КАНЬ-КОЗИН

Ӧти юкӧна ворсантор

Ворсысьяс:

АЙ — пӧрысь морт, пес кералысь.

ИНЬ — сылӧн гӧтырыс, зэв скӧр ань.

ЁМА — вӧрын олысь (олыся).

5–6 орт — ёма челядь (олыся пиян).

Вӧчсьӧ сьӧд вӧр шӧрын, тӧлын. Коз вӧраин. Лымъя.

Ай инькӧд пес кераланінысь локтӧны: ай — рос нӧбъя, чера; инь — даддьӧн пес кыскӧ. Кыкнанныс пасяӧсь, лёк кепысяӧсь, кашкӧны-мунӧны; сэсся пуксьӧны шойччыны: ай — кер пом вылӧ, инь — дадь вылас.

АЙ. Ок, кутшӧма мудзи! (Пуксьӧ кер пом вылӧ.) Аттӧ, кутшӧм омӧль пӧрысьлуныд! Пуксьыныд со пукси-а, чеччыны, ог тӧд, верма ог. Ок, ок, ок!.. (Ышлолалӧ.)

ИНЬ. Чӧв, бур жӧ нин кӧ-а. Кузь лун шӧйтан-пессян, инад он ӧшйыв; вой воас — ойзан, ружтан, он вермы узьны: быдлаті висьӧ. Кыдз сэсся веж оз пет чӧскыда сёйысь-юысьяс вылӧ, ас окота серти олысьяс вылӧ? Быдторйысь налы вӧля.

АЙ. Тэ ньӧти эн вежав налы. Шогыд быдӧнӧс видлавлӧ.

ИНЬ. Сідзнас сідз. Шогыд му вылад уна. Медводдза йӧзсяньыс нин сідзи лоӧма, Адамсянь пӧ сійӧ сідз мунӧ.

АЙ. Адамсянь! Оз-ӧ Евасянь-а?

ИНЬ (зэв наяна). Дерт нин, Евасянь, оз тон Адамсянь! Ен сетӧма Адамлы гӧтыр, тшӧктӧма сійӧс видзны бура, велӧдны бур вылӧ. Адам омӧля видзӧдӧма гӧтыр бӧрсяыс: Еваыд грекӧ вӧйӧма.

АЙ. Видзсьӧма тіянӧс! Тэныд со шуан ӧти кыв-а, тэ воча сы вылӧ — кызьӧс.

ИНЬ. Тэ нӧ менӧ Ева кодьӧн жӧ чайтан?

АЙ. Ева кодьӧн. Гашкӧ, тэ сы дорысь на омӧль да?

ИНЬ. Ме?

АЙ. Тэ, да мый.

ИНЬ. Кыдз нӧ тэныд абу яндзим прӧстӧсӧ шуныс ме вылӧ. Ева кодь пӧ! Мый нӧ, кор ме сэтшӧм омӧльторсӧ вӧчлі?

АЙ. Эн нӧ? Вӧчлывлін эськӧ да, сӧмын тай эн мыжмывлы-а, пыр ме вылӧ мыжсӧ вештывлін. Ланьт нин, бурджык лоӧ!

Вӧрысь петӧ кок увтіыс кыссяна, кузь паськӧма Ёма. Юр вылас турунысь да дзоридзысь кыӧм кытш. Киас вевта сюмӧд доз. Матыстчӧ старик гозъя дінӧ. Найӧ зэв ёна повзьӧны, сувтӧны, дзоргӧны сы вылӧ.

ЁМА. Мый йылысь нин сёрнитанныд, бур йӧз? Повзинныд тай нӧ меысь... Энӧ полӧй!

АЙ. Этійӧ тай, менам пӧрысьӧй, норасьӧ олӧм вылӧ. Ӧтитор да мӧдтор, шуӧ, оз судзсьы; узьлыны пӧ лоӧ чорыд вылын; нинӧм пӧ чӧскыдтор оз овлы пызан вылын. Ставсьыс пӧ сэсь Ева мыжа.

ИНЬ (зургӧ мужиксӧ). Йӧймин кӧ-а! Адам тай, мися!

АЙ (кинас шеныштӧ). Ланьт сёрнинад! Яндысь кӧть бур йӧзсьыс!

ЁМА. Энӧ увгӧ, энӧ пинясьӧй! Мый колӧ тіянлы, сійӧ и лоӧ. Ме быдтор верма...

ИНЬ. Тэ нӧ, эськӧ, коді ачыд?

ЁМА. Ме — ёма!

Пӧрысь гозъя шай-паймунӧны.

АЙ. Аттӧ! Унатор миянлы оз ков, бур мортӧй. Лабичтор кӧ эськӧ пуксьыштлыны татчӧ.

ИНЬ (тэрыба зурйӧдлӧ, дугӧдӧ). Дугды! Шойччыны кӧ мед прамӧйджыка нин. Небыд улӧс вылын пукыштны.

ЁМА (шлапкӧдӧ ки пыдӧсъяснас). Челядь! Челядь!

