МАТЯШ КОРОЛЬ ДА КИНЖИ ПААЛ

Ӧтчыд Матяш король вӧраліс Баконь вӧръясын. Вывті жар вӧлі да, корольыдлӧн горшыс ёна косьмис. А сэні неылын манастыр вӧлӧма, сэтчӧ сійӧ и кежис горшсӧ веськӧдны. Корис Матяшыд манакъясӧс юктӧдны ваӧн. А манакъясыд тӧдісны корольтӧ да вайисны сылы эзысь кубокын чӧскыд вина ва пыдди. Но кор мыччисны вӧв вылын пукалысь корольлы блюд вылын винасӧ, корольыд эз весиг инмӧдчыв кубок дінас. Абу пӧ сійӧ кӧдзыд, юны пӧ оз позь.

А сэк кості восьса мельнича ӧдзӧс пыр тайӧ сёрнисӧ кыліс Кинижи Паал, коді вӧлі дзоньталӧ изки. Сійӧ чепӧсйис, гумовтіс юысь ва да тэрыба мӧдӧдчис вӧла морт дінӧ. Кор Палко кутіс матыстчыны, манакъясыд скӧрысь кутісны броткыны:

— Но и пеж жӧ тэ морт: блюд вылын ӧд колӧ мыччынысӧ!

Кинижыд бӧр уськӧдчис уджаланінас, босьтіс изки, сы вылӧ пуктіс ва дозсӧ дай сідзи и петіс король водзӧ. Матяшыдлы сьӧлӧм вылас воис ён зонмыд. Корольыд юис васӧ, аттьӧаліс зонмӧс, а сэсся корис сійӧс служитны аслас войскаас. Меным пӧ колӧны татшӧм ён багатыръясыд турокъяскӧд тышкасьны. Тадзи и веськаліс Кинижи Паал служитны корольлӧн войскаӧ.