашкӧ, сылас.

Тулысын кӧ пышъян нылысь —

Кык зэв ыджыд мыж тэ вӧчан:

Пӧсьлун гусялан том вирлысь,

Том зон чесьттӧ няйтӧ лэдзан.

Тувсов шондіыс оз шонты,

Вунӧдас кӧ милӧй другыд;

Забеднӧсьыс сьӧлӧм ёнтӧ,

Лун шӧр луныс абу югыд.

ЛЮБА.

Нора сьыланкыв ми сьылам,

Быттьӧ шогным збыльысь матын,

Быттьӧ шуда олӧм-вылӧм

Ӧнӧдз век на абу татӧн.

Радейтӧ кӧ зонмыд збыльысь,

Сійӧ, майбырӧй, оз пышйы;

Локтас, мед кӧть кутшӧм ылысь...

ЛЕНА.

Оз кӧ мӧд ныв вылӧ ышты.

(Нывъяс да зонъяс сералӧны.)

ЛЮБА.

Оз су тэнӧ тайӧ рӧкыс,

Оз корсь мӧдӧс Илья другыд.

ЛЕНА.

Висьтав, мый нӧ сэні лёкыс?

ИЛЬЯ.

Вой шӧр войын миян югыд.

ЛЮБА.

Лёкыс нинӧм абу сэні,

Сӧмын шуд да ыджыд радӧсьт.

ИЛЬЯ (Леналы).

Сідзкӧ, весьшӧрӧ эн шенась;

Бурджык, окышт, дінад матыст.

ЛЕНА.

Ручӧс лэдзан порог дорӧ,

Сійӧ каяс паччӧр вылад.

ИЛЬЯ.

Коді ылӧг ручысь полӧ,

Мед оз ветлы ылі вӧрӧд.

Он кӧ муса зонлы эскы,

Бурджык эновт, дзикӧдз вунӧд.

Юмов ма кӧ абу чӧскыд,

Быть мӧй колӧ сійӧс юны?

Гудӧкалӧ да сьылӧ. Сыкӧд тшӧтш сьылӧны зонъяс. Нывъяс налы отсалӧны.

Шондібанӧй олӧм!

Сьывны, ворсны корӧ,

Гажӧдчыны,

Колльӧдчыны,

Дышӧс, горшӧс серавны.

Уджалам да шойччам

Тані пыр ми орччӧн.

Сёрмӧдчысьлы,

Дышӧдчысьлы

Сьӧкыд ставӧс пӧръявны.

Дышӧдчысьлы,

Сёрмӧдчысьлы

Сьӧкыд ставӧс пӧръявны.

Бурджыка кӧ гӧран,

Этшаджык кӧ сӧран —

Шонді вылӧ,

Счастье вылӧ

Онджык понды элясьны.

Шонді вылӧ,

Счастье вылӧ

Онджык понды элясьны.

Шондібанӧй олӧм!

Уджавны тшӧтш корӧ.

Зільыштан кӧ —

Вӧччыштан тэ,

Арын позяс гӧтрасьны.

Зільыштан кӧ —

Вӧччыштан тэ,

Арын позяс гӧтрасьны.

ЛЮБА.

Кутшӧм гажа талун ывла!

Кутшӧм лӧсьыд сьӧлӧм вылын!

ИЛЬЯ.

Век сідз овлӧ дзик быд нывлӧн,

Муса друг кӧ абу ылын.

ЛЮБА.

Кутшӧм мича рытъя кыа!

Кутшӧм чӧскыд рытъя сынӧд!

ЛЕНА.

Друглысь воӧм сьӧлӧм кылӧ —

Он на, кӧнкӧ, сійӧс ылӧд.

ИЛЬЯ.

Тайӧ ньӧти абу дивӧ,

Степан асывнас на воис.

Люба шай-пай усьӧ.

ЛЕНА.

Пӧръясьнытӧ абу зывӧк!

ЛЮБА (аслыс).

Мый Степанушкокӧд лоис?

ИЛЬЯ.

Пӧръясьысьӧн ме эг чужлы.

Сӧвесьт ключ ваысь на сӧстӧм.

ЛЮБА.

Чайтны татшӧмтор эг кужлы.

ЛЕНА.

Мыйла эз лок татчӧ?

ИЛЬЯ.

Гӧсьт эм.

ЛЮБА.

Кутшӧм гӧсьт нӧ?

ЛЕНА да НЫВЪЯС.

Кутшӧм гӧсьт нӧ?

НЫВЪЯС.

Ёна пӧрысь?

ЛЕНА.

Висьтав честнӧ!

ИЛЬЯ.

Кыдз нӧ ылӧдчыны позяс?

Абу пӧрысь, абу тошка.

(Леналы.) Тэысь мичаджык на лоас.

ЛЕНА.

Сідзкӧ, гӧстя?!

ИЛЬЯ.

Да.

ЛЕНА.

Водз ошкан.

Видзӧдлам, кор татчӧ воас.

