МЕНАМ МУЗА


Менам муза сьӧд вӧр шӧрын
	Кӧдзыд лунӧ чужис;
Айыс, пӧльыс сылӧн вӧлі
	Прӧстӧй коми мужик.
Гажа ягын черлысь котшкӧм,
	Пила нязгӧм кывліс;
Видзьяс вылын турун шульсйиг
	Сьыланкыв мем сьывліс.
Меным сьывліс, кыдзи йӧзыс
	Кынӧмпӧтла пессьӧ;
Кыдзи пӧсьыс коми мортлӧн
	Ведраысь моз лэччӧ.
Кыдзи юяс, видзьяс, парма
	Ставыс морт моз олӧ,
Кыдзи сэтчӧ коми мортыс
	Пальӧдчыны волӧ...
Мукӧддырйи пемыд рытын
	Пуксяс сійӧ дорам,
Збоя... Нора сьывны тшӧктас...
	Сьыла... Сёрӧдз-сёрӧдз.