КАТШЫС ЙЫЛЫСЬ СЬЫЛАНКЫВСарай пельӧсӧ, кос пельса сайӧ, Кӧні туплясис вурун да шӧрт, Катшыс кычипи сизимӧс вайис — Гӧныс ставныслӧн небыд и гӧрд. Рытӧдз меліа лелькуйтіс найӧс, Нюліс-сыналіс пиянлысь гӧн Кӧдзыд сарайын, кос пельса сайын, Лёкысь вой тӧлыс шутьляліс кӧн. Рытнас кӧзяин та йылысь тӧдіс, Локтіс сарайӧ зумыш и скӧр, Чорыд мешӧкӧ понпиян лӧдіс, Петіс ропкигтыр сарайысь бӧр. Катшыс мешӧка зон бӧрся вӧччис, Жугыль котӧртіс лым питі пон... Дыр зэв ва веркӧс тіралӧм тӧдчис, Кытчӧ шыблаліс понпиӧс зон. Кодыр бӧр локтіс катшысыд гортас, Аддзис тӧлысьлысь сэзь югыд би. Чайтіс, енэжыс босьтӧма ордас... Чайтіс, тӧлысьыс — сылӧн бур пи. Пуксис лым вылӧ тӧлысьлань юрӧн, Нора омляліс... омляліс дыр... Кытчӧдз тӧлысьыс вӧр сайӧ, нюрӧ, Узьны-шойччыны гортас эз пыр. Зорйӧн кучкисны быттьӧкӧ сылы (Зорнад кучкӧмыд кыдз нӧ оз дойд!) — Катшыс синъясысь лым тола вылӧ Эзысь синвалӧн войтыштіс войт.
