АПОСТОЛ

— Кытчӧ, Павел? — «Войтыръяслы
Выль кыв енлысь висьтавны».
— Кокъяссьыд вир петӧ... Часлы,
Колӧ тэныд шойччыны.
— Оз ков; муна войтыръяслы
Выль кыв енлысь висьтавны.

— Кытчӧ, Павел? — «Йӧзлы шуны:
Мортлы морт мед лоас вок!»
— Кӧсъян ритор ним тась нуны?
Академияӧ лок.
— Оз ков; муна йӧзлы шуны:
Мортлы морт мед лоас вок!

— Кытчӧ, Павел? — «Грездъясланьӧ
Нуа бур кыв; йӧз сэн бур...»
— Туй вылад бандитъяс... Шань-ӧ?
Эськӧ тигр вылӧ м’оз сюр...
— Ог тӧд; муна грездъясланьӧ,
Нуа бур кыв; йӧз сэн бур...

— Кытчӧ, Павел? — «Каръяс шӧрӧ
Веськӧдавны сьӧлӧмъяс».
— Карса мичаа пыр сӧрӧ,
Веськыд мортӧс сералас...
— Ог тӧд; муна каръяс шӧрӧ
Веськӧдавны сьӧлӧмъяс.

— Кытчӧ, Павел? — «Гӧльяс дінӧ
Шуны: ыджыд ӧти ен!»
— На паныд, тэ арталін-ӧ?
Вынаясӧс лэптан сэн.
— Ог кыв; муна гӧльяс дінӧ
Шуны: ыджыд ӧти ен!

— Кытчӧ, Павел? — «Полысь вокъяс
Такӧдӧмӧс корӧны».
— Чӧв! Да асьтӧ арлыд, шогъяс
Эз ӧмӧй на жугӧдны?
— Ог кыв; муна — полысь вокъяс
Такӧдӧмӧс корӧны.

— Кытчӧ, Павел? — «Войтыр рамӧсь,
Панъяс горшӧсь! — горӧктны».
— Войтыр ки тыр фимиамысь
Авгуръяслы сетасны.
— Римӧ муна: Войтыр рамӧсь,
Панъяс горшӧсь! — горӧктны.

— Кытчӧ, Павел? — «Судӧ; сэтчӧ
Колӧ пыртны веськыдлун».
— Сёрнит небыда сэн, сетчы,
Мед зэв мыждӧмӧн он мун.
— Ог ме чуклясь судын; сэтчӧ
Колӧ пыртны веськыдлун.

— Кытчӧ, Павел? — «Дзор юр нуны
Плака вылӧ лоис мем».
— Повзьышт; тэныд рам кыв шуны,
Нюжӧдасны зарни нэм.
— Сідзи сиӧм: дзор юр нуны
Плака вылӧ лоис мем.

— Кытчӧ? — «Ойбыртны мем райын
Менам сьӧкыд удж серти».
— Йӧзӧс велӧдін тэ тайӧн
Овны-й кувны кыдз. Прӧсти!
— Муна ойбыртны ме райын
Менам сьӧкыд удж серти.