АВГУСТЫН

Ворсысьяс:

Костромин Михаил Васильевич, совхоз юкӧнӧн веськӧдлысь

Мальцев Василий Иванович, юкӧнса механик

Логинов Сергей, тракторист

Логинова Рая, Сергейлӧн гӧтыр, бригадир

Столля баб

Совхоз юкӧнлӧн контора. Пызан, улӧсъяс, телефон. Управляющӧй сёрнитӧ телефон пыр.

КОСТРОМИН. Гӧгӧрвои. Талун жӧ босьтчам. Логиновлысь звеносӧ сувтӧдам. Гӧгӧрвои, Михаил Кузьмич. (Пуктӧ телефон трубкасӧ, чышкалӧ пӧсьсӧ.)

Пырӧ Рая.

РАЯ. Видза оланныд, Михаил Васильевич!

КОСТРОМИН. Чолӧм, Раиса! Кыдзи олам-вылам? Быдтысян? Оз на котрав багатырыд?

РАЯ. Ӧдйӧ тай кӧсъянныд. Мед эськӧ вит тӧлысьӧн и котӧртіс?

КОСТРОМИН. Кывлан тай, радио пырыд быд лун висьталӧны: ускоренньӧ пӧ колӧ. Сідзкӧ, тэ питӧ вай ӧдйӧ жӧ быдты.

РАЯ. Сідз эськӧ колӧ да, Михаил Васильевич! (Сералӧны.)

КОСТРОМИН. Мог суис, Раюш, али сідз, гажыд быри да?

РАЯ. Могӧн. Зэв збыльысь. Норасьны локті.

КОСТРОМИН. Код вылӧ кӧ?

РАЯ. Мужик вылӧ.

КОСТРОМИН. Аддзӧмыд тай код вылӧ норасьнытӧ! Быдӧнлӧн кӧ эськӧ татшӧм мужик вӧлі. Передӧвик! Почёт пӧв вылын портретыс.

РАЯ (сы ног жӧ). Вот, вот. Оз ю, деньга вайӧ. Мый сэсся колӧ. А меным татшӧм мужикыд... (Бергӧдчӧ ӧшиньлань.)

КОСТРОМИН. Мый тэ, Раюк? Ышмӧмыд кӧ бур верӧс дорад-а. Этштӧ он тӧд. Кутшӧм нӧ сэсся тэныд колӧ?

РАЯ. Тайӧ пӧдрада уджнад дзикӧдз тшыксис. Тулыссяньыс нин гортысь эг аддзыв. Пи быдмӧ да батьсӧ оз тӧд, кутшӧм пӧ и эм, сюра али сера. А водзджыксӧ... Вӧлі удж вывсьыд локтас да дзоридз вайӧ. И горт гӧгӧрын отсасяс-вӧчас. И рытнас телевизор дорад ӧтлаын пукыштам. А ӧні? (Скӧра.) Воас гортӧ, сёйыштас да кыв шутӧг шнёпкысяс-водас узьны. И стынитӧ асылӧдз.

КОСТРОМИН. Но ӧні ӧд пӧдрада уджнад унджык жӧ вайӧ?!

РАЯ. Сьӧмтӧ эськӧ вайӧ. Сӧмын тай олӧмыд оз сӧмын сьӧмӧн артассьы. Рытнас кӧть мед кагасӧ видзыштіс.

КОСТРОМИН. Но шань, шань, Рая. Регыд нин кызвын уджыс помасяс и прӧстмас.

РАЯ. Шойччан лун кӧть сетлӧй.

КОСТРОМИН. Некор, Раюк, некор. Дзик ӧні директор звӧнитліс, картупель нин тшӧктӧ идравны. Мыйӧн эштӧдчам, сэк Сергейтӧ отпускӧ лэдзла. А сідзсӧ, Рая, ме ог гӧгӧрво, мыйла верӧс вылад элясян. Ачыд тай век жӧ удж вылас ӧзъян, удж понда висян, а Сергейыд ӧд сэтшӧм жӧ.

РАЯ. Став олӧмсӧ сьӧм вылӧ кутіс вуджӧдны. Скӧр лои. Менӧ и кагасӧ вунӧдіс.

Кылӧ кага бӧрддзӧм.

РАЯ. Ой, садьмис. Ме котӧрӧн. Ӧшинь улад коляскаӧс коли.

Рая петӧ. Недыр мысти пырӧны Сергей да Мальцев. Чолӧмасьӧны да пуксьӧны.

КОСТРОМИН. Вот мый, ёртъяс. Картупель идралан техникаыд дась?