ИЛЬЯ.

Ме кӧть ачым и эг аддзыв,

Висьталіс мен Анна тьӧтка.

ЛЕНА.

Кыдз Степанлы абу яндзим?!

Эз и волы.

ЛЮБА.

Абу ӧтнас...

НЫВЪЯС.

Сылы некор. Ставыс вуні:

Сиктса дружба, зонъяс, нывъяс.

ЛЮБА.

Збыль мӧй шудӧс кужис гуны

Карса акань мелі кывнас? (Бӧрдӧ.)

НЫВЪЯС (жалитӧмӧн).

Збыль мӧй шудтӧ кужис гуны

Карса акань мелі кывнас?

ЗОНЪЯС (Любаӧс кытшовтӧмӧн сьылӧны).

Сиктын оліс ныв,

Зонмӧс радейтіс.

Кытчӧдз лым эз сыв,

Век на надейтчис.

Воис тувсов кад,

Лым ва визувтіс.

Вадор кырйыв сад

Ставнас вежӧдіс.

Муса зон эз лок,

Йылӧс ылӧдіс.

Югыд шудсӧ шог

Нывлысь кылӧдіс.

ЛЮБА.

Ог, ог эскы! Абу збыльысь!

Тайӧ вӧт. (Ильялы.) Ильюша, садьмӧд!

(Бӧрдігтыр пышйӧ.)

ИЛЬЯ.

Висьтала кӧть ставсӧ выльысь...

ЛЕНА.

Сійӧн нинӧм нин он ладмӧд.

(Вӧтчӧ Люба бӧрся.)

Илья нора ворсӧ. Нывъяс сьылӧны. Зонъяс кытсюрӧ отсалӧны.

Турун юр дорын ме узи,

Гожся шондіысь водз чеччи.

Ог тӧд: гашкӧ, лысва усис,

Гашкӧ, синва менам лэччис.

Уна югыд посни войтъяс

Дзирдалісны кыа рӧмӧн.

Ыджыд зорӧд дорын ёртъяс;

Наысь бокын ӧтнам сӧмын.

Сэн жӧ накӧд милӧй другӧй

Век на узьӧ чӧскыд унмӧн.

Код нӧ шудӧс менсьым дзугӧ?

Мӧд ног эськӧ эз жӧ вунӧд.

Уджалігӧн мелі важ моз,

Дінас корӧ турун чӧвтны.

Рытнас нывъяс дорӧ гажмас,

Синсӧ ме вылӧ оз чӧвтлы.

Ог тӧд: радейтӧ ли оз ли...

Ог тӧд: лысва али синва...

Ог тӧд: ӧні сёр ли водз ли...

Ог тӧд: пӧсяла ли кынма...

Локтӧ Павла.

ПАВЛА.

Чолӧм, нывъяс!

НЫВЪЯС.

Чолӧм!

ЗОНЪЯС.

Чолӧм.

ПАВЛА.

Кутшӧм нора сьыланкывйыд!

НЫВЪЯС.

Код нӧ тайӧ? Кӧні олӧ?

ИЛЬЯ.

Код нӧ ті да кыдзи нимныд?

ПАВЛА.

Кузнецова Павла. Вои

Зоотехник пыдди татчӧ.

НЫВЪЯС.

Сідзкӧ, тӧдам. (Сералігтыр пышйӧны.)

ПАВЛА.

Мый нӧ лои?

ИЛЬЯ.

Олышт, тӧдмась — ачыд аддзан!

(Гудӧкасигтыр мунӧ.)

Зонъяс уповод видзӧдӧны Павла вылӧ, сэсся меліа сьылӧны.

Эн шогсьы тэ весьшӧрӧ, нылӧй,

Ӧд йӧз костын ӧтнад он ло.

Кӧть мам-батьӧс колин и ылӧ,

Дзик пикӧ тан некор он во.

Ми, ковмас кӧ, отсалам уджын,

Тэ аддзан, со кымын том ки...

Он тӧдлы ни шогсьӧм ни мудзӧм.

Оз куслы тан дружбалӧн би.

1-ой ЗОН.

Мӧдім, гуляйтыштам микӧд.

ПАВЛА.

Мунӧ ветлӧй. Гашкӧ, бӧрас...

2-ӧд ЗОН.

Эн жӧ лӧгась сӧмын дзикӧдз.

ПАВЛА.

Ог. Ме локта.

1-ой ЗОН (серамӧн).

Но эн пӧръясь.

(Зонъяс мунӧны.)

ПАВЛА.

Мыйла татшӧмӧсь тан нывъяс?

Некод тӧдмасьны оз кӧсйы.

Морт мен сьӧлӧмсянь эз кывлысь,

Дружба ассяньыс эз вӧзйы.

(Сьылӧ.) Эн пов, эн пов, тэ абу ӧтнад,

Ӧд матын тэнад милӧй друг,

Тэ жмитлан сійӧс морӧс бердад,

И туй пом некор оз ло дзуг.

