БЫДӞЫМ ПӦЙШУРАСЬ

Туж бадӟым сьӧд нюлэс вылэм вашкала дыръя асьмелэн удмурт шаерамы. Ӵем дыръя куинь-ньыль нунал ӵоже йыромыса ветлозы вылэм удмуртъёс, гуртысь гуртэ потыкузы. Кышкыт вылэм со нюлэскын: трос сьӧсьёс каръяськыса улӥллям отын.

Кутскиллям удмуртъёс нюлэсэз сайкыны. Нюлэсъёс интые кыр лудъёс, паськытэсь возьёс кылдытӥллям. Нош кӧчиллямтэ сьӧсь кионъёс удмурт шаерысь, кӧчем гинэ ӧвӧл, соос арысь аре трос но трос люкаськыны кутскиллям. Бератаз, чик кышкатэк, гуртъёстӥ калгыны кутскиллям, гидъёсысь ыжъёсыз вандылыны. Байёслэсь гинэ пудооссэс сӧсыръяллямтэ кионъёс: байёслэн угось юртъерзы муш уморто зӧктаесь пужым коръёсын лэсьтылэмын, куанеръёслэн нош, кесяськем куака кар кадь, куро липетъёс...

Номыр каремез уг лу, пе, удмурт калыклэн со сьӧсь кионъёсын, кионъёс уг быро, пе. Уно калык, пудотэк кыльыса, сютэм бырыны кутскем, со вылэ ик кионъёс кышкыт чер вӧлмытӥллям. Сюрсэн-сюрсэн бырыны кутскиллям куанер улӥсь удмуртъёс. Тӥни соку удмурт шаере Быдӟым пӧйшурась лыктэм. Люкам со куанер удмурт калыкез но шуэм соослы:

— Вашкала удмуртъёс сьӧд нюлэсъёсын пӧйшураса улӥллям, устоесь вылӥллям соос ыбылӥськыны: одӥг дробен коньылэн синмаз йӧттозы вылэм. Нош тӥ малы со сьӧсь кионъёсыз татчыозь уд быдтӥське?

— Ум тодӥське ни, кызьы мар карыны ик, ортчыт трос люкаськизы ни соос, — шуо, пе, солы удмуртъёс.

Соку Быдӟым пӧйшурась горд басмаосыз, горд бурлат шортъёсыз, горд азькышетъёсыз, кышетъёсыз люканы косэм. Гурезь ӝужда дӥськут люкаллям куанер удмурт калыкъёс.

— Табере быдэс шаердэс котыртымон гозы пунэ, — шуэ, пе, Быдӟым пӧйшурась.

Паймиллям удмуртъёс: уг валало, малы пӧйшурасьлы сомында горд дӥськут но со кузя гозы кулэ луиз. Озьы тӥни ваньзэ дасям бере горд дӥськутъёсыз гозы борды сузьяны косэм Быдӟым пӧйшурась.

— Табере ваньды кияды пыӵал кутэ но сьӧсь кионъёсыз быдтыны мыном, — шуэм со.

Быдэс шаерез со горд чуко гозыен котыртӥллям удмуртъёс. Быдӟым пӧйшурась быдэс шаерез адӟымон ӝужыт гурезь йылэ тубем но отысен пыӵалэныз ыбем. Со пыӵал куараез кылыса, калыкъёс котыртэмзэс сюбегатыны кутскиллям. Урмем кадь бызьыло, пе, кионъёс со котыртэм пушкын, нош котыртэм сьӧры потыны горд чукъёслэсь кышкало. Лыдтэм трос кионъёсыз озьы котыртӥллям. Соку тӥни кионъёслэн азьветлӥсьсы, шимес вузыса, ыргетыса, адямиос вылэ тэтчаны кутскем. Быдӟым пӧйшурась, гурезь йылысен адӟыса, сое ыбем, собере калыкъёс мукет кионъёсыз ыбылыны кутскиллям.

Озьы тӥни, вань сьӧсь кионъёсыз ыбылыса быдтэм бере арысь аре трос пудо йылыны, ю удалтыны кутскем, висён но бырем.

Нош соку узыръёс калыклэн шудо улонэзлы пумит луиллям, пудооссэс виылыны, ваньбурзэс сутылыны кутскиллям. Удмурт калык Быдӟым пӧйшурась валэктэмъя узыръёсыз ас шаерысьтыз уллям. Соку улон уката шудо луэм.

Куанер удмурт калыкъёс, туж дан карыса, бадӟым салам дасяллям со Быдӟым пӧйшурасьлы, нош со номыр басьтымтэ.

— Мон аслым дан понна, аслым ваньбур понна уг тыршиськы, тӥ кадь куанер улӥсь калыкъёсыз сьӧсь кионъёслэсь мозмытон понна тыршисько, — шуэм со.

Тӥни со Быдӟым пӧйшурасьлэн нимыз Ленин вылэм.