МАЛЬЦЕВ. Дась.

Рая бӧр пырӧ да чӧла пуксьӧ улӧс вылӧ.

КОСТРОМИН. Но, сідзкӧ, нинӧм и нюжӧдчыны. Ӧні мунӧй да нӧшта видзӧдлӧй ставсӧ. Тэ, Сергей, петкӧд звенотӧ Паськыд ыбӧ картупель идравны.

СЕРГЕЙ. Картупель идравны? Август шӧрнас? Тэ нӧ мый, Михаил Васильевич, вывті на водз. Ӧні картупельыс медся бура быдмӧ.

КОСТРОМИН. Сергей, тэ, быттьӧ тӧлысь вылысь усьӧм морт. Ӧнія картупельыс ӧд меддона сдайтнысӧ. Выгӧдаыс ыджыдджык.

СЕРГЕЙ. Кодлы выгӧдаыс? Меным? Али тэныд? Ӧні кӧ ме картупельсӧ кера, центнер лыдыс чинӧ. Вежон колӧ на быдтыштны. Август шӧрын ме картупель идравны ог мӧд.

КОСТРОМИН. Мый тэ ыръянитан? Колян во тайӧ кадас жӧ заводитім. Али вунӧдін?

СЕРГЕЙ. Колян во кыдз шуинныд, сідзи и вӧчи. А таво ме ачым кыв кута. Бӧрыннас мӧданныд артавны: кымын центнер картупель босьтіс Логинов? Этша. Сідзкӧ, омӧля уджалӧма. Та вӧсна ме идравны ог на кӧсйы. Мукӧд йӧйясӧс корсьӧй. Ичӧтикасӧ татӧн эмышт жӧ (индӧ юрас). Тайӧ ӧти-кӧ. А мӧд-кӧ, некутшӧм выль комбайн ме ас му вылӧ ог лэдз. Вот тадз.

КОСТРОМИН (кыпӧдчӧ улӧс вывсьыс). Кутшӧм сэтшӧм выль комбайн? Миян юкӧнлы некутшӧм выль машина эз сетлыны.

СЕРГЕЙ. Со тай ачыс, изобретательыс. (Индӧ Мальцев вылӧ.)

КОСТРОМИН. Но?! (Чуймӧмӧн видзӧдӧ Мальцев вылӧ.)

МАЛЬЦЕВ. Да, Михаил Васильевич, ме лӧсьӧді ӧтитор. Важ комбайнас вӧчи сэтшӧм содтӧд, отсалӧ картупельсьыс торйӧдлыны му глызаяссӧ да изъяссӧ. Сэки комбайн вылас этшаджык йӧз ковмас. Вот ме и вӧчи. Ӧні сӧмын уджын видлыны колӧ.

СЕРГЕЙ. Ме дорӧ сирассис. Вай, шуӧ, видлам, мый артмис.

МАЛЬЦЕВ. А мый нӧ.

СЕРГЕЙ. Ме нин шуи. Некутшӧм машина ме му вылӧ ог лэдз. Колӧкӧ, джын картупельсӧ мӧдас кольны муас либӧ нырны. Мукӧд йӧйясӧс корсьӧ.

КОСТРОМИН. Тэ, Сергей, ёнасӧ эн ыръянит. Колӧ видзӧдлыны машинасӧ. Гашкӧ и бура уджалӧ.

МАЛЬЦЕВ. Ме тай сідз жӧ шуа.

СЕРГЕЙ. Ме пӧдрад серти уджала. Татшӧм сёрниыс эз вӧв. И нинӧмла меным сійӧс кӧвъявны. Вот тадз. (Кыскӧ папирос да ӧзтӧ.)

РАЯ. Сергей, тадз ӧд он жӧ сёрнит.

СЕРГЕЙ. А мый, ме абу прав?

РАЯ. Абу. (Ньӧжйӧник.) А коді нӧ эськӧ комбайнсӧ видлас уджас? Мортыс выльтор мӧвпыштӧма, рытъяснас вӧчӧма. Мед сиктса йӧзыслы кокньӧдны уджсӧ. Совхозлы экономия. А тэ му вылӧ он кӧсйы лэдзны? (Гораа.) Кӧзяин! Ставӧн кӧ татшӧм лоӧны? Некод кӧ оз лэдз? Тэ ног мед Нёрымӧ дядьӧ уджас выльсӧ пыртӧ?

СЕРГЕЙ. Ме — пӧдрад вылын. Та йылысь эз вӧв шуӧма кыв ни джын.

