ЭШТЕРЕК

Вашкала дыръя удмуртъёс пӧлын улэм-вылэм туж кужмо но бадӟым адями Эштэрек. Ньыльдон аресозяз со музъем ужам, ожмаськыны ветлылымтэ. Соку дыръя бигеръёсын но мукет тушмонъёсын ӵем ожмаськоно луылоз вылэм.

Эштэрекез егит дыръяз ик тӧрое пуктоно шуо, пе, вал но, со тӧро кариськымтэ. Соин ик пересь Иднаез бырйиллям, нош со кулэм бере — Ожмегез.

— Мон егит на, монэ асме но кортнано на, соин ик мон тӧрое уг тупа, — шуэм со удмурт выжы йыръёс азьын.

Ожмег кулэм бере гинэ Эштэрек тӧрое пуксем.

Кӧня ке улыса, бигеръёсын ожмаськоно луэм. Нош Эштэреклэн не ӟеч валэз, не пыӵал-тӥрлыкез вылымтэ на. Со одӥг веськрес бадярез выжыеныз валче ишкалтэм но, улзэ-вайзэ сузяса, пукыӵ золтэм. Трос лэчытэсь ньӧлъёс дасям. Табере вал гинэ шедьтоно на.

Эштэрек Кам шур дуре пуксем но малпаськыса, пе, улэ. Табунын солы одӥг вал но уз чида шуыса, со тодэ вылэм. Солы ачиз кадь ик кужмо вал кулэ вылэм. Со вал вылын ворттыса кошкыку музъем ик мед зуркасал, писпуос ик мед някырскысалзы.

Валэз ӧвӧлысь ӝожомыса, Эштэрек бӧрдыны кутскем. Солэн вордэменыз шур тулкымъяськыны ӧдъям, синвуэз шуре усемлы быдэ ярдуре тулкым жульк шуккиськоз, пе, вал.

Ву пыдэсысь вумурт ик кышканы кутскем. Со ас карысьтыз потэм но ярдурысь Эштэрекез адӟем.

— Э-э, кин вылэм ук! Удмурт тӧро — кышкыт кужым. Таин эшласьконо, талы пыриськоно, озьытэк йыр быроз.

Эштэрек доры вумурт лыктэм но шуэм:

— Ма пумысь сокем куректӥськод тон, Эштэрек?

— Тынад ужед ӧвӧл, кош татысь! — пумитаз вазем Эштэрек, вожзэ поттыса.

— Эх, Эштэрек! Юнме тон мыным вождэ поттӥськод. Ойдо эшласьком. Куректондэ вера али мыным.

— Уд юртты тон мыным. Кош!

«Тон Эштэрек ӧй ке луысал, ӧжытак сэстысал ини мон тонэ», шуыса малпам со ас понназ.

— Кинме уд тодӥськы на, лэся, тон, Эштэрек. Мон тыныд юрттысал!

— Тон-а юрттӥсь, вожектэм пересь? Кытын гинэ тынад лулыд! Тани куто но пызьырто — ӟуиктод небось!

— Ой, уроме, эн выр! Тон кужмо шуыса, мон тодӥсько.

— Кин бен тон, вож туш?

— Мон Вумурт, ву кузё, тынад пересьёсыдлэн вашкала уромзы. Ма ёрмонэз адӟид?

— Мыным вал кулэ. Ӧрӟи кадь лобась вал кулэ. Сыӵе вал шедьтэме уг луы. Со пумысен куректӥсько.

— Юртто. Кылзы визь-кенешме: туннэ уин шур дуре камыш пӧлы пуксьы но возьмаськы. Татчы Керемет валъёс лыктозы. Ву юыны кутскизы ке, сьӧд бадӟым ужпиез кут но ворттылы. Со понна тон но мыным умой лэсьты: чебер бигер нылэз мыным кузьма.

— Я, иське, валэ луиз ке.

— Сое эн вунэты: тыныд — вал, мыным — бигер ныл!

Уйшор палан шур дуре, пе, вал табун вуиз. Азьпалаз туж бадӟым сьӧд ужпи. Эштэреклэн синъёсыз ик ӝуаны кутскиллям. Тани, пе, со ужпи Кам вуэ пыриз ини, юэ... Со куспын Эштэрек шуак гинэ вал чырты борды кырмиськем но вылаз тубем. Ужпи резь ворттыса кошкем. Эштэреклэн сюлмыз ик икак луэм шумпотэменыз.

Тани со бадяр пукыӵеныз бигеръёс пӧлтӥ вал вылын тӧлпери кадь поръя, пе, ини, тушмонъёсты сюэн-сюрсэн быдтылэ. Сикез сильтӧл погыръям кадь усьыло, пе, бигеръёс.

Шумпотэ, удмуртъёс! — кесяське, пе, Эштэрек.

Пересь бигеръёсты, чебер бигер нылъёсты но пиналъёсты пленэ басьтӥллям. Эштэреклы ортчыт чебер ныл шедем — такемзэ адӟемез ик вылымтэ на. Шур дуртӥ вал вылын со бигер нылын, пе, кошке ини. «Кыӵе умой кышно луоз та мыным», шуыса малпам Эштэрек.

Озьы гинэ шуыса вуттэм но, шур тулкымъяськыны кутскем. Эштэрек берлань учкем но, со азьын кускыныз ӵож вуын Вумурт, пе, сылэ.

— Ма ини, Вумурт? — юам Эштэрек солэсь.

— Вераськеммес вунэтэмед, лэся, Эштэрек уром. Вай мыным бигер нылдэ!

Эштэрек гор-гор серектэм:

— Уг сёты, пересь! Тыныд кулэ ке, пиньтэм песянаез ваё.

Чик номыр вератэк, Вумурт ышем. Шуак ву тулкым потэм но Эштэрекез сэзь валэныз валче, чебер нылын валче шуре кыскем.