Кӧть кор, кӧть кытӧн лоан шуда,

Любовь кӧ сьӧлӧм пиын эм.

Кор киӧд ӧта-мӧдтӧ кутан,

Он тӧдлы, кыдзи коляс нэм.

Со регыд кусас рытъя кыа,

И локтас тэнад муса зон.

Со сылӧн кок шыыс нин кылӧ.

Эн пов — защита тэнад ён.

Локтӧ Степан.

СТЕПАН.

Мыйла, Павлуш, ӧтнад тані?

Некодӧс мӧй эн на аддзыв?

Йӧзыд миян сиктын шаньӧсь.

Тӧдмасин нин?

ПАВЛА.

Шуны яндзим.

Дзик на некодкӧд эг тӧдмась.

Отсав, отсавны кӧ кужан.

СТЕПАН.

Ставыс ас кадӧ. Эн тэрмась.

Тэрмасигӧн ӧдйӧ мудзан.

ПАВЛА.

Тэныд вечнӧ ставыс серам.

СТЕПАН.

Бӧрдныс нинӧмысь на ӧні.

ПАВЛА.

Висьтав, Стёпа, тэнад сьӧлӧм

Тыра кодӧнкӧ тан вӧлі?

СТЕПАН.

Мый тэ, Павла? Мыйла тэныд

Татшӧм мӧвпыс юрад воис?

ПАВЛА.

Али паметьыд зэв дженьыд?

СТЕПАН.

Сӧмын тэкӧд шуда лои.

Тэӧдз некодӧс эг радейт.

ПАВЛА.

Сідз ли?

СТЕПАН.

Гашкӧ, серам могысь...

ПАВЛА.

Серам могысь? Ыджыд аттьӧ!

СТЕПАН.

Мый нӧ эськӧ сыысь лёкыс?

ПАВЛА.

Ме ог тӧд, а сьӧлӧм вылын

Абу лӧсьыд.

СТЕПАН.

Меным эскы.

Тэнӧ радейта. (Окалӧ.)

ПАВЛА.

Тэ кылан?

СТЕПАН.

Гажӧдчыны. (Окалӧ.) Кутшӧм чӧскыд!

ПАВЛА.

Ветлам?

СТЕПАН.

Ветлам. (Мунӧны.)

Локтӧ Анна.

АННА.

Бара эг су. Ук-ты! (Пуксьӧ.)

Дзикӧдз лолӧй тырис.

(Видзӧдлӧ ас вылас.)

Кытчӧ воштан тайӧ тшӧгсӧ?

Кытчӧ пельклун, мичлун бырис?

Локтӧ старик-колхозник Капин Ефрем. Сійӧ неуна гажа. Киас гудӧк. Капин ворсӧ да сьылӧ.

Мича нылӧс радейті,

Ме сы вылӧ надейтчи.

Мича нылӧс окалі.

Лӧгаліс кӧ, шогалі.

Пӧръясис кӧ, лёкалі.

Кытчӧ бара кольӧма

Менам том кад олӧмӧй?

Мыйла бара пӧръясьлін?

Мыйла бара пӧрысьмин?

Мыйла бара пӧрысьмин.

Менам мича нылӧй? .

Мыйла бара пӧрысьман,

Кытчӧ томлун бырӧ?

АННА да КАПИН.

Мыйла бара пӧрысьман,

Кытчӧ томлун бырӧ?

КАПИН. Тэ?

АННА. Ме.

КАПИН. Вот кыдз! Эк-ма! Но петкӧдла жӧ ме тэныд гаж. (Пуксьӧ да заводитӧ ворсны йӧктантор.) Нолтӧ, видзӧдлам, коді кодӧс венас. Э-эк!

АННА. Ак, вот кыдз! Видзӧдлам. (Лӧсьӧдчӧ йӧктыны.) Но, но, пелькджыка!

Капин ворсӧ ӧдйӧджык. Анна йӧктӧ. Недыр мысти локтӧ Капинлӧн гӧтырыс — Парасковья Капина. Анна да Капин асланыс тэрмасьӧмла оз казявны сійӧс.

КАПИН.

Э-эк! Ок тэ, менам сьӧлӧмшӧр, сьӧлӧмшӧр,

Ӧдйӧджык вай муса кокольяснад вӧр.

АННА.

И-ик! Ок тэ, менам сьӧлӧмшӧр, сьӧлӧмшӧр,

Ӧдйӧджык вай зарни кекольяснад вӧр.

КАПИН да АННА.

Ок тэ, менам сьӧлӧмшӧр, сьӧлӧмшӧр,

Ӧдйӧджык вай муса кокольяснад вӧр,

Ӧдйӧджык вай зарни кекольяснад вӧр.

ПАРАСКОВЬЯ. Тайӧ нӧ нин мый татшӧмыс?!

КАПИН (пыр жӧ дугдӧ ворсны. Повзьӧмӧн). Мыжа, мусаӧй, мыжа.