РАЯ. Сергей, бур кӧзяиныд аскиа лунӧн олысь морт, выльторсьыд сійӧ оз бӧрыньтчыв.

СЕРГЕЙ (дӧзмӧмӧн). Тэ мый татчӧ сюйсян, мужичӧй сёрниӧ? Тэ кага бӧрсяыд видзӧд, а эн тан командуйт.

РАЯ. Ме нӧ абу бригадир?

СЕРГЕЙ. Бригадир? Коркӧ вӧвлін. Ӧні тэнад уджыд — рузумъяс пожъявны.

РАЯ. Бригадирсьыс менӧ некод на эз вештыв. Кӧть и кага быдта, аслам уджысь торйӧдчыны ог кӧсйы.

СЕРГЕЙ. Мун, кага дінад пет!

РАЯ. Кагаыс нӧ менам сӧмын? Талунсянь кагатӧ ачыд видз. (Восьтлӧ сумка.) Со тэныд рузум, со нёньыс. (Пуктӧ верӧсыслы пидзӧс вылас.) Кагаыд ӧшинь улын, коляскаын.

СЕРГЕЙ. Рая, мый тэкӧд?

КОСТРОМИН. Рая, тадзи оз жӧ позь, чӧв усь.

РАЯ. Ме сэсся ог вермы. Тайӧ пӧдраднас дзикӧдз йӧймис.

Мальцев да Рая петӧны.

СЕРГЕЙ. Мый сыкӧд лоӧма? (Чукӧртӧ кӧлуйсӧ. Видзӧдӧ ӧшиньӧ.) Ті нӧ, управляющӧй, мый нинӧм он шуӧй?!

КОСТРОМИН. Ме тіян семьяын абу управляющӧй. Тэ вывті жӧ бур, ошкӧны да, ошкӧ пӧрӧмыд.

СЕРГЕЙ. Рая нӧ кутшӧм? Кыв оз кывзы. Кагасӧ он жӧ эновт!

КОСТРОМИН. Асьныд нин ладмӧдчӧй.

СЕРГЕЙ. Ме, гашкӧ, котӧртла ыбас? Метӧг сэн ладыс оз ло. (Видзӧдлӧ ӧшиньӧ.) Узьӧ со. Садьмас кӧ, видзӧдлы, Михаил Васильевич. Со тані, мый ковмасыс. (Пуктӧ пызан вылӧ рузум да нёнь. Петӧ.)

КОСТРОМИН (вӧтчылӧ сы бӧрся). Тэ мый дуран? Ачыд видз кагатӧ. (Видзӧдлӧ ӧшиньӧд. Горӧдӧ.) Ӧти кокыд мед сэні, мӧдыс тані. (Бӧр пуксьӧ пызан сайӧ.) Сиралісны татчӧ! (Кылӧ кага бӧрдӧм шы. Костромин босьтӧ рузум да нёнь. Видзӧдлӧ ӧшиньӧд, горӧдӧ.) Столля бабӧ, пырав.

Пырӧ Столля баб.

СТОЛЛЯ. Мыйла корин?

КОСТРОМИН. Пикӧ вои, Столля баб! (Видзӧдлӧ ӧшиньӧд.) Олышт тані. Дугдіс тай бӧрднысӧ. Гашкӧ, кодкӧ звӧнитлас. Логиновъяс кагасӧ колисны. Кыкнанныс ыбынӧсь. Мен колӧ жӧ ветлыны. Видзӧдлыв кагасӧ.

СТОЛЛЯ. Видза, видза, ветлы кытчӧ колӧ. Тайӧ уджад велӧдчыны оз ков. Быдтысьлӧма. Вит чоя-вокаӧс да челядьлысь нин нёльӧс. (Сералӧ.) Управтӧ кага видзны кольӧмаӧсь.

Триньгӧ телефон.

КОСТРОМИН. Да, Василий Кузьмич. Заводитам. Эг на вевъяв ветлынысӧ. Ӧні жӧ муна. Механикным думыштӧма выльтор, рацпредложенньӧ, гашкӧ, и изобретенньӧ вылӧ кыскас. Бӧрынджык звӧнитла. (Пуктӧ трубкасӧ.) Но, Столля баб, ме ветла. (Мунӧ.)

