УРОДЭСЬ ЭШЪЁС

Одӥг крестьян базаре потэм. Вузаны одӥг курег, кык-куинь йыр кубиста, собере берпум ыжзэ думылыса дӧдьые понэм.

Мынон сюресэз кузь вылэм. Мынэ, пумитаз луд кеч лыктэ.

— Кытчы-о мынӥськод, уром? — луд кеч юам.

— Базаре мынӥсько, — шуэм крестьян.

— Басьты монэ но сьӧрад. Одӥглэсь кык луом.

— Ӧйтӧд, басьтод-а, мар-а ини, — крестьян йыртышсэ кормаса шуэ, пе. — Тон мынэсьтым бакчаысь кубистаме йырйыса быдтӥд но... Ӵок-а, мар-а ини, простить карисько... Пуксьы, иське.

Луд кеч пуксем но кубисталы матэ кариськем.

Мыно, пе, ини таос. Ӧжыт мынэм беразы ӟичыен пумиськиллям.

— Эй, кытчы тазьы мынӥськоды? — ӟичы юам.

— Базаре мынӥськом...

— Басьтэ монэ но сьӧрады. Кыклэсь куинь луом.

Крестьян нош ик йыртышсэ кормам но мылыз потытэк тазьы шуэм:

— Ӧйтӧд, басьтод-а, мар-а ини. Тон мынэсьтым вань чипы-курегме нуллыса быдтӥд ини но... Ӵок-а, мар-а ини, пуксёд ке, пуксьы.

Ӟичы пуксем но кыштыр гинэ куреглы матэ кариськем.

Мыно, пе, ини таос. Ӧжыт мынэм беразы кионэн пумиськиллям.

— Эй, уром, кытчы мынӥськод? Басьтэ монэ но сьӧрады. Куиньлэсь ньыль луом.

Крестьян, нош ик йыртышсэ кормаса, оскытэк со шоры учкем но шуэм:

— Ӧйтӧд, басьтод-а, мар-а ини. Тон мынэсьтым ыжъёсме гужем вандылӥд но... Ӵок-а мар-а ини, чиданы кылем бере — чидалод.

— Ойдо чида, чида... Чидан чигымтэ, чиданы кулэ, — ӟичы, кионлы пыриськыса, синъёсыныз шудыса шуэ, пе.

— Ӵок ини, пуксёд ке, пуксьы.

Кион пуксем. Мыно, пе, ини таос. Мыныкузы вераськем улсын кион кыштыр гинэ ыжлы матэ кариськем.

Ӧжыт мынэм беразы лусьтро гондырен пумиськиллям.

— Эй, уром, кытчы тазьы мынӥськод? Пукты монэ но, ньыльлэсь вить луом.

Крестьян нош ик йыртышсэ кормаса сылэм-сылэм но тазьы шуэм:

— Тон мынэсьтым берпум скалме сиид но... Ӵок-а, мар-а? ини.

— Со понна тыныд инмар дассэ сётоз, — ӟичы гондырлы пыриськыса шуэ, пе.

— Ӵок ини, пуксёд ке, пуксьы.

Гондыр но пуксем. Дӧдьы тыр пуксиллям. Крестьянлэн валэз мырдэм, пе, ворме на.

Ӧжыт мынэм беразы вайыжзы чигем но, дугдоно луиллям.

— Кин мыноз вайыжлы? — крестьян куректыса юам.

Нокинлэн но мынэмез уг поты. Соку таос пус чӧлтӥллям.

Пус луд кечлы усем. Луд кеч кекыр-бекыр тэтчаса кошкем но, ӧжыт улыса, векчи гинэ ньӧрез вуттэм.

— Тани, — шуэ, пе, — ваи... Вайыж луоз.

Крестьян мар шуыны ик абдрам.

— Эх, тон, кырыж син, кырыж син! — ӟичы тышкаськем карыса шуэм, — со-а луоз вайыж? Тани мон мынӥ ке, ваё!