АННА. Уп! Кыдзи мудзи! Но и пӧрысь чӧрт жӧ тэнад верӧсыд, Парасковья Петровна.

ПАРАСКОВЬЯ. Аттьӧ! (Верӧсыслы.) Мӧдім!

КАПИН Гашкӧ, гажӧдчыштан, йӧктыштан?

ПАРАСКОВЬЯ. Ещӧ мый шуан?!

КАПИН (дыша чеччӧ да гораа сьылігтыр мунӧ).

Кытчӧ бара кольӧма

Менам том кад олӧмӧй?

Мыйла бара пӧрысьмин, менам мича нылӧй?

Мыйла бара пӧрысьман, кытчӧ томлун вошӧ?

Сы бӧрся вӧтчӧ Парасковья.

Недыр мысти локтӧ Илья, гудӧктӧм. Ылын кылӧ гажа гудӧк шы.

ИЛЬЯ (дивуйтчӧмӧн).

Анна тьӧтка?!

АННА.

Дивӧ тэныд?

ИЛЬЯ.

Локтін гажӧдчыны татчӧ?

АННА.

Том кад гожся вой кодь дженьыд —

Кыдзи кольӧ, он и аддзыв.

Ас шуд вӧсна ог нин шогсьы,

Тэныд отсалыштны кӧсъя.

ИЛЬЯ.

Вот кыдз?

АННА.

Шудыд мед оз ёгсьы,

Лӧп эн чукӧрт.

ИЛЬЯ.

Мый тэ вӧзъян?

Висьтав бура, мый тэн колӧ?

АННА.

Няйтсӧ, буссӧ пыркнит коксьыд.

(Илья видзӧдлӧ кок вылас да пыркӧдыштӧ.)

Тэнад счастье тэнӧ корӧ,

Нюммун, кыпӧд юр, эн шогсьы.

ИЛЬЯ.

Вывті аслыссяма сёрни.

Мый тэн колӧ? Тӧлкӧн висьтав.

АННА.

Тэрмась, муса пи, эн сёрмы.

Люба прӧстмис...

ИЛЬЯ.

Кыдз тэ лысьтан?!

АННА.

Стёпа выль пӧдруга дорын.

Люба, кыдзи бордтӧм пӧтка.

Ӧні ас саяд кӧ коран,

Оз нин, майбыр, тэнӧ йӧткы.

ИЛЬЯ.

Кыдз нӧ Лена?

АННА.

Корсяс мӧдӧс.

Люба кодьӧс аддзан шоча.

Лена мича, но дыш рӧдысь.

ИЛЬЯ.

Ио и ведьма жӧ тэ, тётя! (Мунӧ.)

АННА.

Мый нӧ тайӧ морыс шуис?!

Кыдзи лысьтіс?! Но и медым.

Вир кӧ быд пустякысь пуис,

Важӧн ковмис кувны меным.

Локтӧ Капин. Сы бӧрся Парасковья. Сійӧ кутӧ Капинӧс. Мӧдыс оз кывзы.

ПАРАСКОВЬЯ. Кад нин гортӧ. Нинӧм тэныд тані вӧчны.

КАПИН. Удита на. Лэдз! Эн мешайт! (Гудӧкалӧ да сьылӧ.)

Кыркӧтш йылын паськыд коз,

Паськыд коз,

Эжва вомӧн джуджыд пос.

Джуджыд пос.

Кыркӧтш йылын олӧ ныв,

Олӧ ныв.

Сылӧн варов мелі кыв,

Мелі кыв.

Быд рыт нывлӧн зарни ки,

Зарни ки

Ӧзтӧ сиктын уна би,

Уна би.

Сійӧн воис быттьӧ лун,

Югыд лун.

Сійӧн менам вошӧ ун,

Вошӧ ун.

Сійӧн нылысь бырӧ гаж,

Бырӧ гаж.

Тайӧ висьӧмыс зэв важ,

Зэв нин важ.

Радейта ме джуджыд пос,

Джуджыд пос.

Муса меным паськыд коз,

Паськыд коз.

ПАРАСКОВЬЯ. Эн тешитчы йӧз водзас. Эн янӧд ассьыд Любуштӧ.

КАПИН. Мыйӧн? Ог ӧд гусясь. Ог ӧд тышкась. Сьылӧмысь да гажӧдчӧмысь нинӧмла яндысьны.

АННА. Парасковья Петровна, менам мог эм ті дорӧ. Илья миян любитчӧма тіян Люба вылӧ да тшӧктіс сёрнитны тіянкӧд.

ПАРАСКОВЬЯ. Мый могысь?

АННА. Гӧтрасьны кӧсйӧ. Оз-ӧ пӧ сетны Любасӧ сы сайӧ.

ПАРАСКОВЬЯ. Люба ачыс тӧдӧ, код сайӧ петны, код дорӧ сылӧн сьӧлӧмыс кыссьӧ. Илья дорӧ кӧ, мед нӧ и петас сы сайӧ.

