КЫЗ НО СИРПУ

Туж кемалась вашкала дыръя Вятка дурын удмурт улэм. Сое Ватка-удмурт шуозы вылэм, либо Ватка гинэ.

Мукет калык кадь ик, Ватка но нянь кизёз вылэм, пудо вордоз вылэм. Кема улэм Ватка, ог куатьтон ар тырмем ини солы. Мукет гуртъёсы, мукет интыосы со вуылымтэ. Соку кыдёке ветлыны сикъёс пыр пыдын гинэ луоз вылэм. Валэн кытчы ке потыны малпанэз ик вылымтэ.

Мынэм-ветлэм муртъёслэсь Ватка кылэм: «Ватка-удмурт сяна, мукет удмуртъёс но вань. Лымшор палан но шунды пуксён палан Калмез удмуртъёс вань на; соос Калмез шур дурын уло. Тазьы ик ю кизё, пудо вордо. Калмезын чорыгало, нюлэскын пӧйшурало. Озьы соос асьсэлы сион-юон потто».

Ватка-удмурт но азьвыл чорыгам. Солэн пыжез вылэм, соин со Чупчиын чорыгам. Чорыган тӥрлыкез но трос, пе, вал, зверьёс но, тылобурдоос но солэн улон котыраз трос тырмиллям. Куд-огезлэн кӧберзы ик вылымтэ ни: адями юртъер котырын ик улыны каръясько, пе, вал.

Ваткалэн пиез вордскем но, атаез кадь ик, чорыганы, пӧйшураны кутскем. Кема озьы улӥллям. Пиез пудо вордыны ӧдъям, чорыганзэ, пӧйшуранзэ но вунэтымтэ. Собере, сикез сайкыса, ю кизьыны кутскем.

Туж пересьмемзэ шӧдыса, пиезлы шуэм Ватка:

— Тани, пие, ӝоген мынам кулонэ но вуоз ини. Кулон азям калыкез адӟеме потэ вал, котырысь дуннеез учконо.

Калмез удмуртъёс доры мыныны кариськем Ватка-удмурт.

Кышноез шаньги пыжем но, ӵукна ӵук, песьтэраз сион но мар тыриськыса, Ватка сюрес вылэ потэм. Коркасьтыз потон азяз пиезлы вераса кельтэм:

— Мон Калмез уром доры куное кошкисько. Мон понна тон ужа ини, коркаез утьы.

Пыдын кошкем Ватка — возьёс вылтӥ, сикъёстӥ. Калмез доры вуэм но юа, пе:

— Татын-а улэ Калмез уром?

— Татын, — шуэм солы таза, ӝужыт воргорон, гур сьӧрысьтыз потыса. — Татын мон улӥсько.

Ватка уромез Калмез пуксьыны косэм. Соиз пуксем но малы лыктэмзэ вераны кутскем. Уромезлэн лыктэмезлы Калмез шумпотэм: чорыг пӧзьтэм, чай пуктэм. Чай пӧзьытозь улон-вылонзэс но вераны вуиллям. Собере, сиськем беразы, кӧлон инты тупатыны кутскиллям талы. Дуно куноезлы Калмез валес дасям, небыт мамык миндэр понэм.

Ваткалэсь юа, пе, ини:

— Ватка уроме, кытчы выдод: выж вылэ-а, сэндрае-а?

Ватка валамтэ. «Выж» — ма со шур вамен потан выж ук.

Зэм-а со выж вылын монэ кӧлытоз?» — малпам Ватка ас понназ. Калмезлы ма шуыны ик паймем — сокем ӝожомем Ватка. «Сэндра» кылэз но Ватка валамтэ. Солэн кышноез Сандра вылэм. «Оло нош кышноеным кӧлыны косэ шат? Монэ серекъя ик, лэся. Мукет удмурт уром доры кошко али кӧлыны», — песьтэрзэ кутэм но чалак потэм Калмез дорысь.

Куноезлэсь кошкемзэ адӟыса, Калмез паймем. «Малы меда со ӝожомиз?» — малпаны кутскем. Ури-бери дӥсяськыса, бӧрсяз потэм но уромзэ сутэм, берыктэм. Коркасен со ваньзэ Ваткалы умой валэктэм ини. «Выж», «сэндра», «миндэр» кылъёсты тодэм-валам бераз гинэ Ватка татчы кӧлыны кылем.

Ӵукна соос Булда удмурт доры мыныны вераськиллям. Я, соос вал кыткыны кутскиллям ини. Калмез валзэ вайыж вискы пыртэм, сиессэ понэм, нош энерчаксэ тыбыр вылаз поныны вунэтэм. Ваткалы, пе, шуэ ини:

— Мын-ай, уром, энерчакез вай, со отын липет улын ошемын.

Ватка нош валамтэ ни та кылэз. Со «кенер чагез» кожам. «Малы бен кенер чаг солы кулэ луэм?» — малпа Ватка ас понназ. Сад кенерысь одӥг чагзэ кыскем но ваем. Калмезлэн гор-гор серемез потэм. Ачиз мынэм но ваем. «Ми тае «седёлка» шуиськом» — пе, шуэ Ватка.

Калмезлэн букоез зӧк сирпу вылэм. Ватка паймыса учке ини, пе, со букозэ.

— Ой букоед, уром, кыз вылэм, — шуиз, пе, Ватка.

— Кыз ӧвӧл — сирпу, — пе, шуэ Калмез.

— Ма, мон адӟисько ук кыз, — пе, шуэ нош ик Ватка.

— Мон тае сирпу шуисько: кин-о визьмоез кыз букоен ветлоз, — Калмезлэн вожез потэм.

Бӧрысь гинэ соос валаллям мар со «кыз».

Вал кыткиллям но кошкиллям. Булда уромзы мылысь-кыдысь пумитам.

Татын соос огзэсты огзэс умой валаны кутскиллям ини.

— Асьмелы ӵемгес пумиськылоно, соку асьмелэн вераськонмы воляса кошкоз, — шуиллям соос.