Локтӧны ортъяс, еджыд, кузь, сӧстӧм, уна пӧлӧс мича платтьӧаӧсь, турунъясӧн да дзоридзьясӧн вӧччӧдчӧмаӧсь. Гӧгӧртӧны Ёмаӧс.

ЁМА. Вайӧй пӧрысьлы лабич, старукаыслы — небыд улӧс! Ӧдйӧ!

Ортъяс вайӧны скамья да небыд улӧс.

ЁМА. Сэсся тіянлы нинӧм оз ков?

АЙ. Сэсся ӧд нинӧм кӧ оз-а? Ырӧштор либӧ нӧшта этшаник.

ИНЬ. Ме думысь, ырӧшыд тшыг кынӧм вылад нинӧм жӧ нин. Дозмӧр яйтор кӧ эськӧ...

ЁМА. Мый ті коранныд, быдтор лоӧ. Эй, ортъяс!

Ортъяс ӧтарсянь и мӧдарсянь локтӧны.

ИНЬ. Энлы, сулавлы... Ӧти сайын мед либӧ унджыктор ваясны.

АЙ (тойлӧ бокас). Дугды нин, пӧрысь выжыв!

ИНЬ (оз кывзы, шуалӧ тэрыба, гораа). Меным — выль тюпень, талы — шапка, кык выль кепысь гоз…

АЙ (чеччӧ, тупкӧ кинас гӧтырыслысь вомсӧ). Ланьт, мися, йӧй! Тэнад корӧмлы тай пом эз кут воны.

ИНЬ (тупкӧса вомнас). Карнан, укват, гормӧдчан, коколюка...

АЙ (скӧрысь). Дугды колӧкӧ-а, бур ӧд оз ло!

ЁМА. Ортъяс! Ставсӧ вайӧй, мый тайӧ пӧчӧыс корис. (Ортъяс мунӧны.) Ме сэсся муна жӧ. Мыйкӧ кӧ нӧшта ковмас тіянлы, чукӧстӧй ортъясӧс да тшӧктӧй ваявны. Ваясны. Этійӧ дозсӧ энӧ восьтӧй. Восьтад кӧ, ставыс бӧр вошӧ, мый тіянлы сетлі. Кыланныд? (Пуктӧ му вылӧ сюмӧд дозсӧ.)

ИНЬ. Огӧ, огӧ! Весиг чунь помӧн огӧ инмӧдчӧй.

Ёма мунӧ. Локтӧны ортъяс, вайӧны пызан, сёян-юан, кепысь, шапка, гормӧдчан, укват да мукӧдтор.

АЙ. Но, пӧчӧ, озырмин? Ӧні тэнад быдторйыс лои.

ИНЬ. Мый нӧ таысь, эм кӧть абу! (Зэв ыдждалӧмпырысь вешталӧ ас дінсьыс вайӧм кӧлуй.) Ортъяс! Вайӧй миянлы выль паськӧм, ёмаыдлӧн кодьӧс! Пызан вылӧ вайӧй коддзан сур, сэсся мед вӧлі нӧшта музыка ворсӧ. Сюся!

АЙ. Дугды, дугды, пӧрысь выжыв, йӧйталӧмсьыд.

ИНЬ. Тэ вӧсна? Ёмаыд тшӧктіс быдтор, мый колӧ, корны, сійӧн и кора.

Ортъяс вайӧны мича выль паськӧм, коддзан сур. Ылын кылӧ музыка. Пӧрысь гозъя пӧрччӧны ассьыныс паськӧмнысӧ, пасьталӧны вайӧм мича паськӧм.

ИНЬ. Вӧлись ми йӧз кодьӧсь лоим. Аттӧ, доз вылад огӧ и видзӧдлӧй, кӧть мый сэні эм. Важкодь жӧ нин тай эськӧ ачыс да, ставыс нин со вушйӧма, куснясьӧма. Мый таысь?

АЙ. Дерт жӧ, старука, мый татшӧм киссьӧм дозсьыд.

ИНЬ. Мый бара сэні эм-а?

АЙ. Ог тӧд, дай тӧдныс нинӧмла.

ИНЬ. Кутшӧм донатор, кӧнкӧ?.. (Мунӧ дозлань.)

АЙ. Эн, колӧкӧ, вӧрзьӧд-а. Инмӧдчан кӧ ӧд, пасьвартас, бусыд весиг оз коль.

ИНЬ (повзьӧ, кокнас йӧткыштӧ дозсӧ). Ой-ой, пола!

АЙ. Лок сёй, увгӧм дорсьыд бурджык лоӧ! (Сёйӧны.)

ИНЬ (шыбитӧ паньсӧ). Эй, ортъяс, мыйла музыкаыд дугдіс ворсӧмсьыс. Гажаджыка ворсӧй!

Музыка ворсӧ, ортъяс йӧктӧны. Бӧрынджык пӧрысь гозъя тшӧтш сувтӧны йӧктыны.

