МАДЖАСА ЮРКА ИВАН

Юркаыдлӧн памилльӧыс — Юрка Иван Шешуков. А нимыс сылӧн Иван, Юрка Иван. Юркаыс сійӧ грознӧй, ён да сійӧн, навернӧ, нимсӧ пуктӧмаӧсь. Гӧтырыс сылӧн абу вӧлӧма, а керкаыс кольӧма вӧлі. Ме ичӧт на вӧлі, а меным петкӧдлісны: тайӧ пӧ Шешуковлӧн керкаыс. Кык судта, сьӧд, бревеннӧй керка. Сійӧ ӧд важӧн нин овліс. Ме со 1893ʼ вося, а сылы ещӧ колӧ кыксё во содтыны. Да, оліс кыксё во сайын меӧдз.

Сэтшӧм сійӧ вӧлӧма знатнӧй. Йӧзыд вӧлӧм ёна сыысь полӧны. Сретення-Сергея праздник дырйи вӧлӧм чукӧртчасны том йӧз да кулиганствуйтӧны, а кодкӧ маджаса олысьяс пиысь и висьталас: он кӧ пӧ дугдӧ, час Юрка Иванӧс корам. Том йӧзыд пӧ сразу и котӧртасны кытчӧсюрӧ.

Сылӧн метра кузьта вӧлӧма пестерыс. Сэсся и гусясьны пондӧма. Йӧзыдлӧн ыжыд вӧлӧм вошласьӧ, да сыысь тӧдісны, мый сійӧ гуӧ. Сэсся вӧлӧм сійӧ вӧрӧ мунӧ пестера, а олысьясыс вӧлӧм шабді тыас вӧйтлӧны да юалӧны:

— Иван, кытчӧ мунан?

— Тшакла да гобла!

Сэсся йӧзыд пӧгибӧ воас да шуасны: тайӧс пӧ колӧ изведитны. Сэсся сійӧс разнӧй винаясӧн ёна юктӧдасны, тыкта пыжӧ пуксьӧдасны да, Ярасим купеч вӧлӧма да сылӧн мельничасьыс изки гоз босьтасны да сылы сэсся кӧрталасны и вӧйтасны.

А ёна сійӧн мырсьӧмаӧсь. Ыжтӧ йӧзыдлысь сёйӧ, да, дерт, грознӧй, абу ӧд сійӧ тшак сёйӧмыд. И висьталӧма жӧ эськӧ: путкыльта пӧ эськӧ Маджасӧ ставнас да вежай-вежань пӧ жаль. Эськӧ-й путкыльтіс Маджасӧ ставнас.

Сэсся ставыс рок паньыштасны. Мед пӧ грекыс лоас ставыслы ӧтмындаӧн. Сэсянь и кутасны маджасаясӧс нимтыны: маджаса рок сёйысь!

А, важӧн быдсяма дикӧвинкаыс вӧвлі!