ДУННЕ КЫЛДЭМ СЯРЫСЬ

Азьло дунне вылын копак ву вылэм, нокытын но музъем вылымтэ. Дунне вылын одӥг инмар но одӥг шайтан гинэ вылэм. Инмар шайтанэз косэм, ву пыдэсы зумыса, сюй поттыны. Шайтан инмарлэсь кылзӥськем, ву пыдэсы зумем но, кияз кырмыса, сюй поттэм. Поттэм сюйзэ ваньзэ инмарлы сётымтэ, ымаз пичи ватыса кельтэм.

Инмар, шайтан киысь сюез басьтыса, сое кырым пыдэсаз понэм но ву вылэ пельтыса лэзем. Собере музъем будыны кутскем, весь бадӟым но бадӟым луэм.

Шайтанлэн но ымаз ватыса кельтэм сюез будыны кутскем. Уно будэм бераз ымаз тэрымтэ ни, шайтанлэн ымыз пилиськем, ымысьтыз сюез пазьгиськем но музъем вылэ огкадь усьымтэ. Соин ик музъем вылэ кылдӥллям гурезьёс, нюкъёс, гопъёс. Шайтан инмарез алданы ӧй ке турттысал, музъем таба кадь ӵошкыт луысал.

Нош первой адямиос туж бадӟымесь вылӥллям. Соос сьӧд нюлэс пӧлтӥ пушнер пӧлтӥ кадь ветло вылэм.

Со бадӟымесь адямиос бырон азьын пичиесь адямиос кылдӥллям.

Пичи адями нюлэскы кор кораны мынэм, аслыз корка пуктыны. Бадӟым адями сое адӟем но, кияз кутыса, тӥреныз валче кисыяз понэм. Дораз бертэм но анаезлы, пе, возьматэ:

— Тани, анай, мон сизьпиез кутӥ, со кызэз кораса улэ вал.

Анаез нош солы вера, пе:

— Пие, та сизьпи ӧвӧл, та адями, асьмеос дуннеысь быромы, соос кылёзы, дунне вылын улозы. Соос туж устоесь но туж шаплыесь луозы.

Со бадӟымесь адямиослэн визьзы нош туж пичи вылэм.

Одӥг пол соос тыл котырын шунтӥськыса пуко вылэм. Тыл ӝог ӝуаны кутскем бере соослэн пыдпыдэсы ӟырдам. Соослы тыл дурысь кошкыны кулэ вылэм, нош соослэн визьзы тырмымтэ, пыдпыдэсазы сюй лякылыса пуко, пе.

Дунне вылэ трос адями тырмем бере, адямиос котьмар ужаны, котьмар лэсьтыны дышем бере, инмарлэн йырыз кур луэм но мызон дуннее пегӟем. Со дырысен асьме дуннеын инмар ӧвӧл ни, адямиос инмартэк но туж ӟеч уло.