ИНЬ (йӧктӧм мысти). Тӧдан-ӧ мый, ай, ме чайта, дозъяд мыйкӧ донатор эм. Прӧста ёмаыд эз шу: ящиктӧ пӧ энӧ восьтӧй.

АЙ. Эз жӧ тэнад вун дозйыд.

ИНЬ. Гаж петӧ тӧдны, мыйла оз позь восьтыны сійӧс.

АЙ. Дознад и ставнад! Эновт сёрнитӧ!

ИНЬ. Сэсся и сёрнитныд нин оз позь. Ме чайта, тайӧ дозъяд кутшӧмкӧ талисман эм. Овлӧны сэтшӧм чунькытшъяс, сикӧтш мольяс да мукӧдтор... Мыйӧн чунькытшасян либӧ сикӧтшсӧ сьывъяд ӧшӧдан, пырысь-пыр став кладыс кутас тыдавны. Абу эськӧ сійӧ миянлы лишнӧй, ме думысь да.

АЙ. Дугды больӧдчыныд, дугды! Выжыв!

ИНЬ. Дугді нин тай со... Кутшӧм мисьтӧм дозйыс, аддзан? (Кинас омӧлика инмӧдчылӧ.) Со ме инмӧдчылі да, нинӧм эз ло.

АЙ. Вешйы сэтысь, бур ӧд оз ло!

ИНЬ. Лёкыс, ме чайта, нинӧм жӧ оз ло. Вай видзӧдлам пытшкӧсас. Огӧ лючки восьтӧй, сӧмын дзоляника кыпӧдыштлам вевтсӧ.

АЙ. Аттӧ ань! Дзик кага кодь. Мый нӧ тэд сэтшӧмасӧ колӧ сэтысь? Ортъястӧ сӧмын чукӧст, ваясны, мый тэд колӧ.

ИНЬ. Дзик йӧй тэ! Ёмаыд тайӧ нӧ быд бурсӧ тшӧктіс босьтны, мый эм му вылас. Дозйыс инӧ миянлы жӧ. Дозъяс, буракӧ, меддонаторсӧ пуктӧма.

АЙ. Кутшӧм тэнад колысь синмыд.

ИНЬ. Ньӧти абу колысь. Ме сӧмын видзӧдла. (Копыртчӧ дозлань.) Пырыс тыдалӧ, мыйкӧ сэтӧні эм. Вай восьтыштлам...

АЙ. Сёй, бурджык лоӧ...

ИНЬ (оз эновтчы дозйысь). Пытшкӧсас мыйкӧ дзирдалӧ!..

АЙ. Аттӧ ань! (Сёйӧ.)

ИНЬ. Ме видзӧдла, пӧльӧ. (Восьтыштӧ доз вевтсӧ.) Ой, ой!.. (Повзьӧ зэв ёна, горӧдӧ).

Дозйысь бырскӧбтӧ сьӧд кань.

Локтӧ Ёма.

ЁМА (гораа, скӧрысь). Тадзи ті менӧ кывзанныд?! (Пӧрысь гозъя повзьӧны.) Ортъяс, босьтӧ ставсӧ, мый вайлінныд тайӧяслы, да бӧр нуӧй! (Ортъяс новлӧны.)

ИНЬ. Эг ме, эг. Эсійӧ... (Индӧ верӧсыс вылӧ.) Сійӧ шуӧ: восьтан кӧ пӧ — лыяс. Ме шуа: Ёмаыд, мися, миянлы бур, оз лый.

АЙ. Дугды нин сэні. Пӧрччы мича платтьӧтӧ да пасьтав ассьыд лопотьтӧ. Кымынысь ме тэд шулі, сёй, мися. Эн кывзы менсьым... Ӧні сэсся тшыгйӧн лоӧ мунны.

ИНЬ. Ме платтьӧтӧ ог пӧрччы! Видзӧдӧй, кутшӧма лӧсялӧ да, мем быттьӧ и вурӧмаӧсь.

ЁМА. Он кӧ пӧрччы, пырысь-пыр жӧ ӧзъяс сійӧ, ачыд сотчан.

ИНЬ (сюся пӧрччӧ). Ой, ой!.. (Ортъяслы.) Кӧть эськӧ карнансӧ нин меным колинныд... (Бӧрдӧ.)

АЙ. Мыйла восьтін дозсӧ, код тэнӧ тшӧктіс?

ИНЬ (нора). Да ӧд ме муртса-муртса восьтыштлі, чунь помӧн инмӧдчылі...

АЙ. Муртса... Еваыд тай муртса жӧ инмӧдчылӧма яблӧг бердас...

ИНЬ (Ёмалы). Збыльысь ӧмӧй нинӧм онӧ кӧсйӧ кольны?

ЁМА. Коля, мыйла ог. Сьӧд каньсӧ тіянлы коля. Налӧй! (Сетӧ пӧрысь иньлы киас.)

ИНЬ (скӧрысь шыбитӧ каньӧс бокӧ). Брысь! Мед син водзын эн вӧв!

Ёма мунӧ. Гозъя кольӧны шемӧс.