КЫК БАТЫРЪЁС — КЫК БРАТЪЁС
Кыдёкын но ӧвӧл, туж матын но ӧвӧл, Вало шур дурын, Вавож котырын улӥллям-вылӥллям вашкала удмурт батыръёс: Ӵушъял вырйылын — Микола-батыр, Вавож вырйылын — Антамыр-батыр. Шальые пус ӵогылыса, та батыръёс ваче лэзяськиллям, озьы шальыосын ивор вуттыло вылэм огзылы огзы. Сизьым иськемез сизьым сул чот гинэ лыдъялозы вылэм: сизьым пол вамышто — огзы доры огзы вуо. Тӧлтэм шулдыр нуналъёсы коньдон шорӟемзы но жингыр кылӥське, пе, вал.
Туж узыр но туж кужмо вылӥллям та батыръёс. Пужымъёсты но кызъёсты пышез кадь гинэ ишкаллям, силёез кадь люкаллям. Вало дуртӥ бусыос, возьёс соослэн, пе, озьы сайкем бервылзы кылемын.
Одӥг пол Микола-батыр пор батырен Вало дурын эӵешем: мушко быдӟа нюр муӵез кин Вало вамен ӵыжыса поттоз.
— Тон ке быгатӥд, — шуэм со, — вань куинь сэрего азвесь коньдонме но улон интыме тыныд сёто. Нош ӧд ке быгаты — мон тынэсьтыд вань коньдондэ но улон интыдэ ас киям басьто.
Пор батыр пумит луымтэ: «Кужыммес мерталом ке мерталом», шуэм. Ӵуказеяз пумиськыны вераськиллям.
Пор батыр, ас кужымезлы туж ик оскытэк, ӵыжоно муӵсэ вандыса дасям. Микола-батырлэн тодаз но лыктымтэ озьы карыны.
Чукна ик Вало дуре вуиллям, пор батыр бур палаз, пе, сылэ, Микола батыр — паллян пал ярдурын сылэ, пе. Шултӥллям но муӵъёссэс вачепумит ӵыжиллям. Миколалэн муӵез
пор батыр мышкы кыдёке усем, нош пор батырлэнэз — мырдэм гинэ паллян ярдуре потэм. Тӥни озьы нокин но вормымтэ.
Микола-батыр выт нуыса огпол Кузонэ мыноно луэм. Соку сюрес вылъёсын курокъёс йыртэмалозы вылэм, соин ик чырткем валъёслы но лэчыт шашкалы гинэ оскозы вылэм. Бултыр кышноезлы Микола-батыр кошкон азяз шуэм:
— Пуксён улам нянь сукыриме пон-ай, бултыре.
Вуж кышноез вала вылэм ини: шашказэ нянь сукыри шуэ со. Нош бултыр кышноез валамтэ но нянь сукыри ик кожам, песьтэраз нянь сукыри поныса лэзем.
Пар валэн тӧл кадь лобем Кузон пала Микола-батыр. Кыткетын, пе, сьӧд валэз вылэм, урдэсказ — куӵо вал кыткемын, пе. Жадёнэз валатэк валъёс лобо, сикъёс но лудъёс син азьтӥ вужерак гинэ ортчыло.
Азьпалан, выж вылын, курокъёс, пе, даськыса уло. Сюресэз выж вылтӥ Коръёсын ваментӥллям. Микола-батыр нюк вамен тӧлпери кадь лобӟыса потыны малпа вылэм. Валъёсыз шоры шултэм, кеськем — сьӧд валэз нюк вамен тэтчем, нош куӵо валэз из кадь усем нюк улэ, батырез но сьӧраз кыскем.
Курокъёс батырез котыртӥллям, ишко, бышко гинэ, пе. Уробо пыдэсысь шашказэ утчаны кутскем но — ӧвӧл. Лэчыт шерем шашкаез интые солэн киулаз небыт пыжем нянь сукыри йӧтэм. Микола-батырлэн вожез потэм но тылын ӝуалскем. «Куӵо вал — вал ӧвӧл, бултыр кышно — кышно ӧвӧл», шуыса каргам.
Пор батыр Микола-батырез ноку но тушмонэн ӧз лыдъялля, пе, ялан ӟеч бускелен лыдъялляз. Микола-батырлэсь курокъёс киулэ шедьыса быремзэ тодэмез бере пор батыр куараен бӧрдӥз, пе, синвуэныз коттыса, музъем ик дэри кадь небӟем.