КАПИН. Мый?! Оз ло сідзи! Степан сылӧн жӧникыс, Степан сайӧ и петас. Кывсьӧ, воӧма пӧ нин.

АННА. Воис да эз ӧтнас.

КАПИН. Мый тэ сійӧн кӧсъян висьтавны?

АННА. Невестасӧ сьӧрсьыс вайис.

КАПИН. Ерунда!

АННА. Видзӧдлӧй, со локтӧны. Аддзанныд со кутшӧм, юсь кодь мича нылыс. Вежас мӧй нӧ тіян Люба вылӧ?

Капин да Парасковья видзӧдлӧны локтысьяс вылӧ да вешйӧны бокӧ явӧ сы могысь мед не паныдасьны.

Локтӧны Степан да Павла. Степанлӧн киас гудӧк.

ПАВЛА.

Стёпа, мыйла вӧчан тадзи?

СТЕПАН.

Мед оз серавны. Ме ӧні

Абу кага.

АННА (радпырысь).

Вӧлись аддзи!

СТЕПАН.

Анна тьӧтка!

АННА.

Чолӧм, жӧник!

СТЕПАН.

Мый тэн колӧ?

АННА.

Поздравляйта.

Шуда олӧм тіян лоас.

Регыд гижсянныд, ме чайта?

СТЕПАН.

Сэтшӧм кад, дерт, коркӧ воас.

АННА.

Мыйла коркӧ? Колӧ пыр жӧ.

Шудыд визув ва кодь вильыш,

Тэрмась сӧвны выльджык пыжӧ,

Мед не повны джуджыд йирысь.

СТЕПАН.

Аттьӧ, Анна тьӧтка, тэныд.

Збыльысь сідзи ставсӧ вӧча.

Локтӧны Илья, Лена, Люба, нывъяс да зонъяс.

ЛЕНА (Степанлы).

Гудӧк кӧлыс тэныд дженьыд.

А Ильюшлы артмӧ стӧча.

(Босьтӧ гудӧксӧ да сетӧ Ильялы.)

Илья гажаа ворсӧ частушкаяс. Лена, Люба, нывъяс да зонъяс сьылӧны.

ЛЕНА да ЛЮБА.

Муса зонмӧй, сьӧлӧмшӧрӧй,

Кӧн тэ ветлан лун и вой?

Шогла косьми, ӧдва дзора,

Ва ог ю ни нянь ог сёй.

1-ой ЗОН.

Весьшӧрӧ тэ шогсян, нылӧй,

Ме ӧд лёк вылӧ эг мун.

2-ӧд ЗОН.

Регыд пукся трактор вылӧ,

Кута гӧрны паськыд му.

ЛЕНА да ЛЮБА.

Гӧрны, агсавны да кӧдзны,

Муса другӧй, абу лёк.

Сӧмын дыр кӧ кутан жӧдзны,

Тыртас тэнӧ турун ёг.

1-ой ЗОН.

Тэрмасьӧмысь абу пӧльза,

Турун ёгысь ме ог пов.

2-ӧд ЗОН.

Паськыд туй ме аслым корся,

Векньыд пурысь мен оз ков.

ЛЕНА да ЛЮБА.

Гӧрны, агсавны да кӧдзны —

Вот кӧн тэнад паськыд туй.

ЗОНЪЯС.

Выль пӧдругаяс оз лэдзны.

НЫВЪЯС.

Тайӧ некытчӧ оз туй.

ЛЕНА да ЛЮБА.

Кытчӧ ассьыд сӧвесьт воштін?

Кодлы вузалін любов?

Нылӧс пӧръялін да косьтін,

Тадзи оз жӧ вӧлі ков.

1-ой ЗОН.

Абу параяс ми ӧні,

Карта вылын тэнад удж.

2-ӧд ЗОН.

Кутшӧм нӧ ме тэныд жӧник,

Сёрнитны кӧ тэ он куж.

ЛЕНА да ЛЮБА.

Зэриг ывлавылӧ петан,

Вывсьыд кос места он корсь.

Ёна тшӧгӧлявны мӧдан,

Босьтас серам вылӧ порсь.

1-й ЗОН.

Поланныд кӧ зэра кадысь,

Петны ывлаӧ оз ков.

2-ӧд ЗОН.

Некодысь ме тан ог яндысь,

Некод серамысь ог пов.

ЛЕНА да ЛЮБА.

Прӧщайт, сідзкӧ, вӧвлӧм другӧй!

Лёкӧн казьтывны эн лысьт.

ЗОНЪЯС.

Ог тӧд, кӧні менам шудӧй.

НЫВЪЯС.

Киад вӧлі, эн кӧ кисьт.

Петӧ йӧз дорӧ Капин гӧтырыскӧд. Капин гудӧкалӧ да сьылӧ. Сыкӧд тшӧтш сьылӧны нывъяс да зонъяс.

Висьтав, зарни нылӧй, мыйысь шогсян талун?

