ӞИЧЫ НО АТАС

Атас кӧжы кизем. Удалтэм кӧжыез. Октыны-калтыны дасяськыса улэ, пе, ини.

Татӥ ӟичы шыраса ветлэ вылэм. Атасэз адӟем но сое кутыны чаклам. Юри кӧжы лушканы кутскем. Солэн ас сьӧраз атасэз уйиськытэмез потэм. Чалмыт азьын куто но сио кожам.

Атаслэн ӟичылы йырыз кур, нош огназ уиськыны кышка.

Атас аслыз эш утчаны кошкем.

Пумитаз ӵӧж лыктэ, пе.

— Чӧж уром, ӟичы кӧжыме лушказ. Ойдо сое уйыса кутом. Мон нырыным кокчало, тон бурдыныд жугод.

— Уг, уг мын, — шуэм ӵӧж. — Лобӟыны ке, мон секыт, бызьыны ке, гадь вылам усьылӥсько. Ӟичы монэ асме сиоз.

Азьлань бызем атас.

Пумитаз ӟазег лыктэ, пе.

— Ӟазег уром, ӟичы кӧжыме лушказ. Ойдо сое уйыса кутом. Тон нырыныд чепыллялод, бурдыныд жугод, мон гижыосыным ӵабъяло.

— Уг, уг мыны, — шуэм ӟазег. — Бызьыны ке, мон ӵемтылӥсько, лобӟыны ке, пуксеме уг луы. Ӟичы монэ асме сиоз.

Чидатэк бызьылэ, пе, атас, синъёссэ бергатъя, зурӟонъёссэ ваче шуккылэ. Вожез потэм атаслэн.

Пумитаз пуны шедиз, пе.

— Пуны уром, ӟичы кӧжыме лушказ. Ойдо сое уйыса кутом. Мон нырыным кокчало, тон пиньыныд куртчылод.

— Ойдо, — шуэм пуны, — мон сое быжтӥз куртчо. Кузёелы ваё.

Ӵошен ӟичы пытьы кузя бызиллям. Куакъёс пӧлысь утчало, пе, турын пӧлысь учкыло.

Ӟичы нош атасэз возьма вылэм, весь-весь кылльыса. Кӧжызэ вӧзаз киськам. Атасэз пӧяны турттэ, пе.

Со куспын атас куара кылӥськем:

— Синдэ кокчалтыны чурыт ныры вань, нырдэ ӵабыштыны лэчыт гижыосы вань.

Ӟичы кылымтэ улсын кылле, пе, матэгес вуэмзэ вите.

— Нырыным кокчалто, синдэ пылькчыто, гижыеным ӵабышто — йырысьтыд вирдэ кисьто.

Ӟичы ымдуръёссэ нюлэ, пе, ини, ческыт сӥль сиыны дасяське. «Возьмато али мон тыныд!» шуыса малпа, дыр, ас понназ.

Чакласькыса лыктэ, пе, атас. Ини ӟичылы ог кык пол тэтчыса кутымон гинэ матаз вуэм.

Зурак! тэтчем ӟичы. Со пумитэ дуак! пуны тэтчем.

— А-а, шедид-а, кузь быж! — шуыса куртчем ӟичыез, кузёезлы нуэм.

Атас нош, ӟичылэсь киськам кӧжызэ октыса, дораз ваем.