ӞИЧЫЕН АТАСЭН

Ӵукна сиськыса, ӟичы калгыны потэм. Пумитаз, пе, атас лыктэ — горд изьыен, пурысь костюмен, кияз пичи корзинкаен.

Сютэм ӟичылэн дыльдыез ик шырр! вияны кутскем. Ымдуръёссэ нюлышъяса, каллен гинэ, пе, лыктэ атас доры: «Сио бере, сио ини», малпа ӟичы.

— Кытчы ветлӥд али, атас уром, — ӟичы йӧн-йӧн кариськыса юам.

— Базаре ветлӥ, маке-маке сион басьтӥ, — шуэм атас.

— Тани ма вераме потэ, атас уром: котькин аслаз матысь муртэныз ваче куное ветлылэ, сиылэ-юылэ. Ойдо асьмеос но тодматском: мынам нимы Васса, нош тынад кызьы нимыд? — атас азьын ӟичы олокыӵе но чеберъяське, пе.

— Мынам нимы Петька — котькинлы тодмо ним, — шуэм атас, нош ачиз малпам: «таин эш луид ке, улэп уд кыльы ни».

Ӟичылэн шумпотэмез пачылмем.

— Туннэ ӝыт ик куное ӧтисько, бертылыса лыкты... Тьфу! Нимдэ вунэтӥ. Медам вунэты шуыса, кымесам гожты али, — косэм ӟичы.

«Эк, али ик сиысал вылэм но, калык тодӥз ке, адӟонтэм кароз, гуртам гинэ сио ини, отын нокин но уз тоды», шуыса малпам ӟичы ас понназ.

Атас карандашсэ поттэм но ӟичылэн кымесаз бадӟымесь букваосын «гондыр» шуыса гожтэм.

— Мыно, мыно, — шуэ, пе, атас. — Одно ик мынытэк уг кыльы.

— Бен ӟеч лу, возьмало, — шуыса, ымдурзэ нюлыса, ӟичы кошкем. — «Лыктӥз ке, ӝытлы сион вань», малпам со.

Атас берзэ учкиз но дор палаз лобыса ик кошкиз, пе, «йыр мозмиз» шуыса.

Я, ӟичы вите ини кунозэ, укно котыраз гинэ берга на. Учке, учке — нокин лыктӥсь ӧвӧл, пе. Ӝыт луиз ини, нош атас весь ӧвӧл. Сое возьманъяз укно дуре ик умме усем.

Ӵукна султэм но, кӧт сюма, пе, йыркурен сюлэм сэректэ. «Алдамез понна сио бере, сио ини» шуыса, утчаны потэм.

Пумитаз кион, пе, лыктэ.

— Кытчы потӥд али, ӟичы уром, ӵукна ик? — кион небыт куараен вазем.

— Марымез утчасько... Тьфу, нимзэ вунэтӥ: кымесысьтым учкы али, — ӟичы кымессэ возьматэм.

«Гондыр» гожтэм кылэз кион адӟиз но паймиз, пе.

— Ма карод соин?

— Сио мон сое, алдаз со монэ, — шуэм ӟичы.

«Гондырез сиыны утчам бере, монэ улэпкын ньылоз та» шуыса, ӟичы палэнэ учкон сьӧркытӥ кион питрам ук! Ӟичы берзэ но адӟымтэ ни.

Мынэ, мынэ, пе, ӟичы сюрес кузя азьлань. Пумитаз гондыр, пе, лыктэ пырак та шоры.

— Мар ӵукна ик потӥд, ӟичы уром? — гондыр ӟичы доры вуэмезлэсь азьлон ик юам.

— Марымез утчасько... Тьфу, нимзэ вунэтӥ: кымесысьтым учкы али, — шуэм ӟичы.

Ӟичы кымесысь «гондыр» гожтэмез адӟем но гондыр пӧсьвуаськем кадь луэм.

— Ма карод соин? — юам гондыр.

— Сио мон сое, алдаз со монэ.

Гондыр, вожез потыса, ӟичыез мыжгыны дасяськиз, пе.

— Дугды-ай, асьмеос нырысь нюръяськом, кин кинэ вормоз, — шуэм гондыр.

Ӟичы вазьыны но вуттымтэ, гондыр сое, бер кукъёстӥз кутыса, кыз борды шуккем но вием.

— Сиид-а гондырез! — кылзэ юаса кошкем.

Кӧттырмостэм ӟичыез атас озьы алданы быгатэм.