Мыйла тэ он серав, мыйла тэ он сьыв?

Оз мӧй тэнӧ гажӧд шумыс тувсов валӧн?

Он мӧй, муса нылӧй, гудӧк шысӧ кыв?

Гашкӧ, кодкӧ висьмис: бать ли, вок ли, мам ли?

Гашкӧ, коньӧр, воштін мича новлантор?

Пом нин, гашкӧ, воис тэнад том ныв сямлы?

Оз-ӧ тэнсьыд синтӧ тувсов шонді ёр?

Гашкӧ, тэнӧ жӧник пӧръяліс да колис?

Верӧс сайӧ петны ас кадӧ эз сюр?

Збыль кӧ тайӧ тадзи, аддзысяс на дорйысь,

Эновт ассьыд шогтӧ, эн на ӧшӧд юр.

Сьылігкості Парасковья некымынысь мыйкӧ вашкӧдіс Любалы пеляс.

ЗОНЪЯС да НЫВЪЯС. Браво! Браво! Браво Капин дядьлы!

КАПИН (вежливӧя кланяйтчӧ ставныслы. Презрительнӧя видзӧдлӧ Степан да Павла вылӧ, сэсся крута бергӧдчӧ мунны). Гажӧдчӧй, том йӧз! Миянлы пӧра и гортӧ.

Капин гозъя мунӧны. Анна чепӧсйылӧ на бӧрся, но бӧр косӧ. Илья заводитӧ гудӧкавны йӧктантор.

ЛЕНА (йӧктӧ да сьылӧ).

Эмтээсын уна трактор ӧні эм.

Сӧмын налӧн зыкыс кок шыӧс оз вен.

Кылас, локтас татчӧ менам тракторист.

Сійӧ некор менӧ вунӧдны оз лысьт.

(Йӧктӧ Павла водзын.)

Эй, пӧдруженька, эн жалит ассьыд кок.

Кок шытӧ кӧ оз кыв, мусукыд оз лок.

Али менсьым трактористӧс мырддян тэ?

Сідз кӧ вӧчан, кута ёрны тэнӧ ме.

ПАВЛА (йӧктігмоз.)

Аслым мусукӧс ме бӧрйыны эг куж.

Чайтлі, мусукасьӧм абу колан удж.

ЛЕНА.

Ой, пӧдруженька, эн мырддьы менсьым шуд,

Менам мусукӧйлысь сьӧлӧмсӧ эн кут.

ЛЕНА да ПАВЛА.

Эмтээсын уна трактор ӧні эм.

Сӧмын налӧн зыкыс кок шыӧс оз вен.

Кылас, локтас татчӧ менам тракторист.

Сійӧ некор менӧ вунӧдны оз лысьт.

Нывъяс нӧшта уповод йӧктӧны. Кымын водзӧ, сымын тэрмасьӧмӧн ворсӧ Илья. Люба мунӧ. Илья казялӧ сылысь мунӧмсӧ да синъяснас корӧ ас дорас Степанӧс. Сетӧ сылы гудӧксӧ. Ачыс вӧтчӧ Люба бӧрся. Мунӧ тшӧтш и Анна. Степан ворсӧ, но Лена дугдӧ йӧктӧмысь. Павла йӧктӧ ӧтнас. Корӧ йӧктыны нывъясӧс, но некод оз пет сылы паныд. Лена локтӧ Степан дорӧ да китырнас босьтӧ юрсисӧ. Степан доймӧмысла дугдӧ ворсны. Нывъяс сералігтыр мунӧны. На бӧрся вӧтчӧны и зонъяс.

ПАВЛА (локтӧ Степан да Лена дорӧ).

Важӧн нин ме тадз эг йӧктыв!

Пӧсьӧй шорӧн вылысь киссьӧ.

(Леналы.) Кыдзи нимыд?

ЛЕНА.

Лена.

ПАВЛА.

Ӧтвыв

Нӧйтам тайӧ гармонистсӧ.

СТЕПАН.

Кутшӧм мыжысь?

ЛЕНА.

Мыйла нӧйтны?

ПАВЛА.

Медым пӧръясьӧмысь дугдас.

ЛЕНА.

Гашкӧ, бурджык ваӧ вӧйтны?

СТЕПАН (серамӧн).

Караул! Спаситӧй, другъяс! (Пышйӧ.)

ЛЕНА.

Миысь он на пышйы ылӧ!

Тэныд дорйысьӧс не корсьны.

ПАВЛА.

Эз-ӧ тэнӧ сійӧ ылӧд?

ЛЕНА.

Сьӧлӧм сы вӧсна оз косьмы.

ПАВЛА.

Мый ті костын вӧлі?

ЛЕНА.

Нинӧм.

ПАВЛА.

И эн радейтчылӧй?

ЛЕНА.

Эгӧй.

ПАВЛА (радпырысь).

Вот и шогӧй менам чинӧ!

ЛЕНА (нерӧ).

