ЗЭВ ВОСЬСӦН ВИСЬТАСЬӦМА
Важсӧ бур ногӧн казьтылан «Туялан туйӧд: велӧдчӧм» небӧг дасьтӧма коми кыв туялысь Евгений Александрович Цыпанов, филологияса доктор, профессор. Лэдзӧма ас сьӧм вылас, абу ыджыд лыдӧн. Сӧмын 100 экземплярӧн. Но коми профессорлӧн тайӧ петасыс коми кыв да литература туялӧмын зэв тӧдчана.
Е. А. Цыпанов ассьыс казьтылӧмсӧ заводитӧ зэв восьсӧн висьтасьӧмӧн: мортыд чужӧма кадсьыс водз. Кор Майя Николаевна (авторлӧн мамыс) нӧбасьӧма, ода-кора 15 лунӧ Визинын чардалӧма-гымалӧма, керкаас пырӧма восьса ӧшиньӧдыс кытш сяма гымньӧв, керкасӧ абу сотӧма, бӧр петӧма, но том мамӧс весьӧпӧртмӧн повзьӧдӧма, та вӧсна кагаыс чужӧма кадсьыс водзджык, висьлӧсӧн.
Небӧгын тадз жӧ восьсӧн гижӧма Цыпанов Йӧлгиньлӧн ичӧтдырся вояс йывсьыс, Визин школаын велӧдчӧм, Сыктывкарса университетӧ пырӧм да сэні кыв туялан уджӧ сибӧдчӧм йывсьыс. Торъя ыджыд ин вичмӧдӧ автор Эстонияса Тарту карын аспирантура вояссӧ серпасалӧмлы.
Лыддьысьысьлӧн син водзас киноын моз петкӧдчӧ коми профессорлӧн быдман-сӧвман туйыс.
И тайӧ висьтасьӧмыс — абу сӧмын Цыпанов Йӧлгиньлы инана. Тані серпасалӧма миян олӧмысь бӧръя нэм джынсӧ, Сӧвет власьт кадся олӧмсӧ да талунъя лунӧ воӧмсӧ.
Аслас небӧгын автор сьӧлӧм пырыс лэдзӧма сиктын чужӧм мортлысь аскылӧмсӧ юрсиктса школаын велӧдчигас, карса университетын студенталігас, эст муӧ ветлігас сэтчӧс культураӧн тӧдмасигас.
Уна бур кыв гижысь вичмӧдӧ уджвывса ыджыдджык ёртъясыслы, кодъяс сьӧлӧмсяньныс отсалӧмаӧсь водзмӧстчысь том мортлы нырччыны радейтана чужан кыв туялӧмас. На лыдын Г. Г. Бараксанов, В. А. Ляшев, А. Н. Ракин, А. И. Туркин.
Лыддьысьысь аддзас казьтылан небӧг лист бокъясысь уна тӧдса ним, на пиын: удмурт кыв туялысьяс В. К. Кельмаков, Р. Ш. Насибуллин, Д. А. Яшин, мари кыв туялысьяс И. Г. Иванов, А. Н. Куклин, А. С. Ефремов, Л. П. Васикова, Г. Н. Валитов, мордва Д. В. Цыганкин, Ю. С. Юфкин, Н. А. Агафонова, карелъяс: Г. М. Керт, М. И. Муллонен, И. И. Муллонен, Эстонияса профессоръяс Пауль Аристэ, Пауль Алвре, Эдвард Вяари, Аго Кюннап, Тыну Сейлентхаль, Тиит Кукк.
Торйӧн шоныда автор казьтылӧ Пауль Аристэӧс, коді вӧчис унатор, медым роч муса финн-йӧгра вожъясысь Цыпанов Йӧлгинь кодь ныв-пиян вермисны быдмыны чужан кыв туялысьясӧдз.
Ассьыс казьтылан небӧгсӧ автор тӧдӧмӧн гижӧ комиӧн, Е. А. Цыпанов веськыда шуӧ: позьӧ важвылӧм йылысь гижны и комиӧн, абу быть рочӧн!
Коми лыддьысьлы коми олӧм йылысь медбур гижны ас чужан кывйӧн, а оз рочӧн, кыдзи векджык вӧчӧны.
Тайӧ небӧгас автор пыртӧ уна выль кыв, кодӧс ачыс лӧсьӧдӧма-мӧвпыштӧма.