Кошкем ӟичы. Ӧжыт улыса, луд кечлэн ваем ньӧрезлэсь ӧжыт гинэ зӧксэгес куртчыса вуттэм.

— Тани, — шуэ, пе, — ваи... Вайыж луоз.

— Эх, тон, кузь быж! — ушъяськыса шуэм кион. — Сое но уд валаськы. Тани мон ваё ке, ваё!

Табереяз кион кошкем. Ӧжыт улыса, боды ваем.

— Тани, — шуэ, пе, — вайыж ваи.

— Эх, тон, зӧк пинь! — гондыр кионэз курласа шуэм. — Сое но уд валаськы. Тани мон ваи ке, ваё! Ваньдэс абдрато.

Кошкем гондыр вайыж утчаны. Ӧжыт улыса, быдэс кызэз выжыеныз ишкалтыса ваиз, пе.

— Тани, — шуэ, пе, — ваи дак ваи!

— Эх, тӥ! — йыркуръяськыса верам крестьян, — муртлэн дӧдьыяз ворттылыны сяна уд тодӥське. Ачим ке мынӥ, сюлмаськонэз быроз.

Озьы шуэм но кошкем. Сое гинэ возьмало вылэм дӧдьыын пукисьёс. Крестьянлэн берыз гинэ ышыса вуэм но, луд кеч кубистаез йырйыны кутскем. Ӟичы курегез соку ик кесяса быдтэм. Кион ыж борды куртчиськем, лыеныз валче ньылэм. Нош гондыр вал доры мынэм но валлэсь ӝушсэ поттэм. Валэз но качаса быдтӥллям. Асьсэос пегӟыса кошкиллям.

Ӧжыт улыса, крестьян пельпумаз вайыжен вуэм но ма шуыны ик абдрам. Валзэ сииллям. Дӧдьыысь вань вуззэ быдтӥллям.

Крестьян паймыса сылэ, йыркуреныз синвуэз ӵужырр! вия, пе.

— Вот тыныд йӧно муртъёсын ке эшъяськод — озьы кулэ. Кион но гондыр ноку но тыныд эшъёс уз луэ, — кыз йылын пукись коньы кесяське, пе.

Со куспын крестьян доры нош ик луд кеч вуэм.

— Малы бӧрдӥськод, уром? — луд кеч серекъяса шуэм.

Крестьян луд кечез соку ик зырын шуккем. Луд кечлэн кускыз карнан кадь куасалскиз, пе.

— Ой, быри! Ой, быри! — шуыса, луд кеч тэтчаса кошкем.

Луд кеч кошкыса гинэ вуиз но, ӟичы, пе, потӥз:

— Малы бӧрдӥськод, уром?

— Куректӥсько... Эк, мон тонэ, кузь быжез! — крестьян, вайыжзэ кутыса, ӟичылэн тыбыр кузяз ожалтэм.

— Ой, ой!.. Караул! — ӟичы визьтэммыса, кесяськыса кошкем.

Ӟичы кошкиз но, кион лыктӥз, пе.

— Ма татын возьмаськод, уром? — кион серекъяса юам.

— Возьмасько-ай... Мон тонэ, зӧк пинез! — шуыса, вайыженыз «кроп» гинэ кионлэн йыраз шуккем. Кион отчы ик чоньдӥз, пе.

Гондыр но лап-лап вамышъяса вуэм.

— Мар татын возьмаськод, уром? — серекъяса гондыр шуэм.

— Возьмасько али... Тонэ возьмасько... Куно карыны малпасько! — шуыса, гондырлэн пель висказ вайыжен шуккем. Гондыр кытчы вуэмзэ но валамтэ ни.

— Солы со кулэ, со кулэ, — шуыса тэтча, пе, коньы. — Быгатӥд!

Дышетэмез понна коньылы крестьян тау карем. Кионлэсь но гондырлэсь куоссэс нием но базаре нуыса вузам. Кион кулэн дуныз дӧдьылы тырмем, гондыр ку дунэн аслыз вал басьтэм. Кылем коньдонэзлы пушмульы ваем но коньы уромезлы салам сётэм.