Вот и содӧ менам лӧгӧй.

(Кӧсйӧ мунны.)

ПАВЛА.

Мыйла сідзи? Кытчӧ пышъян?

Висьтав, мыйысь петӧ лӧгыд?

ЛЕНА.

Синва пиын уна чышъян

Лоас Любушкалӧн регыд.

Зонмӧс, жӧникӧс моз виччис,

Чайтіс, верӧс сайӧ босьтас.

Вошӧ нывлӧн том бур мичыс,

Ассьыс мусуксӧ кӧ воштас.

Кыдзи кымӧр тупкӧ шонді,

Сідз жӧ Стёпуксӧ тэ сайин.

Кӧть и муса, оз нин шонты,

Он ӧд пӧсяв кӧдзыд чайӧн.

ПАВЛА.

Некор мӧвпыштны эг кужлы,

Мый ме омӧль мортӧн воа.

Чайті, дружба оз и куслы,

Тані шуда мортӧн лоа.

(Сьылӧ.) Кӧн тэ, менам шудӧй,

Кытчӧ меысь пышйин?

Эз-ӧ тэнӧ сайӧд джуджыд пемыд вӧр?

Эз-ӧ тэнӧ чашйы

Скӧрмӧм ош ёсь гыжйӧн?

Эз-ӧ тэнӧ ньӧзьдӧд шоныд тувсов зэр?

Шудӧй менам, шудӧй,

Ӧтнамлы мен гажтӧм,

Ловъя кӧ да кылан, ме дорӧ бӧр лок.

Вӧч, мед менӧ лёкӧн

Некод дзик эз казьтыв,

Мед мен быд морт лоис, кыдзи бур чой-вок.

ЛЕНА.

Ёна радейтан тэ сійӧс?

ПАВЛА.

Кыдз тэн шуны... Ог тӧд бура.

ЛЕНА.

Сідзкӧ, мыйла ӧшъян сьывъяс?

Тэныд сытӧг бурджык сюрас.

ПАВЛА.

Ло пӧдругаӧн мен. Кывзы:

Шуд ог кут ме торкны йӧзлысь.

Стёпук босьтас ассьыс нывсӧ.

Сӧмын отсавны мен кӧсйысь.

ЛЕНА.

Кыдзи гӧгӧрвоны тэнӧ?

ПАВЛА.

Сыкӧд регыд на ме тодса,

Сьӧлӧм эз на йӧрмы пленӧ,

Туй любовлӧн абу пӧдса.

ЛЕНА.

Эска, кутшӧм отсӧг колӧ?

ПАВЛА.

Ставсӧ Любалы тэ висьтав.

Мед оз лӧгав, медым олӧм

Сылӧн дзоридзалӧ, кисьмӧ.

Локтӧ Степан.

СТЕПАН.

Павла, мӧдім гортӧ. Дӧзми

Ковтӧм тешитчӧмысь.

ЛЕНА.

Яндзим?

СТЕПАН.

Кутшӧм делӧ меӧдз йӧзлы?

Мый мен колӧ, тӧда ачым.

Аски гижсьӧм бӧрын свадьба.

Код мый лысьтас меным шуны?!

Шонді петтӧдз на ми садьмам,

Шуд мед миянлысь оз гуны.

ЛЕНА (иронизируйтӧ).

Коді корсьӧ ассьыс шудсӧ,

Сійӧ нюжмасьны оз удит.

СТЕПАН.

Дзикӧдз вунӧдан и мудзтӧ

Дінад матысмас кӧ шудыд,

Тэрмась, Павлуш, мӧдім гортӧ,

Нинӧм сэсся тані вӧчны.

ПАВЛА.

Менам вӧвлӧм муса ёртӧй,

Менӧ тэ дорӧ оз лэдзны.

СТЕПАН.

Коді кутны тэнӧ лысьтӧ?

Гашкӧ, Лена али мукӧд?

ПАВЛА.

Оз мӧй сӧвесьтыд тэн висьтав?

ЛЕНА.

Ставсӧ эн на жӧ ӧд вунӧд.

СТЕПАН.

Мый нӧ тэкӧд, Павлуш, лои?

Збыль мӧй Леналы тэ эскан?

ЛЕНА.

Кор ме пӧръясьысяс вои?

ПАВЛА.

Мӧдысь тэ дорӧ ог веськав.

Тэнсьыд кывзі, тэнсьыд эски,

Тэнӧ сьӧлӧм пытшкӧ босьті,

Чайті, сэні оз ло дзескыд,

Тэнӧ некод тан оз вошты.

Дружба дружбаӧн мед коляс,

Юкны миян тэкӧд нинӧм.

Сӧмын ме вылӧ эн норась,

Мун бӧр аслад Люба дінӧ.

СТЕПАН.

Мый нӧ тайӧ? Мыйла менӧ

Тадзи лэптан серам вылӧ?

ПАВЛА.

Верит, ог ме радейт тэнӧ.

Весьшӧрӧ эн мучит нылӧс.

