ГЕРМАНИЯЫН КУЙЛІГӦН


Вежӧс сайын гудӧк ворсӧ:
«Тін да тон да тін-тон!»
Вылыс нарсянь кодкӧ горзӧ:
«Йӧктӧй, кодлӧн кокныд ён!»

Йӧктысь эз пет: оз эштыны —
Быдӧн вӧчӧ ассьыс удж,
Коді узьӧ, коді куйлӧ...
Прӧста оз ов ӧти сутш!

Вежис ворсысь ассьыс ворсӧм —
Петкӧдлӧ дерт кужӧмсӧ.
«Кор нин бара, кор нин бара
Кор нин бара ужынсӧ,

Кор нин бара, кор нин бара
Кор нин бара ваясны,
Кор нин бара, кор нин бара
Тасьті-н лоӧ пайясным.

Сэки бара, сэки бара
Ми вок кодьыс сёйыштам
(Колясъяссӧ, мытсалӧмсӧ
Кильчӧ юрйыв койыштам)».

Вот и воссис барак ӧдзӧс, —
Мортъяс... пельса мыччысис...
Грым-йирк садьтӧг чеччис йӧзыс...
Тасьті бердӧ кутчысис.

Тасьті-н ужын. Пызан гӧгӧр
Пуксялісны лабичӧ.
Гудӧкасьысь вежис ворсӧм —
Искусствонас тшапитчӧ.

Кылӧ пань шы. Пӧтӧлӧкӧдз
Кайӧ еджыд ру.
Дерт вӧд... Кыдз нӧ. Эз вӧд регыд
Кашеварыс пу!

Ужын пиӧ пуктӧмаӧсь
Шыдӧс пӧ дай пызь;
Эжва ва кодь, тасьті пытшкад
Эм дерт шыдӧс кызь.

Музыкантыс дугдіс ворсны:
Кыліс ужын дук.
Тэрмасьӧ зэв мунны. Чайтӧ
Лоӧ ужын сук.

Артмӧ сьылӧм пань шыӧ:
Шондібанӧй-олӧмӧй,
Том олӧмӧй, том гажӧй,
Герман муӧ волӧмӧй,
Тув джын няньсӧ сёйыштны,
Лӧз ва ужын пыльскыны
(Бурджык эськӧн койыштны!),
Узьны, узьны, узьыштны,
Бок мудзтӧдзыд куйлыштны,
Мармаладсӧ чуньыштны,
Ӧбедайтны чеччывны.

Шондібанӧй-олӧмӧй,
Том пӧра коллялӧмӧй,
Том шудӧй да томдырӧй.
Кытӧні нӧ колян тэ?
Казармаын, баракын,
Няйт пиын да бус пӧвстын,
Кынмӧмын да косьмӧмын.
Дыр узьӧмын, узьтӧмын,
Юр вем тшыгйӧн видзӧмын.
Шондібанӧй, олӧмӧй,
Невӧляын чеп йылын.
Том олӧмӧй, том гажӧй,
Вӧльнӧй олӧм зарниӧй,
Чептӧм олӧмӧй эзысьӧй,
Кор нин тэнӧ аддзыла?..

Ланьтіс паньлӧн тольскӧдчӧм.
Сідзик эштіс ужын кад;
Вылыс нарын бара нин
Кутіс ворсны музыкант:

«Кор нин бара, кор нин бара
Кор нин ӧбед матыстчас!..»
Ужынсяньыс ӧбедӧдзыс
Овлӧ буретш дас вит час...