ТӦВСЯ РЫТ

Пеша дорын мамӧ печкӧ,
Батьӧ тюни гындӧ;
Ичӧт вокӧй чачӧн ворсӧ,
Чойӧй сыкӧд зыньгӧ.

«Тайӧ менам, абу тэнад», —
Шуӧ сійӧ воклы.
«Видзӧд, мамӧ, чача-с мырддьӧ»,—
Вок норасьӧ мамлы.

Пызан дорын, пемыдінын,
Роч книга ме лыддя.
Зэв дӧсаднӧ, гӧгӧрвотӧг:
Ог тӧд, мый и лыддя.

Сэні ещӧ сартас кусӧ,
Выльысь колӧ пешны.
Чоя-вока пинясьӧны, —
Дзикӧдз олӧм эштіс.

Ыджыд мамӧ кага видзӧ,
Потан дорын сьылӧ:
«Ӧв-вӧ, ӧв-вӧ, баю-бай, бай,
Узь жӧ, ичӧт нылӧй!»

(Кутшӧм узьӧм татшӧм зыкын
Пеля-ловъя мортлы?)
«Чирышт, Анна, мед оз увгы,
Пӧра налы водны».

Сартас тшынӧн керка лӧзӧдз
Быд рыт миян тырӧ.
Водан узьны — синтӧ сёйӧ,
Унмыд ставыс бырӧ.

Вольпась вылын, эшкын улын
Дыр ас костын дурам.
Ланьтам вӧлись, кор ми батьлы
Тасма улӧ сюрам.

Гӧбӧч вылын ыджыд мамӧ
Мукӧд рытын мойдӧ.
Шы ни тӧв ми сэки кывзам
(Кӧть кодсюрӧ ойгӧ):

«Дуда, дуда, кытчӧ ветлін?»
«Коса дорны ветлі».
Либӧ: «Бобӧ, кытчӧ ветлін?»
«Чожӧ гуӧ ветлі...»