Мун да бура извинитчы.

Прӧститас кӧ, кисӧ окав.

Месянь нинӧмтор эн виччысь.

ЛЕНА.

Павла вылӧ тэ эн лёкав.

Локтӧны Люба да Илья. Сувтӧны бокӧ, некодӧс быттьӧ оз казявны, Лена кӧсйӧ шыасьны, но Степан ӧлӧдӧ сійӧс.

ЛЮБА.

Мый нӧ тэн, Ильюша, колӧ?

Мыйла меысь тэ он кольччы?

ИЛЬЯ.

Воас меным шуда олӧм,

Тэ кӧ мекӧд лоан орччӧн.

ЛЮБА.

Сьӧлӧмшӧрӧй, Илья другӧй,

Мыйла та дыра эн висьтась?

(кисӧ пуктӧ Ильялы пельпом вылас. )

Лена да Степан ӧттшӧтш кӧсйӧны горӧдны, но Павла найӧс кутӧ.

ИЛЬЯ.

Лена вӧлі ставсӧ дзугӧ.

ЛЮБА.

Код нӧ мешайтчыны лысьтас!

ИЛЬЯ.

Донаӧй тэ, менӧ окышт.

Вайлы коскӧдыд ме кутла.

ЛЮБА.

Ок, Ильюша, кутшӧм шогыс.

Йӧймин талун?

ИЛЬЯ.

Ыджыд шудла.

ЛЮБА (йӧткӧ Ильяӧс ас дорсьыс).

И он яндысь ньӧти меысь?

Кӧн нӧ тэнад зонпу чесьтыд?

Чайтан, кӧнкӧ, нывъяс йӧйӧсь,

Муса налы мелі лесьтыд?

Лена ставсӧ кутас тӧдны.

ИЛЬЯ.

Он жӧ висьтав?! (Аддзӧ Ленаӧс.)

Вот несчастье!

ЛЕНА (матыстчӧмӧн).

Ыджыд горшӧн сьӧкыд пӧтны.

Менӧ эновтны нин дась тэ?

ИЛЬЯ.

Мый тэ, Лена? Кыдз нӧ позяс!

Ставыс тайӧ вӧлі шутка.

ЛЕНА.

Код нӧ мыжтӧг тадзи повзяс?

ИЛЬЯ.

Ӧні ме, кыдз лыйӧм утка.

Муса Ленук...

ЛЕНА.

Ланьт, эн пӧръясь.

Бурджык, гудӧкнад вай ворсышт.

ИЛЬЯ.

Кывзы...

ЛЕНА.

Удита на бӧрас.

ИЛЬЯ.

Мыжтӧг мыжа!

ЛЕНА.

Мед эн горшась.

Илья пуксьӧ да гудӧкалӧ нориник вальс. Нывъяс да зонъяс ӧти-мӧд бӧрся локтӧны да заводитӧны танцуйтны.

ЛЮБА (Леналы).

Тэ кӧть ме вылӧ эн дӧзмы.

Илья дэльӧдчигмоз вӧчис:

Медым серам вӧлі йӧзлы,

Да Степанлӧн нырыс лэччис.

ЛЕНА.

Мый тэ! Ог жӧ. Регыд бырас

Тэнад шогыд. Павла йӧткис

Тэнсьыд Степуктӧ бӧр.

ЛЮБА.

Збыльысь?!

ЛЕНА да ПАВЛА.

Збыльысь.

ПАВЛА.

Сідзи сьӧлӧм тшӧктіс.

СТЕПАН (матыстчӧмӧн).

Нывъяс, сёр нин, пӧра гортӧ.

ЛЕНА.

Ми тай йӧктыштны на кӧсъям.

Лена да Павла йӧктӧны вальс.

СТЕПАН (Любалы).

Прӧстит менӧ. Ло кӧть ёртӧн.

ЛЮБА.

Аттьӧ, мый кӧть тайӧс вӧзъян.

СТЕПАН.

Мыжа ме тэ водзын ёна.

Сьӧкыд эскыны, дерт, ӧні.

Сӧмын, гашкӧ, важсьыс дона

Тэнад радейтӧмыд меным.

ЛЮБА.

Каитчыны, зонмӧй, сёр нин.

Эй, Ильюша, русскӧй ворс вай!

ИЛЬЯ (Степанлы).

Аддза, другӧй, весиг дзормин.

СТЕПАН.

А тэ сьӧд, дзик пывсян гор сай.

Степан кӧсйӧ мунны. Нывъяс кутӧны сійӧс. Илья гудӧкалӧ русскӧй. Нывъяс да зонъяс йӧктӧны. Степан йӧктігтыр полӧмӧн сибӧдчӧ Люба дорӧ. Люба некымынысь пышйӧ сыысь, но бӧрвылас заводитӧ йӧктыны сылы паныд, тыдалӧ, мый оз нин ёна лӧгав, кӧть сьӧлӧмыс эз на бурась.

ПОМ