СТОЛЛЯ (видзӧдлӧ ӧшиньӧд). Тайӧ нӧ мый Раякӧд лоӧма? Ассьыд дитятӧ он жӧ коль? Ми, коньӧръясӧ, быдтысьлім жӧ. Гортад пуз чужӧм кага, а тэнӧ медся сьӧкыд удж вылас ыстасны. Зэв сьӧкыда овлім, мед кӧть том войтырыс ӧні бурджыка олӧны. Ӧні гортад сӧмын пукав. Раяыд яр удж вылад. Верӧсыс сэтшӧм жӧ и.

Звӧнитӧ телефон. Столля повзьыштӧмӧн босьтӧ трубкасӧ.

СТОЛЛЯ. Алло, кывза.

НЫВБАБАЛӦН ГӦЛӦС: Агропромысь Шомысова.

СТОЛЛЯ. Коді?

ГӦЛӦС. Агропромысь Шомысова.

СТОЛЛЯ. Гӧгӧрвои, Аграпена Шомысова. А ме Столля баб лоа. А тэ нӧ ачыдсӧ коді лоан?

ГӦЛӦС. Государстволӧн, кодлӧн сэсся.

СТОЛЛЯ. Но-о.

ГӦЛӦС. Кӧні управляющӧйыд?

СТОЛЛЯ. Ыбын. Сэні миян механикыд да Логинов гозъя эсійӧ керӧны, мыйӧскӧ, час висьтала... Рача предложенньӧсӧ. Ещӧ на кутшӧмкӧ кыв шуис да вуні менам. А-а, експеримент!

ГӦЛӦС. Кутшӧм предложенньӧ?

СТОЛЛЯ. Рача.

ГӦЛӦС. Кутшӧм рача?

СТОЛЛЯ (рама). Ог тӧд. Картупель керны пӧ лӧсьӧдӧмаӧсь. Михаил Васильевичыд тай телефон пырыс сёрнитіс директорыдкӧд да сэк шуис-а. Ме тан Рая Логиновалысь кагасӧ видза. Ог вевъяв. Кагасӧ нӧ кытчӧ коля? Ставӧн ыбынӧсь. Ӧні ӧд ар тыртӧдзыс государство отпуск сетӧ. (Пуктӧ трубкасӧ.) Аграпена? Миян ставыс пӧрадок.

Кылӧ кага бӧрдӧм шы. Пырӧ Рая.

РАЯ. Кӧні нӧ кагаӧй? Абу тай места вылас? (Видзӧдӧ ӧшиньӧд.)

Пырӧ Сергей.

РАЯ. Кӧні нӧ каганым?

СЕРГЕЙ. Ӧшинь улас кольлі, Михаил Васильевичлы тшӧкті видзӧдлыны.

РАЯ. Сійӧ ыбын жӧ вӧлі да.

Пырӧ Костромин.

КОСТРОМИН. Комбайныс тай бура уджалӧ. Миян Мальцевыд збыльысь изобретатель! И тэ бур картупель быдтӧмыд, Сергей Ильич.

СЕРГЕЙ. Ог тӧд, уна-ӧ бурыс водз керӧмсьыд? Батьӧ шулывліс, му кӧдзавлытӧдзыс пӧ оз позь картупельсӧ босьтны. Сэк пӧ озджык сісьмы.

КОСТРОМИН. Но тайӧ ӧд абу на тӧвйӧдӧм вылӧ, пырысь-пыр вузалам.

РАЯ. Михаил Васильевич, кытчӧ миянлысь ичӧтик Логиновсӧ воштінныд?

Пырӧ Столля баб.

КОСТРОМИН. Со, Столля баблы дӧверитлі.

СТОЛЛЯ. Некытчӧ сійӧ тіян оз вош. (Костроминлы.) Звӧнитліс Аграпена.

КОСТРОМИН. Кутшӧм Аграпена? Ме некутшӧм Аграпенаӧс ог тӧд.

СТОЛЛЯ. Сійӧ тай тэнӧ тӧдӧ-а. Ставсӧ юасис. Ме сылы експерименттӧ и рача предложенньӧсӧ и Логиновлӧн дитя йылысь ставсӧ висьталі, а сійӧ шуис, некутшӧм пӧ тіян пӧрадок абу. Мися, миян ставыс пӧрадок. (Раялы.) Коляскатӧ керка саяс сувтӧді, сэні кӧть гож сайын. Бурджыка узяс.

РАЯ (окыштӧ Столля бабӧс). Аттьӧ, Столля баб. (Сергейлы.) Мунам.

СЕРГЕЙ. Ме му вылас кежала на. (Петӧны.)

КОСТРОМИН. Аттьӧ, Столля баб. Мездін тэ миянӧс. (Кутлӧ кисӧ.) Дыр на ов, Столля баб.

Пом.